ବାଲିଅନ୍ତା: ତୁଳସୀ ଗଛରେ କୁକୁର ପରିସ୍ରା କରାଇବା ଘଟଣାକୁ ନେଇ ଆଜି ପ୍ରତାପଶାସନ ବ୍ରାହ୍ମଣସାହିରେ ଗଣ୍ଡଗୋଳ ଘଟିଥିଲା। ଲୁହା ରଡ୍‌ ପାହାରରେ ପ୍ରଫୁଲ ମହାପାତ୍ର(୫୩)ଙ୍କ ମୁଣ୍ଡରେ ଗଭୀର ଆଘାତ ଲାଗିଛି। ସେ ଏବେ କ୍ୟାପିଟାଲ୍‌ ହସ୍ପିଟାଲ୍‌କୁ ଆଇସିୟୁରେ ଚିକିତ୍ସାଧୀନ ଅଛନ୍ତି। ସୂଚନାନୁସାରେ ପ୍ରଫୁଲ ଆଜି ଅପରାହ୍ଣରେ ତାଙ୍କ ବଗିଚାରେ ଘାସ ସଫା କରୁଥିଲେ। ସେହି ସମୟରେ ନାରାୟଣ ଦାଶ ତାଙ୍କ କୁକୁରକୁ ନେଇ ବଗିଚାରେ ପରିସ୍ରା କରାଇଥିଲେ। ତୁଳସୀ ଗଛ ନିକଟରେ କୁକୁର ପରିସ୍ରା କରିବାରୁ ପ୍ରଫୁଲ ବିରୋଧ କରିଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ପାଟିତୁଣ୍ଡ ଶୁଣି ନାରାୟଣଙ୍କ ପୁଅ ଶିବ ପ୍ରସାଦ ଘଟଣାସ୍ଥଳକୁ ଧାଇଁ ଆସିଥିଲା। ଶିବ ଏକ ଲୁହା ରଡ୍‌ରେ ପ୍ରଫୁଲଙ୍କ ମୁଣ୍ଡକୁ ପିଟି ଦେଇଥିଲା।