ଭୁବନେଶ୍ବର: ଆୟ ବହିର୍ଭୂତ ସମ୍ପତ୍ତି ଠୂଳ କରିବା ଅଭିଯୋଗରେ ଭିଜିଲାନ୍‌ସ ଫାଶରେ ପଡ଼ିଥିବା ବିଏମ୍‌ସିର ନିର୍ବାହୀ ଯନ୍ତ୍ରୀ ଜଗନ୍ନାଥ ପଟ୍ଟନାୟକଙ୍କୁ ଆଜି ଜେଲ୍‌ ଯିବାକୁ ପଡ଼ିଛି। ସ୍ବତନ୍ତ୍ର ଭିଜିଲାନ୍‌ସ କୋର୍ଟ ତାଙ୍କ ଜାମିନ ଖାରଜ କରିବା ପରେ ତାଙ୍କୁ ଝାରପଡ଼ା ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଭିଜିଲାନ୍‌ସ ଟିମ୍‌ ଜବତ କରିଥିବା ସମସ୍ତ ସ୍ଥାବର ଓ ଅସ୍ଥାବର ସମ୍ପତ୍ତି ତାଙ୍କ ଆୟର ୧୪୮% ବୋଲି ଆକଳନ କରାଯାଇଛି। ବଡ଼ କଥା ହେଉଛି, ଅଭିଯୁକ୍ତ ଯନ୍ତ୍ରୀ ଶ୍ରୀ ପଟ୍ଟନାୟକଙ୍କ ନାଁରେ ଆଉ ଏକ ମାମଲା ଯୋଡ଼ି ହୋଇଯାଇଛି। ଘର ସଜେଇବା ପାଇଁ ସେ ବନ୍ୟପ୍ରାଣୀଙ୍କ ଶିଂଘ ବ୍ୟବହାର କରିଥିବାରୁ ତାଙ୍କ ବିରୋଧରେ ବନ୍ୟପ୍ରାଣୀ ସୁରକ୍ଷା ଆଇନରେ ମାମଲା କରାଯାଇଛି। 
ବୁଧବାର ଦିନ ଭିଜିଲାନ୍ସର ୪ଟି ଟିମ୍‌ ଯନ୍ତ୍ରୀ ଶ୍ରୀ ପଟ୍ଟନାୟକଙ୍କ ଭୁବନେଶ୍ବରସ୍ଥିତ ବାଲିଅନ୍ତା, ବଡ଼ଗଡ଼ସ୍ଥିତ ଘର ଓ ରାୟଗଡ଼ାସ୍ଥିତ ପୈତୃକ ଘର ଆଦି ୪ଟି ସ୍ଥାନରେ ଚଢ଼ଉ କରିଥିଲା। ରାଜଧାନୀର ପ୍ରମୁଖ ଅଞ୍ଚଳରେ ୩ଟି ପ୍ଲଟ୍‌ ସହ ବଡ଼ଗଡ଼ ଅଞ୍ଚଳରେ ଥିବ‌ା‌ ୪୫୬୦ ବର୍ଗଫୁଟ୍‌ରେ ନିର୍ମିତ ୩ମହଲା କୋଠା, ଗୁଣୁପୁରରେ ଏକ ଦୁଇ ମହଲା କୋଠା ଓ ବାଲିଅନ୍ତା ରଣପୁରରେ ଦେଢ଼ ଏକର ଜମିରେ ନିର୍ମାଣ ହୋଇଥିବା ଫାର୍ମହାଉସ୍‌ ଠାବ କରାଯାଇଥିଲା। ସେହିପରି ୮୦ଲକ୍ଷ ଟଙ୍କାର ବ୍ୟାଙ୍କ, ବୀମା ଓ ବଣ୍ଡ୍‌ ଜମା ମଧ୍ୟ ଠାବ କରାଯାଇଥିଲା। ପାଖାପାଖି ୪୬୦ ଗ୍ରାମରୁ ଅଧିକ ଓଜନର ସୁନାଗହଣା, ଦାମୀ ଘଣ୍ଟା, ହରିଣ ଶିଂଘ, ବନ୍ଧୁକ, ରୁପା ଟଙ୍କା ଓ ୭ଲକ୍ଷ ଟଙ୍କାର ଆସବାବପତ୍ର ଜବତ କରାଯାଇଛି। ଠାବ ହୋଇଥିବା ସମସ୍ତ ସ୍ଥାବର ଓ ଅସ୍ଥାବର ସମ୍ପତ୍ତିକୁ ମିଶାଇଲେ ୭ କୋଟି ଟଙ୍କାର ସମ୍ପତ୍ତି ହେବ  ବୋଲି ଆକଳନ କରାଯାଇଛି।