ରାତି ଅଧରେ ନାକେଦମ୍ କଲା ମୋବିଲ, ଦୁର୍ଘଟଣା ଘଟି ଏକାଧିକ ଆହତ

ଭୁବନେଶ୍ୱର: ରାତି ପ୍ରାୟ ୧୧ଟା ବେଳେ ରସୁଲଗଡ଼ ଛକ ଓଭରବ୍ରିଜ ଠାରୁ ପଳାସୁଣି ପର୍ଯ୍ୟନ୍ତ ରାସ୍ତାରେ ପ୍ରବଳ ଜାମ ଦେଖିବାକୁ ମିଳିଥିଲା। ରାସ୍ତାରେ ଯାଉଥିବା ଗୋଟିଏ ପରେ ଗୋଟିଏ ବାଇକ୍ ତଳେ ପଡ଼ି ଯାଇଥିଲା। ସ୍ଥାନୀୟ ଲୋକ ଓ ପୁଲିସ ଏହାର ଅନୁସନ୍ଧାନ କରିବାରୁ ରାସ୍ତା ଉପରେ କୌଣସି ଏକ ଗାଡ଼ିରୁ ମୋବିଲ ଲିକ୍ ହୋଇ ରସୁଲଗଡ ଓଭରବ୍ରିଜରୁ ସତସଙ୍ଗ ଛକ ପର୍ଯ୍ୟନ୍ତ ପଡ଼ିଥିବାରୁ ଦୃତ ବେଗରେ ଆସୁଥିବା ଗାଡ଼ି ଗୁଡ଼ିକ ରାସ୍ତାରେ ଖସି ଦୁର୍ଘଟଣା ହୋଇଥିଲେ।

ଫଳରେ ବହୁ ଲୋକ କ୍ୟାପିଟାଲ ହସ୍ପିଟାଲରେ ଭର୍ତ୍ତି ହୋଇଥିଲେ। ପରେ ପୁଲିସ ଘଟଣା ସ୍ଥଳରେ ପହଞ୍ଚି ଗାଡି ଗୁଡ଼ିକର ବେଗ କମାଇବାକୁ କହିଥିଲା ତତ୍ ସହିତ ସ୍ଥାନୀୟ ଲୋକ ଓ ପୁଲିସ ଏକାଠି ବାଲି ପକାଇ ରାସ୍ତାକୁ ଯାତାୟାତ ଉପଯୋଗୀ କରିବା ପରେ ଗାଡ଼ି ଗୁଡ଼ିକ ଯାତାୟାତ କରି ପାରିଥିଲା। ପ୍ରାୟ ଏକ ଘଣ୍ଟା ସମୟ ଧରି ଜାମ ଲାଗି ରହିଥିଲା।