ପହଞ୍ଚିପାରୁନି ମୌଳିକ ସୁବିଧା, ୨୩ନମ୍ବର ୱାର୍ଡ

ଜଟଣୀ: ଜଟଣୀ ପୌରପାଳିକାର ୨୩ନଂ ୱାର୍ଡ ଏକ ପ୍ରମୁଖ ଅଞ୍ଚଳ ଭାବେ ଜଣାଶୁଣା। ଏହି ୱାର୍ଡ ଅଧୀନରେ କୁଦିଆରି, ରଣସିଂହସାହି, ନୀଳମାଧବସାହି, ମହତାବନଗର-୧, ମହତାବନଗର-୨, ସୁନ୍ଦରାସାହି, ହରିଜନସାହି, ପଥରଚକଡ଼ାସାହି ଆଦି ଅଞ୍ଚଳ ରହିଛି। ନିର୍ବାଚନକୁ ଦୁଇ ବର୍ଷରୁ ଅଧିକ ସମୟ ବିତିଯାଇଛି। ହେଲେ ଏବେ ବି ଏହି ୱାର୍ଡରେ ଅନେକ ମୌଳିକ ସୁବିଧାସୁଯୋଗ ଉପଲବ୍ଧ ନାହିଁ।  

ଏହି ୱାର୍ଡରେ ପୌରପାଳିକା ପକ୍ଷରୁ ପାଇପ୍ ଯୋଗେ ୨୪ଘଣ୍ଟିଆ ପାଣିଯୋଗାଣ ବ୍ୟବସ୍ଥା କରାଯାଉଛି। ହେଲେ ୱାର୍ଡର ଅନେକ ଅଞ୍ଚଳକୁ ଅନେକ ଦିନହେଲା ସପ୍ଲାଏ ପାଣି ଆସୁନାହିଁ। ସେହିପରି ପଥରଚକଡ଼ା ସାହିକୁ ପାଣି ପାଇପ୍ ସଂଯୋଗ କରାଯାଇଛି, ହେଲେ ସଂଯୋଗ ଦିନଠୁ କିଛି ସ୍ଥାନରେ ପାଣି ଆସୁନାହିଁ। ସେହିପରି ଡେନ୍‌ର ୭୦ପ୍ରତିଶତ ଆଜର୍ବନାରେ ଭର୍ତ୍ତି ହୋଇଗଲାଣି। ଏପରିକି ଡ୍ରେନ୍‌ଗୁଡ଼ିକ ମୁକୁଳା ଅବସ୍ଥାରେ ପଡ଼ି ରହିଛି। ଫଳରେ ବର୍ଷାଦିନେ ଜଳ ନିଷ୍କାସନ ହୋଇ ନପାରି ରାସ୍ତାରେ ମାଡ଼ୁଛି। ପୌରପାଳିକା ପକ୍ଷରୁ ୱାର୍ଡରେ ମଶା ତେଲ କିମ୍ବା ଧୂଆଁ ଛଡ଼ାଯାଉ ନଥିବା ଅଭିଯୋଗ ହୋଇଛି। ବିଦ୍ୟୁତ୍ ତାରଗୁଡ଼ିକ ଝୁଲନ୍ତା ଅବସ୍ଥାରେ ଥିବାରୁ ବିପଦଜନକ ସ୍ଥିତିରେ ରହିଛି। ଏହାବାଦ୍‌ ବରିଷ୍ଠ ନାଗରିକଙ୍କ ପାଇଁ ସଭାଗୃହ, ପ୍ରତିଦିନ ସଫେଇ, କଲ୍ୟାଣ ମଣ୍ଡପ ପାଇଁ ଦାବି କରାଯାଇଛି। 

ସ୍ଥାନୀୟ ବାସିନ୍ଦା ନିହାର ରଞ୍ଜନ ସାହୁ କହିଛନ୍ତି, ୱାର୍ଡରେ ଡ୍ରେନ୍ ଓ ପାଣି ସମସ୍ୟା ବହୁ ଦିନରୁ ରହିଆସିଛି। ଏବେବି କିଛି ପରିବାର କୂଅ ପାଣି ବ୍ୟବହାର କରୁଛନ୍ତି। ପୌରପାଳିକା କର୍ତ୍ତୃପକ୍ଷଙ୍କୁ ବାରମ୍ବାର ଅଭିଯୋଗ ସତ୍ତ୍ବେ ସମସ୍ୟାର ସମାଧାନ ହେଉନି। ସେହିପରି ଅନ୍ୟତମ ବାସିନ୍ଦା ରାକେଶ ବିଶ୍ବାଳ ଅଭିଯୋଗ କରିଛନ୍ତି ଯେ, ଡ୍ରେନ୍ ଗୁଡ଼ିକ ଅଳିଆ ଆବର୍ଜ୍ଜନାରେ ଭର୍ତ୍ତି ହୋଇଯାଇଥିଲେ ମଧ୍ୟ ବର୍ଷ ବର୍ଷ ଧରି ସଫା କରାଯାଉନାହିଁ। ଫଳରେ ବର୍ଷାଦିନେ ରାସ୍ତାରେ ପାଣି ଭାସୁଛି। ଯାତାୟାତରେ ଘୋର ସମସ୍ୟା ହେଉଛି।

ପ୍ରକଳ୍ପ କାର୍ଯ୍ୟ ଶୀଘ୍ର ଶେଷ କରିବାକୁ ଚେଷ୍ଟା କରୁଛି: କାଉନ୍‌ସିଲର୍‌ 
ୱାର୍ଡରେ ଦୁଇ ବର୍ଷ ମଧ୍ୟରେ ଅନେକ ବିକାଶମୂଳକ କାର୍ଯ୍ୟ କରାଯାଇଛି। ରାସ୍ତା, ଡ୍ରେନ୍ ପ୍ରକଳ୍ପ କାମ ପାଇଁ ନୂଆ ଟେଣ୍ଡରରେ କିଛିଦିନ ମଧ୍ୟରେ କାମ ଆରମ୍ଭ କରାଯିବ। କିଛି ଅଞ୍ଚଳରେ ଡ୍ରେନ୍ ଉପରେ ସ୍ଲାବ୍‌ ପଡ଼ିଥିବା ବେଳେ ଆଉ କିଛି ବାକି ଅଛି। ଠିକ୍‌ ସମୟରେ ସପ୍ଲାଏ ପାଣି କିପରି ସମସ୍ତଙ୍କ ପାଖରେ ପହଞ୍ଚିପାରିବ, ସେ ବ୍ୟବସ୍ଥା କରାଯିବ। ଝୁଲନ୍ତା ତାରକୁ ସୁରକ୍ଷିତ କରିବା ପାଇଁ ବିଦ୍ୟୁତ୍‌ ବିଭାଗ ଅଧିକାରୀଙ୍କ ସହିତ ଆଲୋଚନା କରାଯିବ ବୋଲି କାଉନ୍‌ସିଲର୍‌ ଅମ୍ରିତା ଦାସ କହିଛନ୍ତି।