ଭୁବନେଶ୍ବର: କୋଟି କୋଟି ଟଙ୍କା ସମ୍ପତ୍ତିର ମାଲିକ ଏକାମ୍ର କ୍ଷେତ୍ରାଧିପତି ପ୍ରଭୁ ଲିଙ୍ଗରାଜ। ହେଲେ ଠାକୁରଙ୍କ ଅନେକ ଜମି ଜବରଦଖଲରେ ରହିଛି। ମନ୍ଦିରରୁ ଆୟ ଲକ୍ଷାଧିକ ଟଙ୍କା ବାଟମାରଣା ହେଉଛି। ଏହାର ପ୍ରଭାବ ଠାକୁରଙ୍କ ନୀତିକାନ୍ତି ଉପରେ ପଡ଼ୁଛି। କେମିତି ବଢ଼ିବ ପ୍ରଭୁ ଲିଙ୍ଗରାଜଙ୍କ ଆୟ? କେବେ ଜବରଦଖଲ ମୁକ୍ତ ହେବ ଦିଅଁଙ୍କ ସମ୍ପତ୍ତି? ମନ୍ଦିରରେ ବାଟମାରଣା ହେଉଥିବା ଲକ୍ଷାଧିକ ଟଙ୍କା କେମିତି ଠାକୁରଙ୍କ ସେବାରେ ଲାଗିବ? କିପରି ଶୃଙ୍ଖଳିତ ହେବ ନୀତିକାନ୍ତି? ଏନେଇ ବାବୁଙ୍କ ଚିନ୍ତା ନାହିଁ। କେବଳ କାମଚଳା ଭାବେ ଦାୟିତ୍ବ ନିର୍ବାହ କରୁଛନ୍ତି। ଫଳରେ ମନ୍ଦିରରୁ ଆୟ ହେଉଥିବା ଲକ୍ଷାଧିକ ଟଙ୍କା ଦିଅଁଙ୍କ ସେବାରେ ଲାଗିବା ବଦଳରେ ନିର୍ଦ୍ଦିଷ୍ଟ ଗୋଷ୍ଠୀଙ୍କ ଆକାଉଣ୍ଟରେ ଜମା ହେଉଛି। 

Advertisment

ପ୍ରଭୁ ଲିଙ୍ଗରାଜଙ୍କ ଏକର ଏକର ସମ୍ପତ୍ତି ଜବରଦଖଲରେ ରହିଛି। ମହାପ୍ରଭୁଙ୍କ ଅନେକ ଜମି ଉପରେ କବ୍‌ଜା କରିଛି ବିଭିନ୍ନ ସରକାରୀ ବିଭାଗ। କେଉଁଠି ସେବାୟତ ତ ଆଉ କେଉଁଠି କ୍ଷମତାଶାଳୀଙ୍କ ଦଖଲରେ ଲିଙ୍ଗରାଜଙ୍କ ଜମି ରହିଛି। ପର୍ଯ୍ୟଟକଙ୍କ ଗାଡ଼ି ପାର୍କିଂରୁ ଆ‌ୟ ହେଉଥିବା ଅର୍ଥ ବିଏମ୍‌ସି ଆକାଉଣ୍ଟକୁ ଯାଉଛି। ଜୋତା ଷ୍ଟାଣ୍ଡ ଟଙ୍କାର ମଧ୍ୟ ହିସାବ ନାହିଁ। କେବଳ ଦାଣ୍ଡ ନିଲାମ, ହାଟ, ନଡ଼ିଆ ଭୋଗ ଟୋକନ୍‌ ଭଳି ସ୍ବଳ୍ପ ଆୟରେ ଚାଲିଛି ଲିଙ୍ଗରାଜଙ୍କ ନୀତିକାନ୍ତି। ଓଡ଼ିଶାର ପ୍ରସିଦ୍ଧ ଓ ପୁରାତନ ଶୈବପୀଠ ହୋଇ ମଧ୍ୟ ଏଠି ବର୍ଷର ଅଧିକାଂଶ ସମୟରେ ନୀତିକାନ୍ତି ଠିକ୍‌ ଭାବେ ହୋଇପାରୁନାହିଁ। ସେବାୟତଙ୍କ ବିବାଦ ପାଇଁ ଦିନ ଦିନ ଧରି ଦିଅଁ ଭୋକ ଉପାସରେ ରହୁଛନ୍ତି। ଧୀରେ ଧୀରେ ଲିଙ୍ଗରାଜଙ୍କ ସେବା ବନ୍ଦ ହେଉଛି। ଏ ବାବଦରେ ମନ୍ଦିର ପ୍ରଶାସନ କିମ୍ବା ସରକାରୀସ୍ତରରେ ଚିନ୍ତା କରାଯାଉ ନାହିଁ କହିଲେ ଚଳେ। କାରଣ ଏ ପର୍ଯ୍ୟନ୍ତ ଶ୍ରୀମନ୍ଦିର ପରି ଲିଙ୍ଗରାଜ ମନ୍ଦିର ପାଇଁ ସ୍ବତନ୍ତ୍ର ଆଇନ ଅଣାଯାଇ ପାରୁନାହିଁ। ‌ମୌଖିକ ଭାବେ କିଛି ନୀତି ନିୟମ ଥିଲେ ମଧ୍ୟ ଏହାକୁ ଅବମାନନା କରାଯାଉଥିବାରୁ ନାନା ସମସ୍ୟାରେ ଘାଣ୍ଟି ହେଉଛନ୍ତି ପ୍ରଭୁ ଲିଙ୍ଗରାଜ। 

ପ୍ରତିଦିନ ଆଦାୟ ହେଉଛି ଲକ୍ଷାଧିକ ଟଙ୍କା 
ଠାକୁରଙ୍କ ସେବାରେ ଲାଗିପାରୁନି
ଆଡ଼କାଠ ନିକଟରୁ ଉଠୁନି ଟେବୁଲ ଓ ଥାଳି 
ଦିଅଁ ଦର୍ଶନରେ ବାଧକ ସାଜୁଛି

ନିକଟରେ ମହାଶିବରାତ୍ରି ପୂର୍ବରୁ ସେବାୟତଙ୍କ ଭିତରେ ଦେଖା ଯାଇଥିବା ବିବାଦକୁ ଖୋଦ୍‌ ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ ସମାଧାନ କରିଥିଲେ। ଜାଗର ସରିବାର ସପ୍ତାହ ମଧ୍ୟରେ ସେବାୟତଙ୍କ ବିବାଦର ସମାଧାନ କରିବା ନେଇ ଆଇନମନ୍ତ୍ରୀ ପ୍ରତିଶ୍ରୁତି ଦେଇଥିଲେ। କିନ୍ତୁ ଏପର୍ଯ୍ୟନ୍ତ ସମାଧାନ ହୋଇନଥିବାରୁ ପୂଜାପଣ୍ଡା ନିଯୋଗ ଟ୍ରଷ୍ଟବୋର୍ଡ ସଭାପତିଙ୍କ ସମେତ ଆଇନମନ୍ତ୍ରୀ, ବିଭାଗୀୟ ସଚିବ, ଦେବୋତ୍ତର କମିସନର ଓ ମନ୍ଦିର କାର୍ଯ୍ୟନିର୍ବାହୀ ଅଧିକାରୀଙ୍କୁ ଚିଠି ଲେଖିଛି। ଆସନ୍ତା ଏପ୍ରିଲ ୫ ତାରିଖ ରୁକୁଣା ରଥଯାତ୍ରା ପୂର୍ବରୁ ସମସ୍ୟାର ସମାଧାନ ନହେଲେ ପୂଜାପଣ୍ଡା ନିଯୋଗ ଅସହଯୋଗ କରିବ ବୋଲି ଚେତାବନୀ ଦେଇଛନ୍ତି। 

ପୂଜାପଣ୍ଡା ନିଯୋଗର ଅଭିଯୋଗ ହେଲା ୧୯୯୮ ମସିହାରେ ସହକାରୀ ଦେବୋତ୍ତର କମିସନର ତଦନ୍ତ କରି ଆଡ଼କାଠ ନିକଟରେ ଏକ ହୁଣ୍ଡି ସ୍ଥାପନ କରିବାକୁ ଟ୍ରଷ୍ଟ ବୋର୍ଡକୁ ନିର୍ଦ୍ଦେଶ ଦେଇଥିଲେ। ୨୦୨୪ ମସିହ‌ାରେ ମଧ୍ୟ ସହକାରୀ ଦେବୋତ୍ତର କମିସନର ମନ୍ଦିର କାର୍ଯ୍ୟନିର୍ବାହୀ ଅଧିକାରୀଙ୍କୁ ଚିଠି ଲେଖି କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଥିଲେ। ହେଲେ ମନ୍ଦିର ଆଡ଼କାଠ ନିକଟରୁ ବେଆଇନ ଟଙ୍କାଥାଳିକୁ ଟ୍ରଷ୍ଟ ବୋର୍ଡ ଉଠାଇଲା ନାହିଁ। ସାହାଣମେଲା ଦର୍ଶନ ସମୟରେ ଗର୍ଭଗୃହ ଭିତରେ ବଡ଼ୁ ସେବାୟତ ଟେବୁଲ୍‌‌ ପକାଇ ଥାଳି ରଖୁଛନ୍ତି। ସାହାଣମେଲା ସରିବା ପରେ ଆଡ଼କାଠ ପାଖରେ ଟେବୁଲ୍‌ ଓ ଥାଳି ରହୁଛି। ଯାହାଦ୍ବାରା ଶ୍ରଦ୍ଧାଳୁ ଠିକ୍‌ ଭାବେ ଦିଅଁଙ୍କ ଦର୍ଶନ କରିପାରୁନାହାନ୍ତି। ଏନେଇ ପୂଜାପଣ୍ଡା ନିଯୋଗ ସମ୍ପାଦକ କହିଛନ୍ତି, ବେଢ଼ାରେ ଥିବା ଅଧିକାଂଶ ମନ୍ଦିରରେ ବାହାରୁ ପୂଜକମାନଙ୍କୁ ଆଣି ବଡ଼ୁ ସେବାୟତ ଥାଳି ପକାଉଛନ୍ତି। ମନ୍ଦିର ଭିତରେ ମଧ୍ୟ ବେଆଇନ ଭାବେ ଥାଳି ରଖାଯାଇ ଦୈନିକ ୫୦ ହଜାରରୁ ଦେଢ଼ ଲକ୍ଷ ଟଙ୍କା ପର୍ଯ୍ୟନ୍ତ ଆଦାୟ କରୁଛନ୍ତି। ତେବେ ଆଡ଼କାଠ ପାଖରେ ସେମାନେ ପକାଉଥିବା ବେଆଇନ ଥାଳିକୁ ଉଠାଯାଇ ସେଠାରେ ହୁଣ୍ଡି ବସାଯାଉ। ଫଳରେ ମନ୍ଦିରରୁ ଆୟ ହେଉଥିବା ଟଙ୍କା ଦିଅଁଙ୍କ ସେବାରେ ଲାଗିବ। ଏନେଇ ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ତଥା ଅତିରିକ୍ତ ଜିଲ୍ଲାପାଳ ରୁଦ୍ର ମହାନ୍ତି କହିଛନ୍ତି, ବହୁ ବର୍ଷ ହେବ ବଡ଼ୁ ସେବାୟତ ଥାଳି ପକାଉଛନ୍ତି। ହେଲେ ସେଥିରୁ ହେଉଥିବା ଆ‌ୟ ମନ୍ଦିରକୁ ଆସୁନାହିଁ। ଏ ସମ୍ପର୍କରେ ଆଲୋଚନା କରାଯାଇ ନିଷ୍ପତ୍ତି ନିଆଯିବ।