ଲୋକଙ୍କ ନିକଟତର ହେବା ପାଇଁ ଆଉ ଗୋଟିଏ ପାଦ : ‘ଆସ୍କ୍ ୟୋର୍ ସିପି’
ଭୁବନେଶ୍ବର : ସାଧାରଣ ଲୋକଙ୍କ ନିକଟତର ହେବା ପାଇଁ କମିସନରେଟ୍ ପୁଲିସ ଉଦ୍ୟମ ଅବ୍ୟାହତ ରଖିଛି। ପୁଲିସ ପ୍ରତି ସାଧାରଣ ଲୋକଙ୍କର ଥିବା ମନୋଭାବକୁ ପରିବର୍ତ୍ତନ କରିବା ପାଇଁ ସରକାରଙ୍କ ପକ୍ଷରୁ ସ୍ବତନ୍ତ୍ର କାର୍ଯ୍ୟକ୍ରମ ହୋଇଥିବା ବେଳେ ପୁଲିସ ମଧ୍ୟ ଲୋକଙ୍କର ସମସ୍ୟା ସମାଧାନ ପାଇଁ ଅଣ୍ଟା ଭିଡ଼ିଛି। ଏହି ପ୍ରୟାସରେ ପୁଲିସ କମିସନର୍ ସୁଧାଂଶୁ ଷଡ଼ଙ୍ଗୀ ଆଉ ପାଦେ ଆଗକୁ ଯାଇଛନ୍ତି। ପ୍ରଥମ ଥର ପାଇଁ ଲୋକଙ୍କ ମନରେ ରହିଥିବା ଅସମାହିତ ପ୍ରଶ୍ନର ଉତ୍ତର ଦେବାକୁ ଅଣ୍ଟା ଭିଡ଼ିଛନ୍ତି। ଆସନ୍ତା ୧୪ ତାରିଖ ସନ୍ଧ୍ୟା ୫ଟା ବେଳେ ଟ୍ବିଟର ଜରିଆରେ ସିଧାସଳଖ (ଲାଇଭ୍) ସାଧାରଣ ଲୋକଙ୍କ ପ୍ରଶ୍ନର ଉତ୍ତର ଦେବାକୁ ଘୋଷଣା କରିଛନ୍ତି। ଏଥିପାଇଁ ସାଧାରଣ ଲୋକଙ୍କ ଠାରୁ ଆଇନ ଶୃଙ୍ଖଳା, ଅପରାଧ, ଟ୍ରାଫିକ୍ ଓ ପୁଲିସ ସହ ସଂଶ୍ଳିଷ୍ଟ ଯେ କୌଣସି ପ୍ରଶ୍ନ ଆହ୍ବାନ କରିଛନ୍ତି। ଏଥିପାଇଁ ଡେଡ୍ ଲାଇନ୍ ଡିସେମ୍ବର ୧୨ ତାରିଖ ରହିଛି। ‘ଆସ୍କ୍ ୟୋର ସିପି’ ‘ହାସ୍ ଟ୍ୟାଗ୍’ ବ୍ୟବହାର କରି ଲୋକମାନେ ଧାର୍ଯ୍ୟ ଅବଧି ପୂର୍ବରୁ ପ୍ରଶ୍ନ ପଚାରି ପାରିବେ। ୧୪ ତାରିଖ ସନ୍ଧ୍ୟାରେ ପୁଲିସ କମିସନର ଟ୍ବିଟର ଜରିଆରେ ଲାଇଭ୍ ଆସି ଏହି ସବୁ ପ୍ରଶ୍ନର ଉତ୍ତର ଦେବେ।
Sambad is now on WhatsApp
Join and get latest news updates delivered to you via WhatsApp
ପ୍ରଥମ ଥର ପାଇଁ କମିସନରେଟ୍ ପୁଲିସ ପକ୍ଷରୁ ଏଭଳି ଏକ ଅଭିନବ ବ୍ୟବସ୍ଥାର ପରିକଳ୍ପନା କରାଯାଇଛି। ଆଣ୍ଡ୍ରଏଡ୍ ମୋବାଇଲ ହ୍ୟାଣ୍ଡ ସେଟ୍ ଜରିଆରେ ସହରାଞ୍ଚଳରେ ବସବାସ କରୁଥିବା ପ୍ରତ୍ୟେକ ବ୍ୟକ୍ତି ଏହାର ସୁଯୋଗ ନେଇ ପାରିବେ। ଅନେକ ସମୟରେ ସୋସିଆଲ ମିଡିଆ ଜରିଆରେ ଲୋକମାନେ ଅନେକ କଥା ଜାଣିବାକୁ ଚାହୁଁଛନ୍ତି। ଏଣୁ ଲୋକମାନଙ୍କ ମନରେ ଥିବା ଦ୍ବନ୍ଦ୍ବ ଦୂର ପାଇଁ ଏଭଳି ଏକ ଅଭିନବ ପରିକଳ୍ପନା କରାଯାଇଛି।
ଏ ନେଇ ପୁଲିସ କମିସନର୍ ଶ୍ରୀ ଷଡ଼ଙ୍ଗୀ ନିଜର ଟ୍ବିଟର ଆକାଉଣ୍ଟ ଜରିଆରେ ସୂଚନା ଦେଇଛନ୍ତି। ଏହି ସୂଚନା ମିଳିବା ପରେ ଲୋକମାନଙ୍କ ମଧ୍ୟରେ ବେଶ୍ ଉତ୍ସାହ ପରିଲକ୍ଷିତ ହୋଇଛି। ସୂଚନା ମିଳିବାର ୨ ଘଣ୍ଟା ମଧ୍ୟରେ ଲୋକମାନେ ୩୫ ପ୍ରଶ୍ନ ପଚାରିଛନ୍ତି। ଏଥିରେ ରାଜଧାନୀର ଟ୍ରାଫିକ୍ ସମସ୍ୟା ଉପରେ ସର୍ବାଧିକ ପ୍ରଶ୍ନ ରହିଛି।