ପୂର୍ବତଟ ରେଳପଥକୁ ବିକଳାଙ୍ଗ କରିବାକୁ ଚକ୍ରାନ୍ତ: କେନ୍ଦ୍ର ରେଳମନ୍ତ୍ରୀଙ୍କ ଉଦ୍ଦେଶ୍ୟରେ ସିପିଆଇ(ଏମ୍‌)ର ସ୍ମାରକପତ୍ର

ଚନ୍ଦ୍ରଶେଖରପୁର: ପୂର୍ବତଟ ରେଳପଥକୁ ବିକଳାଙ୍ଗ କରିବାକୁ ଚକ୍ରାନ୍ତ ହେଉଥିବା ଅଭିଯୋଗରେ ସିପିଆଇ(ଏମ୍‌) ଓଡ଼ିଶା ରାଜ୍ୟ କମିଟିର ଏକ ପ୍ରତିନିଧି ଦଳ ଆଜି କେନ୍ଦ୍ର ରେଳମନ୍ତ୍ରୀଙ୍କ ଉଦ୍ଦେଶ୍ୟରେ ପୂର୍ବତଟ ରେଳପଥ ମହାପ୍ରବନ୍ଧକ ପରମେଶ୍ୱର ଫୁଙ୍କ୍‌ୱାଲ୍‌ଙ୍କୁ ସ୍ମାରକପତ୍ର ପ୍ରଦାନ କରିଛନ୍ତି। ସିପିଆଇ(ଏମ୍‌) ପକ୍ଷରୁ କୁହାଯାଇଛି ଯେ ବର୍ତ୍ତମାନର କେନ୍ଦ୍ର ସରକାର ପୂର୍ବତଟ ରେଳପଥ ଜୋନ୍‌ରେ ଥିବା ୱାଲଟିୟର ଡିଭିଜନକୁ ଅଲଗା କରି ଏକ କ୍ଷୁଦ୍ର ଡିଭିଜନ୍‌ରେ ପରିଣତ କରିବା ସାଙ୍ଗକୁ ଏହା ଅଧୀନସ୍ଥ ବ୍ୟାପକ ଅଞ୍ଚଳକୁ ବିଜୟୱାଡ଼ା ଡିଭିଜନରେ ମିଶାଇବାକୁ ବିଜ୍ଞପ୍ତି ଜାରି କରିଛନ୍ତି। ଏହାଦ୍ବାରା ୱାଲଟିୟର ଡିଭିଜନ୍‌ ବିଶାଖାପାଟଣାରେ ମିଶିଯିବ। ଉଭୟ ବିଶାଖାପାଟଣା ଓ ବିଜୟୱାଡ଼ା ଡିଭିଜନ୍‌କୁ ଗୁଣ୍ଟୁର ଓ ଗୁଣ୍ଟକଲ୍‌ ଡିଭିଜନ ସହ ଦକ୍ଷିଣତଟ ରେଳପଥ ଜୋନ୍ ଅଧୀନରେ ରହିଛି। ପୂର୍ବତଟ ରେଳପଥ ଜୋନ୍‌ର ୪୫୦ କିମି ରେଳପଥ ଯେଉଁଥିରେ ବିଜୟନଗରମ୍‌, ବିଶାଖାପାଟଣା ଭଳି ଗୁରୁତ୍ୱପୂର୍ଣ୍ଣ ସ୍ଥାନ, ଇସ୍ପାତ ନଗରୀ, ବନ୍ଦର ଓ କର୍ପୋରେଟ୍ ଅଫିସ୍‌ ରହିଛି। ଏହି ରେଳପଥ ମଧ୍ୟ ଦେଇ ବାର୍ଷିକ ୧୦ ହଜାର କୋଟି ଟଙ୍କାରୁ ଊର୍ଦ୍ଧ୍ୱ ରାଜସ୍ୱ ଆୟ କରୁଥିବା ଅଞ୍ଚଳ ବାଦ୍ ପଡ଼ିଛି।

ଯଦି କେନ୍ଦ୍ର ସରକାର ଓ ରେଳମନ୍ତ୍ରୀ ଆନ୍ଧ୍ରପ୍ରଦେଶ ସ୍ୱାର୍ଥକୁ ଦୃଷ୍ଟିରେ ରଖି ରାଜ୍ୟଭିତ୍ତିକ ରେଳବାଇ ଜୋନ୍ ପ୍ରତିଷ୍ଠା କରିବାକୁ ନିଷ୍ପତ୍ତି ନେଇଛନ୍ତି ତେବେ ଦକ୍ଷିଣ ପୂର୍ବ, ଦକ୍ଷିଣ ପୂର୍ବ କେନ୍ଦ୍ରୀୟ ରେଳପଥ ମଧ୍ୟରେ ଥିବା ଓଡ଼ିଶାର ଯୋଡ଼ା, ବଡ଼ବିଲ, କେନ୍ଦୁଝରଜିଲ୍ଲା, ରାଉରକେଲା, ବନ୍ଧମୁଣ୍ଡା, ରାଜଗାଙ୍ଗପୁରଠାରୁ ଝାରସୁଗୁଡ଼ା, ଇବ୍‌, ବେଲପାହାଡ଼, ବ୍ରଜରାଜନଗର, ବାଲେଶ୍ୱର ଓ ମୟୂରଭଞ୍ଜ ଜିଲ୍ଲାକୁ ପୂର୍ବତଟ ରେଳପଥ ଜୋନ୍ ମଧ୍ୟକୁ ଆଣାଯାଉ। ନ ହେଲେ ସିପିଆଇ(ଏମ୍‌) ଆନ୍ଦୋଳନକୁ ଓହ୍ଲାଇବ ବୋଲି ରାଜ୍ୟ ସମ୍ପାଦକ ସୁରେଶ ଚନ୍ଦ୍ର ପାଣିଗ୍ରାହୀ, ରାଜ୍ୟ ସମ୍ପାଦକମଣ୍ଡଳୀ ସଭ୍ୟ ଦୁଷ୍ମନ୍ତ କୁମାର ଦାସ, ପୁଷ୍ପା ଦାଶ ପ୍ରମୁଖ କହିଛନ୍ତି।