ଚନ୍ଦ୍ରଶେଖରପୁର : ଆଜି ମଧ୍ୟାହ୍ନ‌ରେ ଇନ୍‌ଫୋସିଟି ଛକରେ ନିଆଁ ଲାଗି ଏକ ଚଳନ୍ତା କାର୍‌ (ଓଡି-୦୨ଏନ୍-୦୧୪୩) ଜଳି ଯାଇଛି। ତେବେ ଏଥିରେ କେହି ମୃତାହତ ହୋଇ ନଥିବା ଜଣାଯାଇଛି। ନିଆଁ ଲାଗିବା କ୍ଷଣି କାର୍‌ର ଚାଳକ ଓ ପଛରେ ବସିଥିବା ୪ଜଣ ଯୁବତୀ ସେଥିରୁ ଡିଆଁ ମାରି କେଉଁଆଡ଼େ ପଳାଇଥିବା କିଛି ପ୍ରତ୍ୟକ୍ଷଦର୍ଶୀ ସୂଚନା ଦେଇଛନ୍ତି। ଖବର ପାଇ ଚନ୍ଦ୍ରଶେଖରପୁର ଦମକଳବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା। ସର୍ଟସର୍କିଟ୍‌ରୁ ଏପରି ହୋଇଥାଇପାରେ ବୋଲି ଅଗ୍ନିଶମ ବିଭାଗ ଅନୁମାନ କରୁଛି। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ହ୍ୟାଣ୍ଡବ୍ରେକ୍‌ ଦେଇ ଗାଡ଼ି ଚଲା ଯାଉଥିବାରୁ ବ୍ରେକ୍ ସୁ’ରୁ ନିଆଁ ବାହାରି ବ୍ୟାପି ଯାଇଥିଲା। ତେବେ ଏହି ଅଗ୍ନିକାଣ୍ଡ ଯୋଗୁଁ ଇନ୍‌ଫୋସିଟି ଛକରେ କିଛି ସମୟ ପାଇଁ ଟ୍ରାଫିକ୍‌ ଜାମ୍‌ ହୋଇଥିଲା। ଇନ୍‌ଫୋସିଟି ଥାନା ପୁଲିସ୍ ଟ୍ରାଫିକ୍ ନିୟନ୍ତ୍ରଣ କରିବା ସହ ଦୁର୍ଘଟଣାଗ୍ରସ୍ତ କାର୍‌କୁ କ୍ରେନ୍‌ ସାହାଯ୍ୟ‌‌ରେ ହଟାଇଥିଲା।