ଭୁବନେଶ୍ୱର : ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ଓଡ଼ିଶା ସଙ୍ଗୀତ ଏକାଡେମି ଦ୍ୱାରା ସ୍ଥାନୀୟ ଉତ୍କଳ ମଣ୍ଡପଠାରେ ଆୟୋଜିତ ‘ଡଙ୍ଗର ନାଚ’ ଆଜି ଉଦ୍ଯାପିତ ହୋଇଯାଇଛି। ଆଜିର କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମୁଖ୍ୟ କାର୍ଯ୍ୟନିର୍ବାହୀ ଓ ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟର ପ୍ରାକ୍ତନ ପ୍ରଫେସର ରାମହରି ଦାସ ଯୋଗ ଦେଇ ଓଡ଼ିଶାର ଆଦିବାସୀ ସଂସ୍କୃତି ଓ ପରମ୍ପରା ସମ୍ପର୍କରେ କହିଥିଲେ। ତାଙ୍କର ନୃତ୍ୟ, ସଙ୍ଗୀତ ଓ ନାଟକ ଆମ ସଂସ୍କୃତିଠାରୁ ବହୁ ପୁରୁଣା। ଆମ ସଂସ୍କୃତିରେ ପାଶ୍ଚାତ୍ୟର ଛାପ ପଡ଼ିଥିବାବେଳେ ଏବେ ବି ଆଦିବାସୀ ନୃତ୍ୟ ଜୀବନ୍ତ ରିହିଛି ବୋଲି ସେ କହିଥିଲେ। ଅନ୍ୟତମ ଅତିଥି ଭାବେ ବିଧାୟକ ପ୍ରିୟଦର୍ଶୀ ମିଶ୍ର ଓ ପ୍ରାକ୍ତନ ପୁଲିସ ମହାନିର୍ଦେଶକ ବିପିନ ମିଶ୍ର ଯୋଗ ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ଶେଷ ସନ୍ଧ୍ୟାରେ ରାଜ୍ୟର ବିଭିନ୍ନ ଆଦିବାସୀ ଅଧ୍ୟୁଷିତ ଜିଲ୍ଲାରୁ ଆସିଥିବା ନୃତ୍ୟଦଳ ଦର୍ଶକଙ୍କ ମନ ମୋହିଥିଲେ। ବଲାଙ୍ଗୀରର ବିନୋଦ ପ୍ରଧାନ ଓ ସାଥୀଙ୍କ ଦ୍ୱାରା କଲଙ୍ଗାଦଣ୍ଡା ନୃତ୍ୟ, ବରଗଡ଼ର ରମେଶ ଗୁର୍ଲା ଓ ସାଥୀଙ୍କ ସହ କର୍ମା ନାଚ, ମୟୂରଭଞ୍ଜର ଯାମିନୀକାନ୍ତ ତିରିଆ ଓ ସାଥୀଙ୍କ ଦ୍ୱାରା କୋହ୍ଲା ନୃତ୍ୟ, ପାରଳାଖେମୁଣ୍ଡିର ପ୍ରଶାନ୍ତ ପଟ୍ଟନାୟକ ଓ ସାଥୀଙ୍କ ଦ୍ୱାରା ସଉରା ନୃତ୍ୟ ସାଙ୍ଗକୁ କଳାହାଣ୍ଡିର ସର୍ବେଶ୍ୱର ଭୋଇ ଓ ସାଥୀଙ୍କ ଦ୍ୱାରା ଗୋଟିଏ ଆଦିବାସୀ ସଙ୍ଗୀତ ପରିବେଷିତ ହୋଇଥିଲା। ଆଜି ବହୁ ସଂଖ୍ୟାରେ କିସ୍ର ଛାତ୍ରୀମାନଙ୍କ ସହ ଦର୍ଶକମାନେ ଆଦିବାସୀ ସଙ୍ଗୀତ ଓ ନୃତ୍ୟକୁ ମନଭରି ଉପଭୋଗ କରିଥିଲେ। ଡ.ଶ୍ରୀନିବାସ ଘଟୁଆରୀ କାର୍ଯ୍ୟକ୍ରମକୁ ସଂଯୋଜନା କରିଥିବା ବେଳେ ଶେଷରେ ଓଡ଼ିଶା ସଙ୍ଗୀତ ନାଟକ ଏକାଡେମୀର ସଚିବ ଡ.ବିଜୟ କୁମାର ଜେନା ଧନ୍ୟବାଦ ଅର୍ପଣ କରିଥିଲେ।