ପୁସ୍ତକ ‘ଆତ୍ମାର ମିଳନ’ ଲୋକାର୍ପିତ

ଭୁବନେଶ୍ବର: ପୁରୁଷ ଓ ମହିଳାଙ୍କ ମଧ୍ୟ‌‌‌‌‌ରେ ସମାନତା ଆସିପାରିଲେ, ସମାଜର ସର୍ବାଙ୍ଗୀନ ଉନ୍ନତି ସମ୍ଭବ। ମାସିକ ମହିଳା ପତ୍ରିକା ‘ଯୁଗଶ୍ରୀ ଯୁଗନାରୀ’ ଆନୁକୂଲ୍ୟରେ ଲେଖିକା ନିରୁପମା ଆଚାର୍ଯ୍ୟଙ୍କ ଅନୁଦିତ ପୁସ୍ତକ ‘ଆତ୍ମାର ମିଳନ’ର ଲୋକାର୍ପଣ ଉତ୍ସବକୁ ଉଦ୍‌ଘାଟନ କରି ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ମନ୍ତ୍ରୀ ଜ୍ୟୋତିପ୍ରକ‌ାଶ ପାଣିଗ୍ରାହୀ ଆଜି ଏହା କହିଛନ୍ତି।

ଅନୁଷ୍ଠାନର ସଂପାଦିକା ମମତା ମହାପାତ୍ରଙ୍କ ସଭାପତିତ୍ବରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇ ବିଶିଷ୍ଟ କବି ହରପ୍ରସାଦ ଦାସ କହିଲେ, ଉଚ୍ଚକୋଟୀର ପୁସ୍ତକ ସବୁବେଳେ ଯେ ଭଲ ପୁସ୍ତକ, ତାହା ନୁହେଁ। ଭଲ ପୁସ୍ତକ ମାନବୀୟ ମୂଲ୍ୟବୋଧକୁ ଧାରଣ କରିବା ସହ ସକ‌ାରାତ୍ମକ, କରୁଣାମୟ, ସୁଖପ୍ରଦ ଓ ପାଠକ ମନରେ କଳ୍ପନା ନିର୍ମାଣ କରୁଥିବା ଆବଶ୍ୟକ ବୋଲି ଶ୍ରୀ ଦାସ କହିଥିଲେ। ବାଗ୍ମୀ ମନୋରମା ମହାପାତ୍ର ମୁଖ୍ୟବକ୍ତା ଭାବେ ଯୋଗଦେଇ କହିଲେ, ଭାଷାକୁ ନୁହେଁ, ଭାବକୁ ଅନୁବାଦ କରି ଜାଣିଲେ ଅନୁଦିତ ପୁସ୍ତକଟି ପାଠକୀୟ ଆଦୃତି ଲାଭ କରିପାରିବ। ଅନୁଦିତ ପୁସ୍ତକଟି ମାନବବାଦୀ, ମନଛୁଆଁ ଓ ସକ‌ାରାତ୍ମକ ହେବା ଆବଶ୍ୟକ। ଲେଖିକା ଶ୍ରୀମତୀ ଆଚାର୍ଯ୍ୟଙ୍କ ଏହି ପୁସ୍ତକ‌ରେ ଏସବୁ ଗୁଣ ରହିଛି। ସମ୍ମାନିତ ଅତିଥି ଭାବେ ଯୋଗଦେଇ ବିଶିଷ୍ଟ କଥାକାର ଗୌରହରି ଦାସ କହିଲେ, ଅନୁବାଦକ ହେଉଛନ୍ତି ମା’ ଯଶୋଦା। ମୂଳ ଲେଖକର ଭାବକୁ ଅକ୍ଷୁଣ୍ଣ ରଖି ନିଜ ଭାଷାରେ ଲେଖାଟିକୁ ପାଠକଙ୍କ ପାଖରେ ପହଞ୍ଚାଇବାର ଗୁରୁଦାୟିତ୍ବ ତାଙ୍କ ଉପରେ ନ୍ୟସ୍ତ ଥାଏ। ଶ୍ରୀମତୀ ଆଚାର୍ଯ୍ୟଙ୍କ ଅନୁଦିତ ପୁସ୍ତକରେ ଆସ୍ଥା, ବିଶ୍ବାସ ଓ ମଣିଷ ପଣିଆର ଝଲକ ରହିଛି। ପ୍ରେମ, କରୁଣା, ତ୍ୟାଗ ଓ ସ୍ନେହକୁ ନେଇ ରଚିତ ଲେଖା ବିଶ୍ବ ଇତିହାସରେ ବଞ୍ଚି ରୁହେ ବୋଲି ଶ୍ରୀ ଦାସ କହିଥିଲେ। କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ସାହିତ୍ୟିକା ସୁଷମା ମିଶ୍ର ଯୋଗ ଦେଇଥିଲେ। ଲେଖିକା ଶ୍ରୀମତୀ ଆଚାର୍ଯ୍ୟ କହିଲେ, ୭୭ଟି ଅନୁଦିତ ଗଳ୍ପକୁ ନେଇ ଏହି ପୁସ୍ତକ ସଂକଳିତ ହୋଇଛି। ଅନୁବାଦ ଦୁଇଟି ଭାଷାର ସାହିତ୍ୟକୁ ସମୃଦ୍ଧ କରେ। ଗପଟିରେ ଭାଷା ନୁହେଁ, ଭାବ ବୁଝିପାରିଲେ ଅନୁଦିତ ପୁସ୍ତକଟି ଅଧିକ ଆଦୃତି ଲାଭ କରିପାରେ ବୋଲି ସେ କହିଥିଲେ। ଅନୁଷ୍ଠାନର ସହ ସମ୍ପାଦିକା ପ୍ରଭାବତୀ ପଣ୍ଡା ସ୍ବାଗତ ଭାଷଣ ଦେଇଥିଲେ।