ଭୁବନେଶ୍ବର: ଆସନ୍ତାକାଲି ଠାରୁ କ୍ୟାପିଟାଲ ହସ୍ପିଟାଲରୁ ଡାକ୍ତରଙ୍କୁ ଛାଡ଼ି ଅଧା କର୍ମଚାରୀ ବିଭିନ୍ନ ଦାବି ନେଇ ଆନ୍ଦୋଳନକୁ ଓହ୍ଲାଇବେ। ଫଳରେ ହସ୍ପିଟାଲରେ ସ୍ବାସ୍ଥ୍ୟସେବା କିଭଳି ଚାଲିବ ଏହାକୁ ନେଇ ହସ୍ପିଟାଲ କର୍ତ୍ତୃପକ୍ଷ ଚିନ୍ତାରେ ରହିଛନ୍ତି। ପୂର୍ବରୁ ଓଡ଼ିଶା ସ୍ବାସ୍ଥ୍ୟ ମିସନ ପରିଚାଳନା କର୍ମଚାରୀ ସଂଘ ବିଭିନ୍ନ ଦାବି ନେଇ ଆନ୍ଦୋଳନକୁ ଯାଇଥିବା ବେଳେ ହସ୍ପିଟାଲରେ କାର୍ଯ୍ୟରତ ଆଉଟସୋର୍ସିଂ କର୍ମଚାରୀମାନେ କାର୍ଯ୍ୟବନ୍ଦ ଆନ୍ଦୋଳନକୁ ଓହ୍ଲାଇବେ। ତେଣୁ ଆସନ୍ତାକାଲି ଠାରୁ ସମୁଦାୟ ୩୦୦ କର୍ମଚାରୀ ସେମାନଙ୍କ ଦାବି ନେଇ କାର୍ଯ୍ୟବନ୍ଦ ଆନ୍ଦୋଳନକୁ ଓହ୍ଲାଇବେ। 

Advertisment

ସୂଚନାନୁସାରେ ଗତ ୧୦ ତାରିଖରୁ ଓଡ଼ିଶା ସ୍ବାସ୍ଥ୍ୟ ମିସନ ପରିଚାଳନା କର୍ମଚାରୀ ସଂଘ ଅଧୀନରେ ଥିବା ହସ୍ପିଟାଲର ପ୍ରାୟ ୧୫୦ ଜଣ କର୍ମଚାରୀ ଆନ୍ଦୋଳନକୁ ଓହ୍ଲା‌ଇଛନ୍ତି। ‌ହସ୍ପିଟାଲ ପରିଚାଳନା ବିଭାଗ, ଯକ୍ଷ୍ମା ବିଭାଗ, ମାନସିକ ବିଭାଗ, ଅଣସଂକ୍ରାମକ ରୋଗ ନିୟନ୍ତ୍ରଣ ଆଦି ବିଭାଗରେ କାର୍ଯ୍ୟରତ ଏହି କର୍ମଚାରୀମାନେ ଆନ୍ଦୋଳନକୁ ଓହ୍ଲାଇଛନ୍ତି। ଫଳରେ ଏହି  ବିଭାଗରେ କାର୍ଯ୍ୟ ଆପାତତଃ ବନ୍ଦ ହୋଇ ପଡ଼ିଛି। ହସ୍ପିଟାଲର ମ୍ୟାନେଜରମାନେ ଆନ୍ଦୋଳନକୁ ଯାଇଥିବାରୁ ହସ୍ପିଟାଲର ସମସ୍ତ ପ୍ରଶାସନିକ କାର୍ଯ୍ୟ ବନ୍ଦ ହୋଇ ପଡ଼ିଛି। ସେମାନେ ଗତ ୧୫ ଦିନ ଧରି ଆନ୍ଦୋଳନରେ ବସିଛନ୍ତି।

ଆସନ୍ତାକାଲି ଠାରୁ ହସ୍ପିଟାଲରେ କାର୍ଯ୍ୟରତ ଆଉଟସୋର୍ସିଂ କର୍ମଚାରୀମାନେ ଆନ୍ଦୋଳନକୁ ଓହ୍ଲାଇବେ। ଏଥିରେ ୫୦ ଜଣ ନର୍ସ, ୮୦ ଜଣ ଆଟେଣ୍ଡାଣ୍ଟ, ୧୧ ଜଣ ଫାର୍ମସିଷ୍ଟ ସହ ଅନ୍ୟ କିଛି କର୍ମଚାରୀଙ୍କୁ ମିଶାଇ ସମୁଦାୟ ୧୫୦ ଜଣ କର୍ମଚାରୀ ଆନ୍ଦୋଳନକୁ ଓହ୍ଲାଇବେ। କ୍ୟାପିଟାଲ ହସ୍ପିଟାଲରେ ପ୍ରାୟ ୮୦୦ ରୋଗୀ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି। ପ୍ରତିଦିନ ପ୍ରାୟ ୩୦୦ ନୂଆ ଗୁରୁତର ରୋଗୀ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି। ଏତେ ରୋଗୀଙ୍କୁ ଚିକିତ୍ସା କରିବା ପାଇଁ ଆବଶ୍ୟକୀୟ କର୍ମଚାରୀ ମଧ୍ୟ ରହିବେ ନାହିଁ।  ଫଳରେ କ୍ୟାପିଟାଲ ହସ୍ପିଟାଲରେ ରୋଗୀ ସେବା କେମିତି ଚାଲିବ ତାହାକୁ ନେଇ ହସ୍ପିଟାଲ କର୍ତ୍ତୃପକ୍ଷ ଚିନ୍ତାରେ ରହିଛନ୍ତି।  ତେଣୁ କ୍ୟାପିଟାଲ ହସ୍ପିଟାଲ କର୍ତ୍ତୃପକ୍ଷ ଆବଶ୍ୟକୀୟ କର୍ମଚାରୀ ଯୋଗାଇ ଦେବାକୁ ସ୍ବାସ୍ଥ୍ୟ ବିଭାଗକୁ ଚିଠି ଲେଖିଛନ୍ତି। ଏହାସହିତ ଇଣ୍ଟର୍ନ ପାଇଁ ଆସୁଥିବା ନର୍ସିଂ ଛାତ୍ରଛାତ୍ରୀମାନଙ୍କୁ ଅଧିକ ସମୟ ରହିବା ପାଇଁ ସଂପୃକ୍ତ ଶିକ୍ଷାନୁଷ୍ଠାନକୁ ଅନୁରୋଧ କରାଯାଇଛି। 

ଉଲ୍ଲେଖଯୋଗ୍ୟ, ବର୍ତ୍ତମାନ ବିଧାନସଭା ଚାଲିଥିବାରୁ ବହୁ ସଂଗଠନ ମାହାତ୍ମାଗାନ୍ଧୀମାର୍ଗରେ ଆନ୍ଦୋଳନରେ ବସିଛନ୍ତି। ଏହାଛଡ଼ା ରାଜଧାନୀକୁ ବିଭିନ୍ନ କାରଣରୁ ଭିଭିଆଇପିଙ୍କ ଗସ୍ତ ଥିବାରୁ କ୍ୟାପିଟାଲ ହସ୍ପିଟାଲର ଡାକ୍ତର ଓ କର୍ମଚାରୀ ସେଥିପାଇଁ ନିୟୋଜିତ ହେଉଛନ୍ତି। ହସ୍ପିଟାଲରେ ବର୍ତ୍ତମାନ ୫୦ରୁ ଅଧିକ ଡାକ୍ତର ଓ ୫୦ରୁ ଅଧିକ ନର୍ସ ପଦବି ଖାଲି ରହିଛି। ତେଣୁ ଏଭଳି ସ୍ଥିତିରେ ରୋଗୀ ସେବା ହସ୍ପିଟାଲ କର୍ତ୍ତୃପକ୍ଷଙ୍କ ପାଇଁ କାଠିକର ପାଠ ହୋଇଯିବ। ତେଣୁ ଆଗାମୀ ଦିନରେ କର୍ମଚାରୀମାନେ ହସ୍ପିଟାଲରେ ‌ଯୋଗ ନ ଦେଲେ ପରିସ୍ଥିତି ଜଟିଳ ହେବ  ବୋଲି କର୍ତ୍ତୃପକ୍ଷଙ୍କ ସୂତ୍ରରୁ ଜଣାପଡ଼ିଛି।