ମେଡିଆନ୍‌ରେ ପିଟିହେଲା ବାଇକ୍‌ ଉପରେ ଓଲଟିଲା: ବାଇକ୍‌ ଆରୋହୀ ମୃତ, ୬ ଗୁରୁତର

ଧଉଳି: ଆଜି ସନ୍ଧ୍ୟା ସାଢେ ୫ଟା ସମୟରେ ଭୁବନେଶ୍ୱର-ପୁରୀ ଜାତୀୟ ରାଜପଥର ସିଫା ମୁଖ୍ୟଗେଟ୍‌ରେ ଭୁବନେଶ୍ୱରରୁ ପୁରୀ ଅଭିମୁଖେ ଯାଉଥିବା ଏକ ଦ୍ରୁତଗାମୀ କାର୍‌ ଭାରସାମ୍ୟ ହରାଇ ମେଡିଆନ୍‌ରେ ପିଟିହୋଇ ଏକ ଚଳନ୍ତା ବାଇକ ଉପରେ ଓଲଟିପଡିଥିଲା। ଏଥିରେ ବାଇକ୍‌ଆରୋହୀଙ୍କ ମୃତ୍ୟୁ ଘଟିଛି। ମୃତ ବାଇକ୍‌ଆରୋହୀ ହେଲେ ଜଗତସିଂହପୁରଜିଲ୍ଲା ବାଲିକୁଦା ଥାନା ସରଣା ଗ୍ରାମର ପ୍ରବୀର କୁମାର  ସ୍ୱାଇଁ ( ୩୫) l ସେହିପରି କାର୍‌ଚାଳକ ସମେତ କାର ଭିତରେ ଥିବା ୬ ଜଣ ଯୁବକ ଗୁରୁତର ଆହତ ହୋଇଛନ୍ତିl ସ୍ଥାନୀୟ ଲୋକେସମସ୍ତ ମୃତାହତଙ୍କୁ ଉଦ୍ଧାର କରି କ୍ୟାପିଟାଲ୍‌ ହସ୍ପିଟାଲ୍‌ ପଠାଇ ଥିଲେ। ହେଲେ ଡାକ୍ତର ପ୍ରବୀରକୁ ସେଠାରେ ମୃତ ଘୋଷଣା କରିଥିଲେ l 

ସୂଚନାନୁସାରେ ପ୍ରବୀର ସିଫାର ଜଣେ ଅସ୍ଥାୟୀ କର୍ମଚାରୀ। ଏଠାରେ ସେ ପରିବାର ସହ ରହୁଛନ୍ତି। ଆଜି ସେ କାମ ସାରି ବାଇକ୍‌ରେ ଘରକୁ ଯାଉଥିବା ବେଳେ ସିଫା କଟ୍‌ ନିକଟରେ ଭୁବନେଶ୍ୱରରୁ ପୁରୀ ଅଭିମୁଖେ ଯାଉଥିବା କାର ନିୟନ୍ତ୍ରଣ ହରାଇ ମେଡିଆନ୍‌ରେ ପିଟି ହୋଇ ୨ ଗଡା଼ ମାରି ପ୍ରବୀରଙ୍କ ବାଇକକୁ ଧକ୍କା ଦେଇଥିଲା। ଫଳରେ ପ୍ରବୀର ଘଟଣାସ୍ଥଳରେ ମୃତ୍ୟୁବରଣ କରିଥିଲେ। କାର ଭିତରେ ଚାପି ହୋଇ ଯୁବକମାନେ ଆହତହୋଇଥିଲେ। ଆହତ ଯୁବକମାନଙ୍କ ପରିଚୟ ମିଳିପାରିନଥିବା ବେଳେ ସେମାନେ ସମସ୍ତେ ଭୁବନେଶ୍ୱରର ଓ ଶ୍ରୀଜଗନ୍ନାଥ ଦର୍ଶକ ପାଇଁ ପୁରୀ ଯାଉଥିବା ଜଣାପଡିଛି। କୌଶଲ୍ୟାଗଙ୍ଗ ଫାଣ୍ଡି ପୁଲିସ ଦୁର୍ଘଟଣାଗ୍ରସ୍ତ କାର୍‌ ଓ ବାଇକ୍‌ ଜବତ କରିଛି।