ଭୁବନେଶ୍ବର: ‘ଆମ ବସ୍‌’ ଡିପୋରେ ପଶି ଜଣେ କଣ୍ଡକ୍ଟରଙ୍କୁ ମାଡ଼ ମାରି ମୁଣ୍ଡ ଫଟାଇ ଥିବା ଅଭିଯୁକ୍ତମାନଙ୍କୁ ଗିରଫ ଦାବିରେ ଆଜି ରାଜଧାନୀରେ ‘ଆମ ବସ୍‌ ସେବା ବନ୍ଦ ରହିଥିଲା। ‘ଆମ ବସ୍‌’ ବନ୍ଦ ରହିବା ଫଳରେ ଲୋକେ ହଇରାଣ ହୋଇଥିଲେ। ପ୍ରବଳ ଖରାରେ ‘ଆମ ବସ୍‌’ ଉପରେ ନିର୍ଭର କରୁଥିବା ସାଧାରଣ ଲୋକମ‌ାନେ ହନ୍ତସନ୍ତ ହୋଇଥିଲେ। ପରେ ପୁଲିସ ଅଭିଯୁକ୍ତମାନଙ୍କୁ ଦୁଇ ଦିନ ମଧ୍ୟରେ ଗିରଫ କରିବାର ପ୍ରତିଶ୍ରୁତି ପାଇବା ପରେ ‘ଆମ ବସ୍‌’ର ଡ୍ରାଇଭରମାନେ ଆନ୍ଦୋଳନରୁ ହଟି କାର୍ଯ୍ୟରେ ଯୋଗଦେଇଥିଲେ। ‌ସନ୍ଧ୍ୟାରେ ମୈତ୍ରୀବିହାର ଥାନା ଜଣେ ଆକ୍ରମଣକାରୀକୁ ଗିରଫ କରିଛି। ଅଭିଯୁକ୍ତ ହେଉଛି ଭରତପୁର ଥାନା ମଦନପୁର ଅଞ୍ଚଳର ପ୍ରୀତମ୍‌ ସାମନ୍ତରାୟ (୩୮)। ଓ ଅନ୍ୟ ଚାରି ଅଭିଯୁକ୍ତଙ୍କୁ ଧରିବାକୁ ପୁଲିସ ତଦନ୍ତ ଜାରି ରଖିଛି।

Advertisment

ଅଭିଯୋଗ ଅନୁସାରେ ଗତକାଲି ରାତି ପ୍ରାୟ ସାଢ଼େ ୧୦ଟାରେ ୨୩ ନମ୍ବର ରୁଟ୍‌ରେ ଯାଉଥିବ‌ା ‘ଆମ ବସ୍‌’ ଭରତପୁର ଥାନା  ଆଇଜିକେସି ହସ୍ପିଟାଲ ପାଖ ବସ୍‌ ଡିପୋକୁ ଫେରୁଥିବା ବେଳେ କିଛି ଯୁବକ ରାସ୍ତା କଡ଼ରେ ବସିଥିଲେ। ରାସ୍ତା କଡ଼ରେ ବାଲି ପଡ଼ିଥିବାରୁ ବସ୍‌ ଯିବା ସମୟରେ ରାସ୍ତାର ଧୂଳି ଉଡ଼ିଥିଲା। ଏହାକୁ ନେଇ ସେଠାରେ ଥିବା ପ୍ରାୟ ୮ ଜଣ ଯୁବକ ବସ୍‌ର ପିଛା କରି ଅଟକାଇବା ସହ ଡ୍ରାଇଭରକୁ ଗାଳି ମନ୍ଦ କରିଥିଲେ। ବସ୍‌ ଡ୍ରାଇଭର ମଧ୍ୟ ପାଲଟା ତାଙ୍କୁ ଗାଳିମନ୍ଦ କରିଥିଲେ। ଏଥିରେ ଉତ୍ୟକ୍ତ ହୋଇ ଯୁବକମାନେ ଡ୍ରାଇଭରକୁ ଗାଡ଼ିରୁ ଓହ୍ଲାଇ ମାଡ଼ ମାରିବାକୁ ଧମକ ଦେଇଥିଲେ। ଏହା‌ପରେ ଡ୍ରାଇଭର ବସ୍‌କୁ ନେଇ  ମୈତ୍ରୀବିହାର ଥାନା ଅଞ୍ଚଳସ୍ଥ ‘ଆମ ବସ୍‌’ ଡିପୋକୁ ଚାଲିଯାଇଥିଲେ। ପରେ ଡ୍ରାଇଭର ସେଠାରୁ ପାଚେରି ଡେଇଁ ଫେରାର ହୋଇଯାଇଥିଲା। ପରେ ଘଟଣାସ୍ଥଳକୁ ପ୍ରାୟ ୧୫ ଜଣ ଯୁବକ ଆସି ଆମ ବସ୍‌କୁ ଘେରି ଯାଇ ବସ୍‌ ମଧ୍ୟରେ ଥିବା କଣ୍ଡକ୍ଟର ଭଦ୍ରକ ଜିଲ୍ଲାର ତ୍ରିଲୋଚନ ପରିଡ଼ାଙ୍କୁ ଡ୍ରାଇଭର ଭାବି ଘୋଷାରି ଆଣିବା ସହିତ ତଳେ ପକାଇ ପ୍ରବଳ ମାଡ଼ ମାରି ମୁଣ୍ଡ ଫଟାଇ ଦେଇଥିଲେ। ଏହାପରେ ଘଟଣାସ୍ଥଳକୁ ଅନ୍ୟ କର୍ମଚାରୀମାନେ ଆସିଯିବାରୁ ଯୁବକମ‌ାନେ ସେଠାରୁ ପଳାଇଯାଇଥିଲେ। ଏହାକୁ ନେଇ ଆମ ବସ୍‌ କର୍ମଚାରୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଥିଲା। 
ତେଣୁ ଆଜି ଆମ ବସ୍‌ର ସମସ୍ତ ଡ୍ରାଇଭର୍‌ ଓ କଣ୍ଡକ୍ଟର୍‌ ମାଷ୍ଟରକ୍ୟାଣ୍ଟିନ ଛକରେ ଏକାଠି ହୋଇ କାର୍ଯ୍ୟବନ୍ଦ ଆନ୍ଦୋଳନ କରିଥିଲେ। କ୍ରୁଟ୍ କର୍ତ୍ତୃପକ୍ଷ ଆସି ବୁଝାସୁଝା କରିବା ପରେ ମଧ୍ୟ କେହି ତାଙ୍କ କଥାକୁ ମାନି ନଥିଲେ। ଅଭିଯୁକ୍ତଙ୍କୁ ଗିରଫ ଓ ‘ଆମ ବସ୍‌’ କର୍ମଚାରୀଙ୍କୁ ସୁରକ୍ଷା ଯୋଗାଇ ଦେବା ପାଇଁ ସେମାନେ ଦାବି କରିଥିଲେ। ପରେ ପୁଲିସ ଡିସିପି ପହଞ୍ଚି ଦୁଇଦିନ ମଧ୍ୟରେ ଅଭି‌ଯୁକ୍ତମାନଙ୍କୁ ଗିରଫର ପ୍ରତିଶ୍ରୁତି ଦେବା ପରେ ଆନ୍ଦୋଳନକାରୀମାନେ ପ୍ରାୟ ସାଢ଼େ ୧୨ଟା ସମୟରେ ଆନ୍ଦୋଳନରୁ ଉଠିଥିଲେ। ଅପରାହ୍ନ ୧ଟା ପରେ ଆମ ବସ୍‌ ଚଳାଚଳ କରିଥିଲା। 

ଏନେଇ ଭରତପୁର ଥାନା ଓ ମୈତ୍ରୀବିହାର ଥାନା ପୁଲିସ ମାମଲାର ତଦନ୍ତ ଆରମ୍ଭ କରିଛି। ସିସିଟିଭି ଜରିଆରେ ଅଭିଯୁକ୍ତମାନଙ୍କୁ ଚିହ୍ନଟ କରାଯାଇଛି। ବହୁତ ଜଲଦି ଅଭିଯୁକ୍ତମାନେ ଧରା ପଡ଼ିବେ ବୋଲି ପୁଲିସ କହିଛି। ଚଢ଼ା ଅଟୋଭଡ଼ାରେ ଗଲେ ଲୋକେ ଆଜି ‘ଆମ ବସ୍‌’ କର୍ମଚାରୀଙ୍କ ଆନ୍ଦୋଳନ ଫଳରେ ଯାତ୍ରୀମାନେ ବହୁ ହଇରାଣ ହୋଇଥିଲେ। ବିଭିନ୍ନ କାମରେ ଭୁବନେଶ୍ବର ଆସିଥିବା ସାଧାରଣ ଲୋକେ ଅଟୋ ଉପରେ ନିର୍ଭର କରିଥିଲେ। କେତେକ ଅଟୋଚାଳକ ଲୋକଙ୍କ ଠାରୁ ଚଢ଼ାଦରରେ ଲୋକଙ୍କଠାରୁ ଅଧିକ ଭଡ଼ା ନେଇଥିଲେ। ମାଷ୍ଟରକ୍ୟାଣ୍ଟିନ୍‌ଠାରୁ ବାଣୀବିହାର ଅଟୋ ଭଡ଼ା ସାଧାରଣତଃ ଲାଇନ ଅଟୋ ୨୦ ଟଙ୍କା ହୋଇଥିବା ବେଳେ ଆଜି ୫୦ ଟଙ୍କା ପର୍ଯ୍ୟନ୍ତ ଅଟୋ ଭଡ଼ା ଆଦାୟ କରିଥିଲେ ବୋଲି ଯାତ୍ରୀମାନେ ଅଭିଯୋଗ କରିଥିଲେ।