ଭୁବନେଶ୍ବର: ମିକ୍ସଚର ପ୍ୟାକେଟ୍ରେ ବ୍ରାଉନ୍ସୁଗାର୍ ପୁଡ଼ିଆ ଜବତ କରିଛି ଅବକାରୀ ବିଭାଗ। ଖୋର୍ଦ୍ଧା ସଦର ଥାନା ପୋଡ଼ାପାଟଣା ଗ୍ରାମସ୍ଥିତ ମିକ୍ସଚର ଫ୍ୟାକ୍ଟ୍ରିରେ ଧରପଗଡ଼ ବେଳେ ୧୫୦ ଗ୍ରାମ୍ର ବ୍ରାଉନ୍ସୁଗାର ଜବତ ହୋଇଛି। ଏହି କାରବାରରେ ସଂପୃକ୍ତି ଥିବା ଅଭିଯୋଗରେ ମିକ୍ସଚର ଫ୍ୟାକ୍ଟ୍ରିର ମାଲିକ ତଥା ଜଣେ ପ୍ରଭାବଶାଳୀ ରାଜନେତା ପଦ୍ମନାଭ ସାହୁ ଓ ତାଙ୍କ ଭଣଜା ରଞ୍ଜନ କୁମାର ମହାପାତ୍ରଙ୍କୁ ଗିରଫ କରାଯାଇଛି। ଅନ୍ୟ ପକ୍ଷରେ ଏହି ଧରପଗଡ଼କୁ କିଛି ସ୍ଥାନୀୟ ଲୋକ ବିରୋଧ କରିଛନ୍ତି। ଏପରିକି ଏହାକୁ ଏକ ଷଡ୍ଯନ୍ତ୍ର ବୋଲି କହି ବେଗୁନିଆ ବିଧାୟକ ପ୍ରଦୀପ ସାହୁ ଗିରଫଦାରୀକୁ ବିରୋଧ କରିଛନ୍ତି। ସବୁ ପ୍ରକାର ବିରୋଧ ସତ୍ତ୍ବେ ଦୁଇ ଅଭିଯୁକ୍ତିଙ୍କୁ କୋର୍ଟ ଚାଲାଣ କରାଯାଇଛି। ସେମାନଙ୍କଠାରୁ ଏକ ଲକ୍ଷ ଟଙ୍କା ବି ଜବତ ହୋଇଛି।
ବିଶ୍ୱସ୍ତ ସୂତ୍ରରୁ ଖବର ପାଇ ଅବକାରୀ ବିଭାଗର ସ୍ୱତନ୍ତ୍ର ସ୍କ୍ୱାଡ୍ ଗୁରୁବାର ରାତିରେ ମିକ୍ସଚର୍ କାରଖାନା ଗୋଦାମରେ ଚଢ଼ଉ କରିଥିଲେ। ମିଛରେ ବ୍ୟବସାୟୀ ଶ୍ରୀ ସାହୁଙ୍କୁ ଫସାଇ ଦିଆଯାଇଥିବା ଅଭିଯୋଗ କରି ଗ୍ରାମବାସୀ ଶୁକ୍ରବାର ସକାଳେ ଜିଲ୍ଲା ଅବକାରୀ କାର୍ଯ୍ୟାଳୟ ଘେରଉ କରିଥିଲେ। ଚକ୍ରାନ୍ତ କରି ପଦ୍ମନାଭଙ୍କ ବାରଣ୍ଡାରେ ବ୍ରାଉନସୁଗାର ସହ ମିକ୍ସଚର ପ୍ୟାକେଟ୍ ରଖି ତାଙ୍କୁ ଉଠାଇ ଆଣିଛନ୍ତି ବୋଲି ଲୋକେ ଅଭିଯୋଗ କରିଛନ୍ତି। ବେଗୁନିଆ ବିଧାୟକ ଶ୍ରୀ ସାହୁ ଏହାର ନିରପେକ୍ଷ ତଦନ୍ତ ଦାବି କରିଛନ୍ତି। ତେବେ ଅବକାରୀ ଅଧୀକ୍ଷକ ସୁମତୀ ତ୍ରିପାଠୀ କହିଛନ୍ତି, ଯେହେତୁ ଅଭିଯୁକ୍ତଙ୍କ କାରଖାନା ହତା ଭିତରୁ ବ୍ରାଉନ୍ସୁଗାର ମିଳିଛି, ତେଣୁ ଆମେ କାହାକୁ ଦାୟୀ କରିବୁ? ଯଦି କିଏ ବାହାର ଲୋକ ତାଙ୍କୁ ଫସାଇଛନ୍ତି, ତେବେ କୁହନ୍ତୁ ଆମେ ତାଙ୍କୁ ତଦନ୍ତ ପରିସରକୁ ନେବୁ। ଲକ୍ଷ ଲକ୍ଷ ଟଙ୍କାର ବ୍ରାଉନସୁଗାର ଥୋଇ କାହିଁକି କିଏ କାହାକୁ ଫସାଇବ ବୋଲି ଜିଲ୍ଲା ଅବକାରୀ ଅଧୀକ୍ଷକ ଶ୍ରୀମତୀ ତ୍ରିପାଠୀ କହିଛନ୍ତି।
Advertisment

Sambad is now on WhatsApp
Join and get latest news updates delivered to you via WhatsApp