ଖଣ୍ଡଗିରି: ଶନିବାର ଦୁଇଟି ପର୍ଯ୍ୟାୟରେ ଭୁବନେଶ୍ବର ଏମ୍ସର ଦ୍ବିତୀୟ ଓ ତୃତୀୟ ସମାବର୍ତ୍ତନ ଉତ୍ସବ ଅନୁଷ୍ଠିତ ହେବ। ଏହି ଉତ୍ସବରେ ୨୦୧୩ ଓ ୨୦୧୪ମସିହାର ଏମ୍ବିବିଏସ୍, ବିଏସ୍ସି ନର୍ସିଂ, ବିଏସ୍ସି ପାରାମେଡିକାଲ ଓ ଏମ୍ଡି/ଏମ୍ଏସ୍ ବିଭାଗର ଛାତ୍ରଛାତ୍ରୀମାନଙ୍କୁ ଡିଗ୍ରି ପ୍ରଦାନ କରାଯିବ। ୨୦୧୩ ଓ ୨୦୧୪ ମସିହା ପାଇଁ ଶ୍ରେଷ୍ଠ ଏମ୍ବିବିଏସ୍ ଗ୍ରାଜୁଏଟ୍ ଭାବେ ଓଡ଼ିଆ ଝିଅ ମନୀଷା ମହାନ୍ତି ଓ ରୋଜାଲିନ୍ ପରିଡ଼ାଙ୍କୁ ସମ୍ମାନିତ କରାଯିବ।
Sambad is now on WhatsApp
Join and get latest news updates delivered to you via WhatsApp
ଆଜି ଏମ୍ସ ନିର୍ଦ୍ଦେଶିକା ପ୍ରଫେସର୍ ଗୀତାଞ୍ଜଳି ବି. ଏହି ଉତ୍ସବ ସମ୍ପର୍କରେ ସୂଚନା ଦେଇ କହିଲେ ଯେ ପୂର୍ବାହ୍ନରେ ଆୟୋଜିତ ଦ୍ବିତୀୟ ସମାବର୍ତ୍ତନ ଉତ୍ସବରେ ପବ୍ଲିକ ହେଲ୍ଥ ଫାଉଣ୍ଡେସନ୍ ଅଫ୍ ଇଣ୍ଡିଆର ସଭାପତି ପଦ୍ମଭୂଷଣ ପ୍ରଫେସର୍ ଡାକ୍ତର କେ. ଶ୍ରୀନାଥ ରେଡ୍ଡୀ ଓ ଅପରାହ୍ଣରେ ଅନୁଷ୍ଠିତ ହେବାକୁ ଥିବା ତୃତୀୟ ଉତ୍ସବରେ ଇଣ୍ଡିଆନ୍ କାଉନ୍ସିଲ୍ ଅଫ୍ ମେଡିକାଲ ରିସର୍ଚ୍ଚର ନିର୍ଦ୍ଦେଶକ ପଦ୍ମଶ୍ରୀ ପ୍ରଫେସର ଡାକ୍ତର ବଲରାମ ଭାର୍ଗବ ମୁଖ୍ୟ ଅତିଥି ଭାବେ ଯୋଗ ଦେବେ। ଭୁବନେଶ୍ବର ଏମ୍ସର ପରିଚାଳନା କମିଟି ସଭାପତି ତଥା ପଦ୍ମଶ୍ରୀ ପ୍ରଫେସର୍ ଡାକ୍ତର ସୁବ୍ରତ ଆଚାର୍ଯ୍ୟଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବାକୁ ଥିବା ଏହି ଉତ୍ସବରେ ମୋଟ୍ ୧୯୨ଜଣଙ୍କୁ ଏମ୍ବିବିଏସ୍, ୧୦୮ ଜଣଙ୍କୁ ବିଏସ୍ସି ନର୍ସିଂ, ୨୮ଜଣଙ୍କୁ ବିଏସ୍ସି ପାରାମେଡିକାଲ ଓ ୧୭ ଜଣଙ୍କୁ ଏମ୍ଡି/ଏମ୍ଏସ୍ ଡିଗ୍ରି ପ୍ରଦାନ କରାଯିବ। ଏହି ଦୁଇ ବ୍ୟାଚ୍ରୁ ପାସ୍ କରିଥିବା ଏମ୍ବିବିଏସ୍ର ବହୁ ଛାତ୍ରଛାତ୍ରୀ ଦିଲ୍ଲୀ ଏମ୍ସ, ବେଙ୍ଗାଲୁରୁ ନିମାହନ୍ସ, ଚଣ୍ଡିଗଡ଼ ପିଜିମର୍ ଓ ପୁଡୁଚେରି ଜିପମର୍ର ପ୍ରବେଶିକା ପରୀକ୍ଷାରେ କୃତକାର୍ଯ୍ୟ ହୋଇ ସ୍ନାତକୋତ୍ତର ଡିଗ୍ରି ପାଇଁ ମନୋନୀତ ହୋଇଛନ୍ତି ବୋଲି ସେ କହିଥିଲେ। ୨୦୧୩ ମସିହାର ଶ୍ରେଷ୍ଠ ଛାତ୍ରୀ ଡାକ୍ତର ମନୀଷା ମହାନ୍ତି ବେଙ୍ଗାଲୁରୁ ନିମାହନ୍ସ ପ୍ରବେଶିକା ପରୀକ୍ଷାରେ ଟପର୍ ଓ ୨୦୧୪ ମସିହାର ଡାକ୍ତର ରୋଜାଲିନ୍ ପରିଡ଼ା ଦିଲ୍ଲୀ ଏମ୍ସ ପ୍ରବେଶିକା ପରୀକ୍ଷାରେ ଦ୍ବିତୀୟ ରୢାଙ୍କ ପାଇ ଭୁବନେଶ୍ବର ଏମ୍ସକୁ ଗର୍ବିତ କରିଛନ୍ତି। ଏମ୍ସ ଅଗ୍ରଗତି ସମ୍ପର୍କରେ ନିର୍ଦ୍ଦେଶିକା ପ୍ରଫେସର୍ ଗୀତାଞ୍ଜଳି କହିଲେ ଯେ ସମସ୍ତ ୪୨ବିଭାଗ କାର୍ଯ୍ୟ କରୁଛି ଓ ଧାର୍ଯ୍ୟ ୯୬୦ ଶଯ୍ୟାରୁ ଏବେ ୮୮୯ ଶଯ୍ୟା କାର୍ଯ୍ୟକ୍ଷମ ହୋଇଛି। ସେହିଭଳି ଧାର୍ଯ୍ୟ ୧୦୦ ଆଇସିୟୁ ମଧ୍ୟରୁ ୬୩ଟି କାମ କରୁଛି, ଯେଉଁଥିରେ ୨୭ଟି ଭେଣ୍ଟିଲେଟର୍ ଖଚିତ ଶଯ୍ୟା ସାମିଲ୍ ହୋଇଛି। ଅବଶିଷ୍ଟ ୩୭ ଆଇସିୟୁ କାର୍ଯ୍ୟକ୍ଷମ କରିବା ପାଇଁ ଉଦ୍ୟମ ଚାଲିଛି। ସେହିଭଳି ୨୫ମଡ୍ୟୁଲାର୍ ଓଟି ମଧ୍ୟରୁ ୧୫ଟି କାମ କରୁଛି ଓ ବାକି ୧୦ଟି ନିର୍ମାଣ ସରିଥିବା ବେଳେ କାର୍ଯ୍ୟକ୍ଷମ କରିବା ପାଇଁ ପ୍ରସ୍ତୁତି ଚାଲିଛି। ଦିନକୁ ଦିନ ଟ୍ରମା ସେଣ୍ଟର(ମାତ୍ର ୩୦ ଶଯ୍ୟା) ଉପରେ ଅଧିକ ଚାପ ପଡ଼ୁଥିବା ବେଳେ ୫୦ଶଯ୍ୟା ବିଶିଷ୍ଟ ନୂତନ ଟ୍ରମା ସେଣ୍ଟର୍ର ନିର୍ମାଣ କାମ ଚାଲିଛି ବୋଲି ସେ କହିଥିଲେ।