ବରମୁଣ୍ଡା ବସ୍‌ଷ୍ଟାଣ୍ଡ: କଲବଲ ହେଉଛନ୍ତି ଯାତ୍ରୀ

ଖଣ୍ଡଗିରି: ଡ୍ରାଇଭର୍‌ଙ୍କ ଧର୍ମଘଟ ତୃତୀୟ ଦିନରେ ପହଞ୍ଚିଛି। ଇତିମଧ୍ୟରେ ବରମୁଣ୍ଡା ବସ୍‌ଷ୍ଟାଣ୍ଡ୍‌ରେ ବିକଳ ପରିସ୍ଥିତି ଉପୁଜିଛି। ଘରୋଇ ବସ୍‌ ଚଳାଚଳ ଠପ୍‌ ହୋଇଯିବା ଫଳରେ ଦୂରଦୂରାନ୍ତକୁ ଯିବାକୁ ଥିବା ଯାତ୍ରୀମାନେ କଲବଲ ହେଉଛନ୍ତି। କିଏ ଡାକ୍ତରଖାନା ଆସି ଘରକୁ ଫେରିପାରୁନି ତ କିଏ ବାପାଙ୍କ ଦେହାନ୍ତ ଖବର ପାଇ ମଧ୍ୟ ଘରକୁ ଯାଇପାରୁନି। ଏଭଳି ସ୍ଥିତିରେ ସରକାରୀ ବସ୍‌ରେ ଯିବା ପାଇଁ ପ୍ରବଳ ଭିଡ଼ ହେଉଛି। ଧନୀକ ଶ୍ରେଣୀର ବ୍ୟକ୍ତିବିଶେଷ କାର୍‌ ଓ ଅଟୋ ଭଡ଼ା କରି ଗନ୍ତବ୍ୟ ସ୍ଥଳକୁ ଯାଉଥିବା ସମୟରେ ଗରିବ ‌ବର୍ଗର ଲୋକମାନେ ଅଧିକ ଭଡ଼ା ଦେବାକୁ ଅକ୍ଷମତା ପ୍ରକାଶ କରିଛନ୍ତି। ବସ୍‌‌ଷ୍ଟାଣ୍ଡ୍‌ ନିକଟରେ ବସି ରହି ଡ୍ରାଇଭର୍‌ଙ୍କୁ କାକୁତିମିନତି ହେଉଛନ୍ତି। ଡ୍ରାଇଭର୍‌ଙ୍କ ଧର୍ମଘଟର ପ୍ରତ୍ୟକ୍ଷ ପ୍ରଭାବ ସାଧାରଣ ନାଗରିକଙ୍କ ସ୍ବାସ୍ଥ୍ୟ, ଶିକ୍ଷା ଓ ଜୀବୀକା ଉପରେ ପଡ଼ିଛି।

କରଞ୍ଜିଆ ଯିବାକୁ ବସ୍‌ଷ୍ଟାଣ୍ଡ୍‌ରେ ଅପେକ୍ଷା କରିଥିବା ସୁନାରାମ ବିଶ୍ବାଳ କୁହନ୍ତି, ୬ ତାରିଖ ଦିନ ରଥଯାତ୍ରା ପାଇଁ ପୁରୀ ଆସିଥିଲି। ଗତକାଲିଠାରୁ ପୁରୀରୁ ଫେରି ଭୁବନେଶ୍ବରରେ ଅଛି। ଡ୍ରାଇଭର୍‌ଙ୍କ ଧର୍ମଘଟ ଯୋଗୁ ବସ୍‌ ଚଳାଚଳ କରୁନଥିବାରୁ ଘରକୁ ଯାଇପାରୁନି। ବସ୍ କଣ୍ଡକ୍ଟର୍‌ଙ୍କୁ କହିଲେ ମଧ୍ୟ ସେ ଶୁଣୁନାହାନ୍ତି। ସେହିପରି ଶୈଳଶ୍ରୀବିହାରରେ ରହୁଥିବା ଅଶୋକ ସେଠୀ ନିଜ ପରିବାର ସହ ଗଞ୍ଜାମ ଯିବାକୁ ବସ୍‌ଷ୍ଟାଣ୍ଡ୍‌କୁ ଅଟୋଭଡ଼ା କରି ଆସିଥିଲେ। ମାତ୍ର ବସ୍‌ ଚଳାଚଳ ହେଉନଥିବାରୁ ବୃଥାରେ ଅଟୋଭଡ଼ା ଗଣିଥିବା ସେ କହିଛନ୍ତି। ଅନୁରୂପ ଭାବେ ବସ୍‌ ଯୋଗେ ନିୟମିତ ଔଷଧ, ସାମଗ୍ରୀ ପଠାଉଥିବା ‌ଲୋକମାନେ ହଇରାଣରେ ପଡ଼ୁଛନ୍ତି। କୋଲକାତା ବସ୍‌ ପାଇଁ ଟିକେଟ କାଟୁଥିବା ଜଣେ କଣ୍ଡକ୍ଟର୍‌ କହିଛନ୍ତି ଯେ ବଡ଼କଷ୍ଟରେ ଲୁଚାଛପାରେ ଯିବାକୁ ପଡ଼ୁଛି। ଅଧାବାଟରେ ବସ୍‌ ଅଟକି ଯିବାର ଆଶଙ୍କା ମଧ୍ୟ ରହୁଛି। ଯାତ୍ରୀମାନେ ବାଧ୍ୟ କରିବା ଫଳରେ ଗାଡ଼ି ନେଉଛୁ ବୋଲି କଣ୍ଡକ୍ଟର୍‌ ଜଣକ କହିଛନ୍ତି। ଅନୁରୂପ ଭାବେ ବସ୍‌ଷ୍ଟାଣ୍ଡ୍‌ ସମ୍ମୁଖରେ ଥିବା ଅଟୋଚାଳକଙ୍କ ଦୁଃଖ ବଢ଼ିବାରେ ଲାଗିଛି। ଯାତ୍ରୀ ନଆସିବା ଫଳରେ ଗାଡ଼ି ଭଡ଼ା ଯାଉନାହିଁ। ଦିନତମାମ ଷ୍ଟାଣ୍ଡ୍‌ରେ ଗାଡ଼ି ରଖି ସମୟ ଯାଉଛି। କେବଳ ସରକାରୀ ବସ୍‌ରେ ଆସୁଥିବା ଯାତ୍ରୀଙ୍କୁ ନେଉଛୁ ବୋଲି ‌ଜଣେ ଅଟୋ ଡ୍ରାଇଭର୍‌ କହିଛନ୍ତି।