ଘଣ୍ଟାକ ପୂର୍ବରୁ ରାଜଧାନୀ ନୋ-ଫ୍ଲାଇଙ୍ଗ ଜୋନ୍
ଆଜି ଆସୁଛନ୍ତି ପ୍ରଧାନମନ୍ତ୍ରୀ, ଅପରାହ୍ଣରେ କାରକେଡ୍ର ରହିର୍ସାଲ
ଭୁବନେଶ୍ବର: ଭୁବନେଶ୍ବର ଆକାଶ ହେବ ନୋ- ଫ୍ଲାଇଙ୍ଗ୍ ଜୋନ୍। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭୁବନେଶ୍ବର ବିମାନବନ୍ଦରରେ ପହଞ୍ଚିବାର ଏକ ଘଣ୍ଟା ପୂର୍ବରୁ କୌଣସି ଘରୋଇ ବିମାନକୁ ଭୁବନେଶ୍ବର ଓହ୍ଲାଇ ଦିଆଯିବ ନାହିଁ କିମ୍ବା ଏଠାରୁ କୌଣସି ବିମାନ ରାଜ୍ୟ ବାହାରକୁ ଯାଇପାରିବ ନାହିଁ। ସେହିପରି କେହି ବି ବିମାନବନ୍ଦର, ଜଟଣୀ ଅରଗୁଳ ଓ ଖୋର୍ଧାସ୍ଥଳ ପାଖାପାଖି ଡ୍ରୋନ୍ ଉଡ଼ାଇ ପାରିବେ ନାହିଁ। ପ୍ରଧାନମନ୍ତ୍ରୀଙ୍କ ଓଡ଼ିଶା ଗସ୍ତ ପାଇଁ ଏସ୍ପିଜି ପକ୍ଷରୁ ଏଭଳି କଡ଼ା ସୁରକ୍ଷା ପଦକ୍ଷେପ ଗ୍ରହଣ କରାଯାଇଛି। ଏହାଛଡ଼ା ପ୍ରଧାନମନ୍ତ୍ରୀ ଆସିବାର ୪ ଘଣ୍ଟା ପୂର୍ବରୁ ଦିଲ୍ଲୀରୁ ଭୁବନେଶ୍ବର ସମେତ ପଡ଼ୋଶୀ ରାଜ୍ୟର ଆକାଶ ସୀମା ଉପରେ ବାୟୁସେନା ପକ୍ଷରୁ କଡ଼ା ନଜର ରଖାଯିବ। ଏ ନେଇ ବାୟୁସେନା ଓ କେନ୍ଦ୍ରୀୟ ଗୁଇନ୍ଦା ବିଭାଗ ରୀତିମତ ଏସ୍ପିଜି ସହ ଯୋଗାଯୋଗ କରୁଛନ୍ତି। ପୁଲିସ ଡିଜି ରାଜେନ୍ଦ୍ର ପ୍ରସାଦ ଶର୍ମା କହିଛନ୍ତି, ପ୍ରଧାନମନ୍ତ୍ରୀଙ୍କ ସୁରକ୍ଷା ଦାୟିତ୍ବରେ ବିମାନବନ୍ଦର, ଜଟଣୀ ଅରଗୁଳ, ଖୋର୍ଧାର ବରୁଣେଇରେ ୩ ଜଣ ଏସ୍ପିଜି ଆଇଜି ସୁରକ୍ଷା ଦାୟିତ୍ବରେ ରହିବେ। ପ୍ରଧାନମନ୍ତ୍ରୀଙ୍କ ରୁଟ ଲାଇନ୍ରେ ମଧୢ ଜଣେ ଏସ୍ପିଜି ଆଇଜି ରହିବେ। ପ୍ରଧାନମନ୍ତ୍ରୀଙ୍କ କାରକେଡ୍କୁ ବାହ୍ୟ ସୁରକ୍ଷା ଦେବା ପାଇଁ କମିସନରେଟ୍ ପୁଲିସ ଛଡ଼ା ୨ କମ୍ପାନି ସଶସ୍ତ୍ର ସିଆରପିଏଫ୍, ୫ ୟୁନିଟ-ଏସ୍ଓଜି ଏବଂ ଓସାଫ ଯବାନ ପ୍ରସ୍ତୁତ ରହିବେ। ରାଜ୍ୟର ପାଖାପାଖି ୭ଜଣ ବଛାବଛା ଆଇପିଏସ୍ଙ୍କୁ ପ୍ରଧାନମନ୍ତ୍ରୀଙ୍କ ସୁରକ୍ଷା ଦାୟିତ୍ବ ନ୍ୟସ୍ତ ହୋଇଛି। ଅନ୍ୟପକ୍ଷରେ ଆଜି ଅପରାହ୍ଣରେ ପ୍ରଧାନମନ୍ତ୍ରୀ କାରକେଡ୍ର ରହିର୍ସାଲ କରାଯାଇଛି। ପ୍ରଧାନମନ୍ତ୍ରୀଙ୍କ ଡମି କାର ଓ କାରକେଡ୍ ବିମାନବନ୍ଦରରୁ ବାହାରି ସିଧା ଜଟଣୀ ଅରଗୁଳକୁ ଯାଇଥିଲା। କାରକେଡ୍ ଯିବା ରାସ୍ତାକୁ ୨୫ମିନିଟ ପୂର୍ବରୁ ନୋ-ମ୍ୟାନ୍ ଜୋନ୍ ଭାବେ ଘୋଷଣା କରାଯାଇ ପରୀକ୍ଷା କରାଯାଇଥିଲା। ଏଥିପାଇଁ ବିମାନବନ୍ଦରରରୁ ଜଟଣୀ ଅରଗୁଳ ପର୍ଯ୍ୟନ୍ତ ରାସ୍ତାର ବିଭିନ୍ନ ଛକରେ ପୁଲିସ ଫୋର୍ସ ମୁତୟନ ହୋଇଥିଲେ। ପ୍ରଧାନମନ୍ତ୍ରୀଙ୍କ ଗାଡ଼ିର ସବା ଆଗରେ ଆଡ୍ଭାନ୍ସ ପାଇଲଟ୍, ତା’ ପଛକକୁ ଟେକ୍ନିକାଲ୍ କାର୍(ଯେଉଁଥିରେ ଏସ୍ପିଜି, ଜାମର୍ ଓ ବମ୍ ଡିସପୋଜାଲ୍ ସ୍କ୍ବାଡ୍ ରହିବ), ଏହା ପରେ ପାଇଲଟ୍, ଭିଆଇପି, ଭିଭିଆଇପି କାର୍, ଏସକର୍ଟ-୧, ଏସକର୍ଟ-୨, ଏସକର୍ଟ-୩, ସ୍ପେୟାର କାର୍, ଏହା ପଛକୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର କର୍ମଚାରୀଙ୍କ ଗାଡ଼ି, ମୁଖ୍ୟ ଶାସନ ସଚିବ, ଗୃହ ସଚିବ, ପୁଲିସ ଡିଜି, ଆମ୍ବୁଲାନ୍ସ, ଅଗ୍ନିଶମ ଗାଡ଼ି ଆଦି ଥିଲା। ଆଜିର କାରକେଡ୍ ରିହର୍ସାଲରେ ପୁଲିସ ଡିଜି ଶ୍ରୀ ଶର୍ମା, ପୁଲିସ କମିସନର ସତ୍ୟଜିତ୍ ମହାନ୍ତି, କେନ୍ଦ୍ରାଞ୍ଚଳ ଆଇଜି ସୌମେନ୍ଦ୍ର ପ୍ରିୟଦର୍ଶୀ, ଡିସିପି ଅନୁପ ସାହୁ, କେନ୍ଦ୍ର ଓ ରାଜ୍ୟର ଗୁଇନ୍ଦା ଅଧିକାରୀ, ଏସ୍ପିଜି ଟିମ୍ ପ୍ରମୁଖ ସାମିଲ ହୋଇଥିଲେ।
Sambad is now on WhatsApp
Join and get latest news updates delivered to you via WhatsApp
ଟ୍ରାଫିକ୍ ବ୍ୟବସ୍ଥାର ଅନୁଧୢାନ
ଆଜି ଦିନତମାମ କମିସନରେଟ୍ ପୁଲିସ ପକ୍ଷରୁ ଟ୍ରାଫିକ୍ ବ୍ୟବସ୍ଥାର ଅନୁଧୢାନ କରାଯାଇଛି। ଜଟଣୀ ନିକଟରେ ଟ୍ରାଫିକ୍ ସମସ୍ୟାର ମୁକାବିଲା ପାଇଁ ପୁଲିସ ପକ୍ଷରୁ ପ୍ରସ୍ତୁତି ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିମାନବନ୍ଦର ଗସ୍ତ ସମୟରେ ଯେପରି ଟ୍ରାଫିକ୍ ସମସ୍ୟା ସୃଷ୍ଟି ନ ହୁଏ, ସେ ନେଇ ଆଜି କମିସନରେଟ୍ ପୁଲିସ ମୁଖ୍ୟାଳୟରେ ଏକ ବୈଠକ ଅନୁଷ୍ଠିତ ହୋଇଥିଲା।