ଭୁଶୁଡ଼ି ପଡ଼ିଲା ସେତୁ, ଯାତାୟାତ ଠପ୍‌

ବାଲିଅନ୍ତା ବଜାର: ସତ୍ୟଭାମାପୁର-ଭିଙ୍ଗାରପୁର ରାସ୍ତାରେ ବଇଁଚୁଆ ଜଟେଶ୍ୱର ନିକଟରେ ଥିବା ସେତୁଟି ଆଜି ସକାଳ ପ୍ରାୟ ୧୦ଟା ବେଳେ ଭୁଶୁଡ଼ି ପଡ଼ିଛି। ଫଳରେ ଆଜିଠୁ ଏହି ରାସ୍ତାରେ ଯାତାୟାତ ଠପ୍‌ ହୋଇଯାଇଛି। ପୂର୍ତ୍ତ ବିଭାଗକୁ ବାରମ୍ବାର ଅଭିଯୋଗ କରିବା ସତ୍ତ୍ବେ ଦୀର୍ଘ ବର୍ଷ ଧରି ମରାମତି ନ ହେବାରୁ ଆଜି ଏଭଳି ସ୍ଥିତି ଉପୁଜିଛି ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଆଜି ସକାଳେ ଉକ୍ତ ସେତୁ ଉପର ଦେଇ ଏକ ଟ୍ରକ୍‌ ଅତିକ୍ରମ କରୁଥିବା ବେଳେ ଏହି ଅଘଟଣ ଘଟିଥିଲା। କିନ୍ତୁ ସୌଭାଗ୍ୟକୁ ଟ୍ରକ୍‌ଟି ସେତୁ ଅତିକ୍ରମ କରିସାରିଥିଲା।

ଫଳରେ ଟ୍ରକ୍‌ ଚାଳକ ବର୍ତ୍ତି ଯାଇଥିଲେ। ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ ଏହି ରାସ୍ତା ଦେଇ ଭିଙ୍ଗାରପୁର, ବଇଁଚୁଆ, ପ୍ରତାରୁଦ୍ରପୁର, କାକରୁଦ୍ରପୁର, ଅଡ଼ଶପୁର ଓ କଣ୍ଟାପଡ଼ା ଆଦି ଅଞ୍ଚଳର ଲୋକେ ରାଜଧାନୀକୁ ଯାତାୟାତ କରନ୍ତି। ସେତୁଟି ଜରାଜୀର୍ଣ୍ଣ ଅବସ୍ଥାକୁ ଆସିଯାଇଥିଲା। ତେଣୁ ଯେ କୌଣସି ସମୟରେ ଏହା ଭୁଶୁଡ଼ି ପଡ଼ିବ ବୋଲି ଆଶଙ୍କା ଥିଲା। ତେଣୁ ସ୍ଥାନୀୟ ଲୋକେ ବାରମ୍ବାର ବିଭାଗୀୟ ଅଧିକାରୀଙ୍କୁ ଅବଗତ କରାଇଥିଲେ ଏବଂ ତୁରନ୍ତ ମରାମତି କରାଇବାକୁ ଦାବି କରିଆସୁଥିଲେ। କିନ୍ତୁ ବିଭାଗୀୟ ଅଧିକାରୀମାନଙ୍କର ଏଥିପ୍ରତି ନିଘା ନଥିଲା। ଶେଷରେ ଲୋକଙ୍କ ଆଶଙ୍କା ସତ ହେଲା ଏବଂ ଏହି ରାସ୍ତାରେ ଚଳାଚଳ ବନ୍ଦ ହୋଇଯାଇଛି। ଏନେଇ ଆଜି ପୂର୍ତ୍ତ ବିଭାଗକୁ ଅବଗତ କରାଯାଇଛି। ତୁରନ୍ତ ସେତୁ ନିର୍ମାଣ କରା ନଗଲେ, ଲୋକେ ଆନ୍ଦୋଳନକୁ ଓହ୍ଲାଇବେ ବୋଲି ସରପଞ୍ଚ ରଶ୍ମିତା ସାହୁ କହିଛନ୍ତି।