ଗାଡ଼ି ସାଇଡ୍ମରାରୁ ତୁମୁଳକାଣ୍ଡ: ୩ ଜଣଙ୍କୁ ଗୋଡ଼େଇ ହାଣିଲେ
ଭୁବନେଶ୍ବର: ଗାଡ଼ି ସାଇଡ୍ମରାକୁ କେନ୍ଦ୍ର କରି ଭରତପୁର ବନଦୁର୍ଗା ସାହିରେ ଶନିବାର ରାତିରେ ୨ଗୋଷ୍ଠୀ ମଧ୍ୟରେ ରକ୍ତାକ୍ତ ସଂଘର୍ଷ ଘଟିଛି। ଗୋଟିଏ ଗୋଷ୍ଠୀର ପ୍ରାୟ ୮ରୁ ଅଧିକ ଯୁବକ ପ୍ରତିପକ୍ଷ ଗୋଷ୍ଠୀର ୪ଜଣଙ୍କୁ ଗୋଡ଼ାଇ ଗୋଡ଼ାଇ ଖଣ୍ଡା ଓ କଟୁରିରେ ଆକ୍ରମଣ କରିଛନ୍ତି। ଖଣ୍ଡା ଚୋଟରେ ବଳରାମ ବେହେରାଙ୍କ ଆଙ୍ଗୁଠି ଛିଣ୍ଡି ଯାଇଥିବା ବେଳେ ଶିବରାମ ବେହେରାଙ୍କ କାନ୍ଧରେ ଗଭୀର ଆଘାତ ଲାଗିଛି। ସେହିଭଳି ସୁବ୍ରତ ମହାରଣା ଓ ରଜତ ବେହେରା ସାମାନ୍ୟ ଆହତ ହୋଇଥିବା ଜଣାପଡ଼ିଛି। ଏହି ଘଟଣାରେ ପୁଲିସ ଜଣେ ଅଭିଯୁକ୍ତକୁ ଗିରଫ କରିଥିବା ବେଳେ ୨ ନାବାଳକଙ୍କୁ ସ୍ବଧାର ଗୃହକୁ ପଠାଇଛି। ଗିରଫ ଅଭିଯୁକ୍ତ ହେଲା, ରଂଜିତ ବିଶ୍ବାଳ। କୋର୍ଟରେ ତା’ର ଜାମିନ୍ ନାମଞ୍ଜୁର ହେବାରୁ ତାକୁ ଝାରପଡ଼ା ଜେଲ୍ ହାଜତକୁ ପଠାଇ ଦିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନାନୁଯାୟୀ, ଗୁରୁବାର ବିଳମ୍ବିତ ରାତିରେ ଗାଡ଼ି ସାଇଡ୍ମରାକୁ କେନ୍ଦ୍ର କରି ବଳରାମ ଓ ତା’ର କିଛି ସହଯୋଗୀଙ୍କ ସହ ରଂଜିତର ବଚସା ହୋଇଥିଲା। ଗତ ରାତିରେ ବଳରାମ ଗୋଷ୍ଠୀ ସାହିରେ ଛିଡ଼ା ହୋଇଥିବା ବେଳେ ରଂଜିତ ଓ ତା’ର ସହଯୋଗୀମାନେ ଖଣ୍ଡା ଓ କଟୁରିରେ ଅତର୍କିତ ଆକ୍ରମଣ କରିଥିଲେ। ଗୋଡ଼ାଇ ଗୋଡ଼ାଇ ବଳରାମ ଗୋଷ୍ଠୀର ୪ ଜଣଙ୍କୁ ଖଣ୍ଡା ଚୋଟ ପକାଇଥିଲେ। ଏହା ଦେଖି ସ୍ଥାନୀୟ ଲୋକେ ଅଭିଯୁକ୍ତମାନଙ୍କୁ କାବୁ କରିବା ସହ ପୁଲିସକୁ ଖବର ଦେଇଥିଲେ। ଭରତପୁର ଥାନା ପୁଲିସ ଘଟଣାସ୍ଥଳରେ ପହଞ୍ଚି ଆହତଙ୍କୁ ଏମ୍ସରେ ଭର୍ତ୍ତି କରାଇଥିଲା। ଏହି ଘଟଣାରେ ସଂପୃକ୍ତ ଆଉ ୫ ଅଭିଯୁକ୍ତ ଫେରାର୍ ଥିବା ଜଣାଯାଇଛି।