ଡ୍ୟାନ୍‌ସିଂ କାର୍‌ ଭିତରେ ଆଲବମ୍‌ ଅଭିନେତ୍ରୀ

ଚନ୍ଦ୍ରଶେଖରପୁର: ଭୋର୍ ପ୍ରାୟ ସାଢ଼େ ଚାରିଟା। ଇନ୍‌ଫୋସିଟି-ଚନ୍ଦକା ରାସ୍ତାରେ ଏକ ନାଲି ରଙ୍ଗର କାର୍‌ ସନ୍ଦେହଜନକ ଅବସ୍ଥାରେ ଥିବା ଦେଖି ପିସିଆର୍ ଭ୍ୟାନ୍‌ ଅଟକିଗଲା। ଦୋହଲୁଥିବା କାର୍‌ଟି ପୁଲିସ ଗାଡ଼ି ଦେଖି ନିଶ୍ଚଳ ହୋଇ ଯାଇଥିଲା। ପରେ କାର୍ ଭିତରୁ ବାହାରି ଆସିଥିଲେ ଜଣେ ଯୁବତୀ ଓ ଜଣେ ଯୁବକ। ସେମାନେ ଏକ ମନୋରଞ୍ଜନଧର୍ମୀ ଟିଭି ଚ୍ୟାନେଲ୍‌ରେ କାମ କରୁଛନ୍ତି ବୋଲି ପରିଚୟ ଦେଇଥିଲେ। ଯୁବତୀ ଜଣକ ବହୁ ଆଲବମ୍‌ର ନାୟିକା ବୋଲି ଜଣାପଡ଼ିଥିଲା। ସେମାନେ ରାତି ଡ୍ୟୁଟି ସାରି ଷ୍ଟୁଡିଓରୁ ଫେରୁଥିଲେ ବୋଲି କହିବା ସହ ଛାଡ଼ିଦେବା ପାଇଁ ନେହୁରା ହୋଇଥିଲେ। ତେବେ ପିସିଆର୍‌ କର୍ମଚାରୀମାନେ ସେମାନଙ୍କୁ ଥାନାକୁ ନେଇ ଯାଇଥିଲେ। କିଛି ସମୟ ପରେ ସେମାନଙ୍କ କାର୍ଯ୍ୟାଳୟରୁ ଜଣେ ବରିଷ୍ଠ ଅଧିକାରୀ ଥାନା ଅଧିକାରୀଙ୍କୁ ଫୋନ୍‌ କରି ସେମାନଙ୍କୁ ଛାଡ଼ିଦେବା ପାଇଁ ଅନୁରୋଧ କରିଥିଲେ। ତେଣୁ ପୁଲିସ ସେମାନଙ୍କୁ ତାଗିଦ୍‌ କରି ଛାଡ଼ିଥିଲା। ଘଟଣାଟି ଆଜି ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।