ଖଣ୍ଡଗିରି: ଘରୋଇ ବସ୍‌ ମାଲିକ ସଂଘର ଧର୍ମଘଟ ଡାକରା ଯୋଗୁଁ ଆଜି ଦିନତମାମ ବରମୁଣ୍ଡା ବସ୍‌ଷ୍ଟାଣ୍ଡରେ ଶହ ଶହ ଯାତ୍ରୀ ହନ୍ତସନ୍ତ ହୋଇଛନ୍ତି। ଖାଇବା ପିଇବାଠାରୁ ବିଶ୍ରାମ ନେବା ପର୍ଯ୍ୟନ୍ତ ସବୁଥିରେ ଯାତ୍ରୀମାନେ ବଡ଼ ହୀନସ୍ତା ହୋଇଥିଲେ। ବସ୍‌ଷ୍ଟାଣ୍ଡରେ ଅଟକି ଯାଇଥିବା ସମସ୍ତ ଯାତ୍ରୀ ଦୂରଦୂରାନ୍ତରୁ ଆସିଥିବାରୁ ଦିନତମାମ୍‌ ଅପେକ୍ଷା କରି କରି ବଡ଼ କଷ୍ଟ ଭୋଗ କରିଥିଲେ। ଅବିଶ୍ରାନ୍ତ ଟ୍ରେନ୍‌ ଯାତ୍ରା ପରେ ପ୍ରବଳ ଗରମରେ ବସ୍‌ଷ୍ଟାଣ୍ଡରେ ଅଟକି ରହିବାର ଯନ୍ତ୍ରଣାରେ ସମସ୍ତେ ବଛଟପଟ ହୋଇଥିଲେ। ଧର୍ମଘଟ ବାବଦରେ ପୂର୍ବରୁ ସୂଚନା ଦିଆଯାଇଥିବାରୁ କୌଣସି ନିତିଦିନିଆ ଯାତ୍ରୀ ବସ୍‌ଷ୍ଟାଣ୍ଡରେ ନଥିଲେ। ଯେଉଁମାନେ ଥିଲେ ସେମାନେ ସମସ୍ତେ ରାଜ୍ୟ ବାହାରେ କାମ କରୁଥିବା ଯାତ୍ରୀ। ଏହି ଯାତ୍ରୀମାନେ ବସ୍‌ ଧର୍ମଘଟ ବାବଦରେ ଜାଣିନଥିବାରୁ ସମସ୍ୟାରେ ପଡ଼ିଥିଲେ। ସେମାନଙ୍କ ଭିତରେ ବହୁ ଯାତ୍ରୀ ନୟାଗଡ଼, ଦଶପଲ୍ଲା, ଗଣିଆ, କନ୍ଧମାଳ, ଝାରସୁଗୁଡ଼ା, ବଲାଙ୍ଗୀର, ଢେଙ୍କାନାଳ ଆଦି ଜିଲ୍ଲାର। ସମସ୍ତେ ଭୁବନେଶ୍ୱର ରେଳ ଷ୍ଟେସନ୍‌ରେ ଟ୍ରେନ୍‌ରୁ ଓହ୍ଲାଇ ଘରକୁ ଯିବା ପାଇଁ ବରମୁଣ୍ଡାକୁ ଆସି ବସ୍‌କୁ ଅପେକ୍ଷା କରିଥିଲେ। ହାଇଦ୍ରାବାଦ୍‌, ପୁନେ, ମୁମ୍ବାଇ, ବେଙ୍ଗାଲୁର୍‌ରେ କାମ କରୁଥିବା ବହୁ ଯୁବକ ଭୁବନେଶ୍ୱର ପର୍ଯ୍ୟନ୍ତ ଟ୍ରେନ୍‌ରେ ଆସିବା ପରେ ବରମୁଣ୍ଡାରୁ ବସ୍‌ ଯୋଗେ ଘରକୁ ଯିବାର ଥିଲା। ମାତ୍ର ବସ୍‌ ଧର୍ମଘଟ ସେମାନଙ୍କୁ ଅସୁବିଧାରେ ପକାଇଥିଲା। କନ୍ଧମାଳର ବିକାଶ ନାୟକ ବେଙ୍ଗାଲୁରୁରେ କାମ କରନ୍ତି। ସେ ଗତକାଲି ରାତିରେ ପ୍ରଶାନ୍ତି ଏକ୍‌ସପ୍ରେସ୍‌ରେ ଆସି ଭୁବନେଶ୍ୱରରେ ପହଞ୍ଚିଥିଲେ। ଆଜି ସକାଳୁ ସେ ବସ୍‌ ଯୋଗେ ଘରକୁ ଯିବା କଥା। ମାତ୍ର ଧର୍ମଘଟ ପାଇଁ ସେ ଦିନ ତମାମ୍‌ ବସଷ୍ଟାଣ୍ଡରେ ହିଁ ପଡ଼ି ରହିଲେ। ସେହିଭଳି ଢେଙ୍କାନାଳର ମନୋରଂଜନ ପାଣିଗ୍ରାହୀ ନାମକ ଜଣେ ଯୁବକ ପୁନେରୁ କୋଣାର୍କ ଏକ୍‌ସପ୍ରେସ୍‌ରେ ଭୁବନେଶ୍ୱର ଫେରିଥିଲେ ଓ ଆଜି ସକାଳୁ ସେ ବସ୍‌ରେ ଘରକୁ ଫେରିବାର ଥିଲା। ଝାରସୁଗୁଡ଼ାର ବିନୋଦ ଟୁଡୁ ହାଇଦ୍ରାବାଦ୍‌ରୁ ଟ୍ରେନ୍‌ରେ ଭୁବନେଶ୍ୱରରେ ପହଞ୍ଚି ବରମୁଣ୍ଡାରେ ଅଟକିବାକୁ ବାଧ୍ୟ ହୋଇଥିଲେ। ରାତି ସାରା ଟ୍ରେନ୍‌ରେ ଭଲରେ ଶୋଇ ପାରିନଥିବା ଏହି ଯାତ୍ରୀମାନେ ବରମୁଣ୍ଡା ବସ୍‌ଷ୍ଟାଣ୍ଡରେ ବସି ବସି କ୍ଲାନ୍ତ ହୋଇ ପଡ଼ିଥିଲେ। କିଛି ଯାତ୍ରୀ ବସିିବାକୁ ଚେୟାର୍‌ ନ ପାଇ ତଳେ ଶୋଇ ପଡ଼ିଥିବା ଦେଖିବାକୁ ମିଳିଥିଲା। ଅବଶ୍ୟ କମ୍‌ ସଂଖ୍ୟକ ଶିଶୁ ଓ ମହିଳା ଯାତ୍ରୀମାନେ ମହିଳା ବିଶ୍ରାମଗାରରେ ଦିନଟି କଟାଇଥିଲେ। ସେମାନଙ୍କ ପାଇଁ ବିଶେଷ ସମସ୍ୟା ନଥିଲା। ଭାଗ୍ୟକୁ ବସ୍‌ ଧର୍ମଘଟ ହୋଇଥିଲେ ବି ବସ୍‌ଷ୍ଟାଣ୍ଡରେ ସମସ୍ତ ଦୋକାନ ବଜାର ହୋଟେଲ ଆଦି ଖୋଲାଥିଲା। ଆହାର କେନ୍ଦ୍ର ମଧ୍ୟ ଖୋଲାଥିଲା। ତେଣୁ ଖାଇବା ପିଇବାରେ ଯାତ୍ରୀମାନଙ୍କୁ ବିଶେଷ ସମସ୍ୟାର ସମ୍ମୁଖୀନ ହେବାକୁ ପଡ଼ିନଥିଲା। ସୌଭାଗ୍ୟକୁ ସନ୍ଧ୍ୟା ସୁଦ୍ଧା ବସ୍‌ ଚଳାଚଳ ସ୍ୱାଭାବିକ ହେବାରୁ ସେମାନେ ଆଶ୍ୱସ୍ତ ହୋଇଥିଲେ।

Advertisment