ଭୁବନେଶ୍ବର: ବିଜୟିନୀ ସ୍ମୃତି ଟ୍ରଷ୍ଟ୍ ପକ୍ଷରୁ ଉତ୍କଳ ବିଶ୍ବବିଦ୍ୟାଳୟ ଲୋକ ପ୍ରଶାସନ (ପବ୍ଲିକ ଆଡମିନିଷ୍ଟ୍ରେସନ) ପ୍ରଫେସର ସ୍ବର୍ଗତ ବିଜୟିନୀ ମହାନ୍ତିଙ୍କ ସପ୍ତମ ସ୍ମୃତିସଭା ଅନୁଷ୍ଠିତ ହୋଇଯାଇଛି। ଆୟୋଜିତ କାର୍ଯ୍ୟକ୍ରମରେ ବିଜୟିନୀ ବାର୍ଷିକ ପତ୍ରିକା ‘ବିଶ୍ବାସ, ଅବିଶ୍ବାସ ଓ ଅନ୍ଧବିଶ୍ବାସ’ ଲୋକାର୍ପିତ ହୋଇଯାଇଛି। ବିଶିଷ୍ଟ କଥାକାର ଗୌରହରି ଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ କାର୍ଯ୍ୟକ୍ରମରେ କଥାକାର ଡ.ପୀତବାସ ରାଉତରାୟ, ଉତ୍କଳ ବିଶ୍ବବିଦ୍ୟାଳୟ ଓଡ଼ିଆ ଭାଷା ସାହିତ୍ୟ ବିଭାଗର ପ୍ରାକ୍ତନ ପ୍ରଫେସର ନାରାୟଣ ସାହୁ ଓ ଲୋକ ପ୍ରଶାସନ ପ୍ରଫେସର ସ୍ବର୍ଣ୍ଣମୟୀ ତ୍ରିପାଠୀ ପ୍ରମୁଖ ଅତିଥି ଭାବେ ଯୋଗଦେଇ ବିଜୟିନୀଙ୍କ ସ୍ମୃତିଚାରଣ ସହ ପତ୍ରିକା ଉନ୍ମୋଚନ କରିଥିଲେ। ସ୍ମୃତି ଟ୍ରଷ୍ଟ୍ର ସଭାପତି ଡାକ୍ତର ଇନ୍ଦ୍ରମଣି ଜେନା କାର୍ଯ୍ୟକ୍ରମ ବାବଦରେ ପ୍ରାରମ୍ଭିକ ସୂଚନା ଦେବା ପରେ ଅତିଥିମାନେ ପତ୍ରିକାର ଶୀର୍ଷକ ଓ ବିଷୟବସ୍ତୁ ଉପରେ ଆଲୋକପାତ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଏହି ଅବସରରେ bijoyini.com ୱେବସାଇଟ୍ ମଧ୍ୟ ଲୋକାର୍ପିତ ହୋଇଛି। ଏହି ୱେବସାଇଟ୍ ଜରିଆରେ ବିଜୟିନୀ ସ୍ମୃତି ଟ୍ରଷ୍ଟ୍ ପକ୍ଷରୁ ୨୦୧୫ରୁ ଏଯାବତ ପ୍ରକାଶିତ ପତ୍ରିକା, ବିଜୟିନୀ ମହାନ୍ତିଙ୍କ ପ୍ରକାଶିତ ୫୮ଟି ପ୍ରବନ୍ଧ ପାଠକ ଓ ଗବେଷକମାନଙ୍କ ପାଇଁ ଉପଲବ୍ଧ ହେଉଛି ବୋଲି ଡାକ୍ତର ଜେନା କହିଛନ୍ତି। ଚଳିତ ବର୍ଷ ପ୍ରସ୍ତୁତ ପତ୍ରିକାରେ ଅନେକ ମନସ୍ତତ୍ତ୍ବବିତ୍, ଦାର୍ଶନିକ, ବୈଜ୍ଞାନିକମାନେ ବିଶ୍ବାସ, ଅବିଶ୍ବାସ ଓ ଅନ୍ଧବିଶ୍ବାସ ଉପରେ ୫୦ଟି ଉପାଦେୟ ଆଲେଖ୍ୟ ଭେଟି ଦେଇଛନ୍ତି। ତେବେ ଚଳିତ ବର୍ଷ ପରୀକ୍ଷା ଫଳ ପ୍ରକାଶ ପାଇନଥିବାରୁ ବିଜୟିନୀ ସ୍ମାରକୀ ପୁରସ୍କାର ସ୍ଥଗିତ ରହିଛି।