ଭୁବନେଶ୍ୱର: ଗୁରୁବାରଠାରୁ ଭୁବନେଶ୍ୱର ମହାନଗର ନିଗମ (ବିଏମ୍‌ସି) ଅଞ୍ଚଳରେ ଆରମ୍ଭ ହେବ ଵାର୍ଡସ୍ତରୀୟ ଅଭିଯୋଗ ଶୁଣାଣି। ଲୋକଙ୍କ ଦୁଆରେ ପହଞ୍ଚିବେ ନେତା ଓ ଅଧିକାରୀ। ଦୁଆର ମୁହଁରେ ହେବ ଅଭିଯୋଗର ବିଚାର ଓ ସମସ୍ୟାର ସମାଧାନ। ପ୍ରଥମ ଦିନରେ ୩୪ ନମ୍ବର ୱାର୍ଡରୁ ଏଭଳି ଅଭିନବ ଅଭିଯୋଗ ଶୁଣାଣିର ଶୁଭାରମ୍ଭ ହେବ। ବିଏମସି ଅଧିକାରୀଙ୍କ ସୂଚନା ମୁତାବକ, କେଉଁ ଵାର୍ଡରେ କ’ଣ କ’ଣ କାମ ହୋଇଛି ଏବଂ ଆଉ କ’ଣ କାମ କରିବା ଦରକାର, ସେ ସଂପର୍କରେ ଅଭିଯୋଗ ଶୁଣାଣିରେ ୱାର୍ଡବାସୀଙ୍କ ମତାମତ ନିଆଯିବ। ଏହି ଅଭିଯୋଗ ଶୁଣାଣିରେ ମେୟର, ଡେପୁଟି ମେୟର, ଷ୍ଟାଣ୍ଡିଂ କମିଟିର ଅଧ୍ୟକ୍ଷ, ଅଧ୍ୟକ୍ଷା, ସ୍ଥାନୀୟ କର୍ପୋରେଟର, ଅତିରିକ୍ତ କମିସନର, ଡେପୁଟି କମିସନର, ବିଏମ୍‌ସିର ସମସ୍ତ ଉପବିଭାଗୀୟ ଅଧିକାରୀ, ଇଂଜିନିୟରିଂ ଉପବିଭାଗର ଅଧିକାରୀ, ଵାଟ୍‌କୋ, ସଂପୃକ୍ତ ଵାର୍ଡର ଵାର୍ଡ ଅଫିସର୍‌, କମ୍ୟୁନିଟି ଅର୍ଗାନାଇଜର, ସାନିଟାରି ଇନ୍ସପେକ୍ଟର, ସ୍ୱଚ୍ଛ ସୁପରଭାଇଜର, ସ୍ୱଚ୍ଛ ସାଥୀ  ପ୍ରମୁଖ ଉପସ୍ଥିତ ରହିବେ।

Advertisment

ଲୋକଙ୍କ ଦୁଆରେ ପହଞ୍ଚିବେ ନେତା, ଅଧିକାରୀ
ପ୍ରଥମ ପାଳିରେ ୩୪ ନମ୍ବର ୱାର୍ଡ
ସପ୍ତାହକୁ ତିନିଦିନ ଶୁଣାଣି

ସଂପୃକ୍ତ ଵାର୍ଡର ବିଭିନ୍ନ ଆବାସିକ ସଂଗଠନ, ଏସ୍‌ଏଚ୍‌ଜିର ସଦସ୍ୟା, ବସ୍ତିବାସିନ୍ଦା ସଂଘର କର୍ମକର୍ତ୍ତା, ବରିଷ୍ଠ ନାଗରିକ, ସାଧାରଣ ନାଗରିକ, ବିଭିନ୍ନ କ୍ଲବ୍‌ର କର୍ମକର୍ତ୍ତା ଆଦି ଉପସ୍ଥିତ ରହିବେ। ପ୍ରଥମ ଦିନ ୩୪ ନମ୍ବର ଵାର୍ଡର ସତ୍ୟନଗରସ୍ଥିତ ଵାର୍ଡ ଅଫିସରେ ଏହି ଅଭିଯୋଗ ଶୁଣାଣି କରାଯିବ। ଲୋକଙ୍କ ସୁବିଧା ଅସୁବିଧା ତାଙ୍କ ପାଖକୁ ଯାଇ ଶୁଣିବା ସହ ସେମାନଙ୍କ ସମସ୍ୟା ସମାଧାନର ସୂତ୍ର ବାହାର କରିବା ଏହାର ଉଦ୍ଦେଶ୍ୟ ବୋଲି ବିଏମ୍‌ସି କହିଛି। ଏହି ଅଭିଯୋଗ ଶୁଣାଣି ସପ୍ତାହକୁ ତିନି ଦିନ ଅର୍ଥାତ ପ୍ରତି ମଙ୍ଗଳବାର, ଗୁରୁବାର ଓ ଶନିବାର ସକାଳ ୮ଟାରୁ ୧୦ଟା ମଧ୍ୟରେ କରାଯିବ। ସୂଚନାଯୋଗ୍ୟ, ସରକାରଙ୍କ ନିୟମ ଅନୁସାରେ ପ୍ରତି ସୋମବାର ଦିନ ବିଏମ୍‌ସି କାର୍ଯ୍ୟାଳୟରେ ଲୋକଙ୍କ ଅଭିଯୋଗ ଶୁଣାଣି ହେଉଛି।