ଭୁବନେଶ୍ବର : ରାଜଧାନୀର ଗଳିକନ୍ଦିରେ ଚାଲିଛି ବ୍ରାଉନସୁଗାର କାରବାର। ଯିଏ ଧଳାଜହର ଖାଉଛି ସିଏ ବିକ୍ରି କରୁଛି। ଏମିତି ଢଙ୍ଗରେ ବେପାର ଚାଲିଛି। ହଳଦୀପଡ଼ିଆ ପରେ ବୁଦ୍ଧେଶ୍ବରୀ ଏବେ ନୂଆ ହବ୍ ପାଲଟିଛି। ମାସକ ଭିତରେ ୫ ଜଣ ଧରାପଡ଼ିବା ଘଟଣାରୁ ଏହା ସ୍ପଷ୍ଟ ହୋଇଯାଇଛି। ଆଜି ଲକ୍ଷ୍ମୀସାଗର ଥାନା ପୁଲିସ ଚଢ଼ଉ କରି ଦୁଇ ଜଣଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ୫୧ ଗ୍ରାମ ବ୍ରାଉନସୁଗାର ଜବତ କରିଛି। ଏହାର ଆନୁମାନିକ ମୂଲ୍ୟ ୫ ଲକ୍ଷ ଟଙ୍କା ହେବ ବୋଲି ଜଣାପଡ଼ିଛି। ସେହିପରି ଉଭୟଙ୍କଠାରୁ ଗୋଟିଏ ବାଇକ୍, ଦୁଇଟି ମୋବାଇଲ ଫୋନ୍ ମଧ୍ୟ ଜବତ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ପୁଲିସ ସୂଚନା ଅନୁସାରେ, ଗିରଫ ଦୁଇ ଜଣ ହେଲେ ବୁଦ୍ଧେଶ୍ବରୀ ଅଞ୍ଚଳର ଡମ୍ବରୁଧର ବିଶ୍ବାଳ ଓରଫ୍ ଡମ୍ବରୁ(୨୬) ଓ ଏସ୍.କେ ୟାସିନ୍ ଓରଫ୍ ଲିପୁ। ଆଜି ସକାଳେ ବୁଦ୍ଧେଶ୍ବରୀ ସ୍କୁଲ ନିକଟରେ ଉଭୟ ଗୋଟିଏ ବାଇକ(ଓଡି୦୨ବିପି-୯୪୭୩) ଧରି ଛିଡ଼ା ହୋଇଥିଲେ। ପୁଲିସର ସେମାନଙ୍କ ଉପରେ ସନ୍ଦେହ ହୋଇଥିଲା। ସେମାନଙ୍କ ପ୍ୟାଣ୍ଟ ପକେଟ୍ ଯାଞ୍ଚ କରିବା ପରେ ବ୍ରାଉନସୁଗାର ମିଳିଥିଲା। ଏହି ବ୍ରାଉନସୁଗାର ଜଳେଶ୍ବରରୁ ଆଣିଥିବା ପୁଲିସ ଅନୁମାନ କରୁଛି। ଏ ସଂକ୍ରାନ୍ତରେ ଲକ୍ଷ୍ମୀସାଗର ଥାନାରେ ଏକ ମାମଲା ରୁଜୁ ହୋଇଛି। ଗିରଫ ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।