ଭୁବନେଶ୍ବର: ବିଏମ୍ସି ହସ୍ପିଟାଲରେ ଅଲଟ୍ରାସାଉଣ୍ଡ ମେସିନ୍ ଥିଲେ ମଧ୍ୟ ଏହାର ଲାଭ ପାଇ ପାରୁନାହାନ୍ତି ରୋଗୀ। କେବଳ ପ୍ରସୂତିଙ୍କୁ ଛାଡ଼ି ଦେଲେ ଅନ୍ୟ ରୋଗୀମାନଙ୍କୁ ଏଠି ଅଲଟ୍ରାସାଉଣ୍ଡ ମନା। କାରଣ ବହୁଦିନ ହେବ ବିଏମ୍ସି ହସ୍ପିଟାଲରେ ରେଡିଓଲୋଜିଷ୍ଟ ନାହାନ୍ତି। ତେଣୁ ରେଡିଓଲୋଜିଷ୍ଟଙ୍କୁ ନିଯୁକ୍ତି ପାଇଁ ଦାବି ହେଉଛି। ଏହି ବିଷୟକୁ ନେଇ ସ୍ଥାନୀୟ ଲୋକେ ଆନ୍ଦୋଳନକୁ ଓହ୍ଲାଉଛନ୍ତି। ବିଏମ୍ସି ଅଧିକାରୀ ଓ ସ୍ବାସ୍ଥ୍ୟ ବିଭାଗକୁ ମଧ୍ୟ ଲିଖିତ ଜଣାଉଛନ୍ତି। ହେଲେ ଆଜି ପର୍ଯ୍ୟନ୍ତ ଜଣେ ହେଲେ ରେଡିଓଲୋଜିଷ୍ଟଙ୍କୁ ନିଯୁକ୍ତି ଦିଆଯାଉନାହିଁ।
ବହୁ ବର୍ଷ ଧରି ଏଠାରେ ଅଲଟ୍ରାସାଉଣ୍ଡ ମେସିନ୍ ନଥିଲା। ଗତ ବର୍ଷ ଅଲଟ୍ରାସାଉଣ୍ଡ ମେସିନ୍ ଅଣା ଯାଇଥିଲେ ମଧ୍ୟ ପ୍ରକୋଷ୍ଠ ନଥିବାରୁ ଉଦ୍ଘାଟନ ପରେ ପ୍ରାୟ ୫ମାସ ବନ୍ଦ ହୋଇ ରହିଥିଲା। ଏବେ କେବଳ ମହିଳା ଓ ଶିଶୁ ବିଭାଗର ୩ ଜଣ ଡାକ୍ତର ସପ୍ତାହକୁ ୪ ଦିନ ସୋମବାର, ମଙ୍ଗଳବାର, ଗୁରୁବାର ଓ ଶୁକ୍ରବାର ଅଲଟ୍ରାସାଉଣ୍ଡ କରୁଛନ୍ତି। ଏହି ତିନି ଜଣ ଡାକ୍ତରଙ୍କ ରୋଗୀ ଦେଖିବାରେ ବ୍ୟସ୍ତ ରହୁଥିବାରୁ ଅନକ ସମୟରେ ହସ୍ପିଟାଲ୍କୁ ଆସୁଥିବା ସମସ୍ତ ପ୍ରସୂତିଙ୍କର ଅଲଟ୍ରାସାଉଣ୍ଡ ହୋଇପାରୁନାହିଁ। ସୂଚନାଯୋଗ୍ୟ, ବିଏମ୍ସି ହସ୍ପିଟାଲକୁ ଆଖପାଖ ଅଞ୍ଚଳର ଶତାଧିକ ପ୍ରସୂତି ଚିକିତ୍ସା ପାଇଁ ଆସିଥା’ନ୍ତି। ଏଠାରେ ମାସକୁ ପାଖାପାଖି ୨୦୦ ଶିଶୁ ଜନ୍ମ ହେଉଛନ୍ତି। କ୍ୟାପିଟାଲ୍ ହସ୍ପିଟାଲ୍ ପରେ ପୁରୁଣା ଭୁବନେଶ୍ବରରେ ଥିବା ବିଏମ୍ସି ହସ୍ପିଟାଲ୍ ଉପରେ ସହରର ଅଧିକାଂଶ ଲୋକ ନିର୍ଭର କରିଥା’ନ୍ତି। ହସ୍ପିଟାଲ୍ ଓପିଡିରୁ ମିଳିଥିବା ତଥ୍ୟ ଅନୁସାରେ ପ୍ରତିଦିନ ପୁରୁଣା ଭୁବନେଶ୍ବର ସମେତ ଆଖପାଖ ଅଞ୍ଚଳର ହଜାରରୁ ଅଧିକ ରୋଗୀ ଚିକିତ୍ସା ପାଇଁ ଆସିଥା’ନ୍ତି। କିନ୍ତୁ ଦୁଃଖର କଥା ପୂର୍ବରୁ ଏହି ହସ୍ପିଟାଲର ଶଯ୍ୟା ସଂଖ୍ୟା ୧୦୮ ଥିବା ବେଳେ ଏବେ ମାତ୍ର ୫୮ଟି ଶଯ୍ୟା କାର୍ଯ୍ୟକ୍ଷମ ଅଛି। ହସ୍ପିଟାଲ୍ର ପୁରୁଣା କୋଠାକୁ ବିପଦସଂକୁଳ ଦର୍ଶାଯାଇ ଭାଙ୍ଗି ଦିଆଯିବା ପରେ ନୂତନ ନିର୍ମାଣ ହେଉନାହିଁ। ଆବଶ୍ୟକ ଡାକ୍ତର, ନର୍ସ, ଆନୁସଙ୍ଗିକ ଉପକରଣର ଅଭାବ ମଧ୍ୟ ରୋଗୀ ସେବାରେ ବାଧା ସୃଷ୍ଟି କରୁଛି।
ବାରମ୍ବାର ଦାବି ପରେ ବି ନିଯୁକ୍ତି ହେଉନି
ପ୍ରତିଦିନ ଅଲଟ୍ରାସାଉଣ୍ଡ କରି ନପାରି ଫେରୁଛନ୍ତି ରୋଗୀ
ତେବେ ରେଡିଓଲୋଜିଷ୍ଟ ନଥିବାରୁ ଅନ୍ୟ ରୋଗୀମାନେ ଅଲଟ୍ରାସାଉଣ୍ଡ କରିପାରୁ ନାହାନ୍ତି। ଏ ସମ୍ପର୍କରେ ଗତ ବର୍ଷ ଡିସେମ୍ବର ମାସରେ ବିଏମ୍ସି ପବ୍ଲିକ୍ ହେଲଥ୍ ଷ୍ଟାଣ୍ଡିଂ କମିଟି ବୈଠକରେ ଆଲୋଚନା କରାଯାଇଥିଲା। ରେଡିଓଲୋଜିଷ୍ଟ ନିଯୁକ୍ତି ପାଇଁ ମେୟରଙ୍କୁ ପ୍ରସ୍ତାବ ଦିଆଯାଇଥିଲା। କର୍ପୋରେସନ ବୈଠକରେ ମଧ୍ୟ ଏ ସମ୍ପର୍କରେ ଆଲୋଚନା କରାଯାଇ ନିଷ୍ପତ୍ତି ନିଆଯାଇଥିଲା। ହେଲେ ଏପର୍ଯ୍ୟନ୍ତ ରେଡିଓଲୋଜିଷ୍ଟ ନିଯୁକ୍ତି ହୋଇପାରିନାହିଁ। ଏଥିସହ ଜଣେ ନିଶ୍ଚେତକଙ୍କୁ ନିଯୁକ୍ତି ପାଇଁ ସୁପାରିଶ କରାଯାଇଥିଲା। ହେଲେ ତାହା ମଧ୍ୟ ପୂରଣ ହୋଇପାରୁନାହିଁ। ଏ ସମ୍ପର୍କରେ ବିଏମ୍ସି ହସ୍ପିଟାଲର ମୁଖ୍ୟ ଚିକିତ୍ସା ଅଧିକାରୀ ଡା. ସିଦ୍ଧାର୍ଥ ଶଙ୍କର ରାୟ କହିଛନ୍ତି, ରେଡିଓଲୋଜିଷ୍ଟ ନଥିବାରୁ ରୋଗୀ ଫେରୁଛନ୍ତି। ଏନେଇ ମେୟରଙ୍କୁ ଅବଗତ କରାଯାଇଛି। ହେଲେ ସରକାରୀ ନିୟମାନୁସାରେ ଜଣେ ରେଡିଓଲୋଜିଷ୍ଟ ୨ଟି ସ୍ଥାନରେ କାମ କରିପାରିବେ। ଏହି ସମସ୍ୟା ପାଇଁ ରେଡିଓଲୋଜିଷ୍ଟ ମିଳୁ ନାହାନ୍ତି। ଏ ସମ୍ପର୍କରେ ବିଭାଗୀୟ ଅଧିକାରୀଙ୍କୁ ଅବଗତ କରାଯାଇଛି। ସରକାରୀ ହସ୍ପିଟାଲ କ୍ଷେତ୍ରରେ ନିୟମ କୋହଳ କରାଗଲେ ସମସ୍ୟାର ସମାଧାନ ହୋଇପାରିବ।