ବାଲିଅନ୍ତା: ମଙ୍ଗଳବାର ସକାଳେ ବେଣ୍ଟପୁର-ବାଲିପାଟଣା ମୁଖ୍ୟ ରାସ୍ତାର ଖମଙ୍ଗବଜାର ନିକଟରେ ଏକ ଅଟୋ ନିୟନ୍ତ୍ରଣ ହରାଇ ହଠାତ୍‌ ଓଲଟିପଡ଼ିବାରୁ ଘଟଣାସ୍ଥଳରେ ୩ଜଣ ମାଟ୍ରିକ୍‌ ପରୀକ୍ଷାର୍ଥୀ ଆହତ ହୋଇଥିବା ଜଣାପଡ଼ିଛି। ଆହତ ଛାତ୍ରୀମାନେ ହେଲେ ବାଲିଅନ୍ତା ଥାନା କାକରୁଦ୍ରପୁର ଗ୍ରାମର ଗଙ୍ଗା ଭୋଇ, ରୂପାଲି ମୁଦୁଲି ଓ ସସ୍ମିତା ଖୁଣ୍ଟିଆ। ପାଟିଶୁଣି ସ୍ଥାନୀୟ ଲୋକନ ସେଠାରେ ପହଞ୍ଚି ଛାତ୍ରୀମାନଙ୍କୁ ଉଦ୍ଧାର କରିଥିବା ବେଳେ ଅଭିଭାବକମାନେ ପିଲାଙ୍କୁ ବାଇକ୍‌ରେ ପରୀକ୍ଷା କେନ୍ଦ୍ରକୁ ନେଇଯାଇଥିବା ଜଣାପଡ଼ିଛି। ପ୍ରାପ୍ତ ସୂଚନାନୁଯାୟୀ ଏହି ଅଟୋରେ ମୋଟ ୮ଜଣ ମାଟ୍ରିକ୍‌ ପରୀକ୍ଷାର୍ଥୀ ପରୀକ୍ଷା ଦେବାକୁ ଭିଙ୍ଗାରପୁର ସ୍ଥିତ ଶ୍ରୀ ବକ୍ରେଶ୍ୱର ହାଇସ୍କୁଲକୁ ଯାଉଥିଲେ। ନିକଟରେ ନିର୍ମିତ ହୋଇଥିବା ଏହି ରାସ୍ତାକାମ ଅତ୍ୟନ୍ତ ନିମ୍ନମାନର ହୋଇଥିବା ବେଳେ ଉଭୟ ପାର୍ଶ୍ୱ ରାସ୍ତାରୁ ମୋରମ ଉଠିଯାଇ ଏବେ ବଡ଼ବଡ଼ ଖାଲ ସୃଷ୍ଟି ହୋଇଛି। ଫଳରେ ଏହି ରାସ୍ତାରେ ଯାଉଥିବା ବାଇକ୍‌ ଓ ଭାରୀଜାନ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହେଉଥିବା ସ୍ଥାନୀୟ ଲୋକେ କହିଛନ୍ତି।