ସିବିଏସ୍‌ଇ ରେଜଲ୍ଟ: ଉତ୍ସାହ ବଢ଼ାଇଲା ପରୀକ୍ଷାଫଳ

ଭୁବନେଶ୍ବର: କେନ୍ଦ୍ରୀୟ ମାଧ୍ୟମିକ ଶିକ୍ଷା ପରିଷଦ (ସିବିଏସ୍‌ଇ) ଦ୍ବାରା ପରିଚାଳିତ ଦଶମ ଓ ଦ୍ବାଦଶ ଶ୍ରେଣୀ ପରୀକ୍ଷାଫଳ ପ୍ରକାଶ ପାଇଛି। ୨୦୨୪ ତୁଳନାରେ ଏଥର ରାଜ୍ୟରେ ଦଶମ ଶ୍ରେଣୀରେ ପାସ୍‌ହାର ବୃଦ୍ଧି ହୋଇଛି। ଭୁବନେଶ୍ବରରେ ଥିବା ସିବିଏସ୍‌ଇ ଅଧୀନ ବିଦ୍ୟାଳୟଗୁଡ଼ିକ ଗତବର୍ଷ ତୁଳନାରେ ଉନ୍ନତ ପ୍ରଦର୍ଶନ କରିଛନ୍ତି। ସହରର ଅଧିକାଂଶ ବିଦ୍ୟାଳୟର ପାସ୍‌ ହାର ଶତ ପ୍ରତିଶତ ଥିବାରୁ ଛାତ୍ରଛାତ୍ରୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିଲା। ପରୀକ୍ଷା ଫଳ ଜାଣିବା ପରେ ପରସ୍ପରକୁ ଶୁଭେଚ୍ଛା ଜଣାଇବା ସହ ସାଙ୍ଗସାଥୀ, ଶିକ୍ଷକ ଶିକ୍ଷୟିତ୍ରୀଙ୍କ ସହ ମିଶି ସେଲ୍ଫି ନେଇ ସ୍ମରଣୀୟ ମୁହୂର୍ତ୍ତକୁ ବାନ୍ଧି ରଖିଥିଲେ। କ୍ୟାମ୍ପସ୍‌ରେ ନିଆରା ଢଙ୍ଗରେ ଉତ୍ସବ ପାଳିତ ହୋଇଥିଲା। ଶିକ୍ଷକ ଶିକ୍ଷୟିତ୍ରୀ ମଧ୍ୟ ପିଲାମାନଙ୍କୁ ମିଠା ଖୁଆଇଥିଲେ। ରାଜ୍ୟରେ ଦ୍ବାଦଶ ଶ୍ରେଣୀରେ ପାସ୍‌ହାର ଗତବର୍ଷ ତୁଳନାରେ ହ୍ରାସ ପାଇଥିଲେ ମଧ୍ୟ ସହରର ଅଧିକାଂଶ ପିଲାଙ୍କ ପରୀକ୍ଷା ଫଳ ଭଲ ହୋଇଛି। କେତେକ ବିଦ୍ୟାଳୟ ପିଲାଙ୍କ ମାର୍କ କମିଯାଇଥିବା ଅଭିଯୋଗ କରିଛନ୍ତି। ତଥାପି ପରୀକ୍ଷାଫଳକୁ ନେଇ ବିଦ୍ୟାଳୟର ପିଲାମାନେ କ୍ୟାମ୍ପସ୍‌ରେ ଉତ୍ସବ ମନାଇଥିଲେ।

ସାଇ ଇଣ୍ଟରନ୍ୟାସନାଲ୍‌ ସ୍କୁଲ, ଓଡିଏମ୍‌ ପବ୍ଲିକ୍‌ ସ୍କୁଲ, ଡିଏଭି ସ୍କୁଲଗୁଡ଼ିକରେ ପିଲାମାନେ କୋଲ୍‌ଡ୍ରିଙ୍କ୍ସ ସ୍ପ୍ରେ’ କରି ନାଚିଥିଲେ। ଦଶମରେ ଆଶାନୁରୂପ ଫଳ ହୋଇଥିବାରୁ କିଏ କ’ଣ କରିବେ, ଏବେଠାରୁ ପ୍ରସ୍ତୁତି ଆରମ୍ଭ କରି ଦେଇଛନ୍ତି। କେଉଁଠି ଉଚ୍ଚଶିକ୍ଷା ଗ୍ରହଣ କରିବେ, କେଉଁ ବିଭାଗରେ ନାମ ଲେଖାଇବେ, ସେନେଇ ଛାତ୍ରଛାତ୍ରୀ ଓ ଅଭିଭାବକ ଯୋଜନା ପ୍ରସ୍ତୁତ କରିଛନ୍ତି। ଏମିତିକି ଇଞ୍ଜିନିୟରିଂ ଓ ମେଡିକାଲ୍‌ ପାଠ୍ୟକ୍ରମରେ କ୍ୟାରିଅର କରିବାକୁ ଚାହୁଥିବା ଛାତ୍ରଛାତ୍ରୀ ଏବେଠାରୁ ଅନ୍‌ଲାଇନ୍‌ କୋଚିଂ ନେବା ଆରମ୍ଭ କରିଦେଇଛନ୍ତି। ସନ୍ଧ୍ୟା ସୁଦ୍ଧା ମିଳିଥିବା ସୂଚନା ଅନୁଯାୟୀ ସିବିଏସ୍‌ଇ ଅଧୀନ ଭୁବନେଶ୍ବରର ୫୪ଟି ବିଦ୍ୟାଳୟ ମଧ୍ୟରୁ ୯୨% ସ୍କୁଲ ଦଶମରେ ଶତପ୍ରତିଶତ ସଫଳତା ହାସଲ କରିଛନ୍ତି। ଅଧିକାଂଶ ପରୀକ୍ଷାର୍ଥୀ ୮୦%ରୁ ଅଧିକ ନମ୍ବର ରଖି ସ୍କୁଲର ଗୌରବ ବୃଦ୍ଧି କରିଛନ୍ତି। ସହରରେ ଛାତ୍ରଙ୍କ ତୁଳନାରେ ଛାତ୍ରୀମାନେ ଭଲ ପ୍ରଦର୍ଶନ କରିଛନ୍ତି। ଘରୋଇ ବିଦ୍ୟାଳୟର ଛାତ୍ରଛାତ୍ରୀ ଶତ ପ୍ରତିଶତ ସଫଳତା ହାସଲ କରିଛନ୍ତି। କେନ୍ଦ୍ରୀୟ ବିଦ୍ୟାଳୟର ପରୀକ୍ଷାର୍ଥୀଙ୍କ ସଫଳତା ହାର ମଧ୍ୟ ବହୁତ ଭଲ ରହିଛି।