ଜୀବନ ରଙ୍ଗ: ଫିଟ୍‌ନେସ୍‌ର ନୂଆ ଠିକଣା ପାର୍କ

ସୁନ୍ଦର, ସବୁଜ ଘାସ ଗାଲିଚା ଓ ଫୁଲ ତଥା ସୋ’ ଗଛର ଭଣ୍ଡାର, ପ୍ରେମୀଯୁଗଳଙ୍କ ଆଡ଼ା ଭଳି ଚିରାଚରିତ ସଂଜ୍ଞାଠାରୁ ବର୍ତ୍ତମାନର ପାର୍କଗୁଡ଼ିକ କାହିଁ କେତେ ଆଗରେ। ଖାଲି ଆମୋଦ ପ୍ରମୋଦ କି’ ଖୁସି ଗପ ପାଇଁ ନୁହେଁ, ଆଜିକା ସ୍ମାର୍ଟ ଯୁଗରେ ପାର୍କଗୁଡ଼ିକ ନିଜକୁ ଏକ ମିନି ଫିଟ୍‌ନେସ୍‌ ସେଣ୍ଟର୍‌ରେ ପରିଣତ କରି ଦେଇଛନ୍ତି। ଏବେ ଏଠାରେ ବିଭିନ୍ନ ଜିମ୍ନାଷ୍ଟିକ୍‌ ସଂରଜାମଠାରୁ ଆରମ୍ଭ କରି ଜୁମ୍ବା, ଏରୋବିକ୍‌, ଯୋଗାଭ୍ୟାସ କରିବା ପାଇଁ ଉଚିତ ପରିବେଶ ମିଳି ପାରୁଛି। ରାଜଧାନୀରେ ଥିବା ପ୍ରାୟ ପ୍ରତି ପାର୍କରେ ସକାଳ ଓ ସଂଧ୍ୟାରେ ଏଇଥିପାଇଁ ଟୋକାଙ୍କଠାରୁ ବୁଢ଼ାଙ୍କ ପର୍ଯ୍ୟନ୍ତ ସବୁବର୍ଗର ଲୋକଙ୍କ ଭିଡ଼ ଜମୁଛି। ତା’ ସାଙ୍ଗକୁ ପାର୍କ ବାହାରେ ହର୍ବାଲ ଜୁସ୍‌ ଓ ହର୍ବାଲ ସ୍ନାକ୍ସ ସ୍ବାସ୍ଥ୍ୟ ସଚେତନ ସହରିଆଙ୍କୁ ବେଶି ଆକର୍ଷିତ କରୁଛି। ସହରୀ ସଭ୍ୟତାରେ ପାର୍କ ଏବେ ଏକ ଅବିଚ୍ଛେଦ୍ୟ ଅଙ୍ଗ ହୋଇଯାଇଛି। ପାର୍କକୁ ନେଇ ଏଥରକର ସ୍ବତନ୍ତ୍ର ଉପସ୍ଥାପନା...
ରିପୋର୍ଟ: ଦେବାଶିଷ ପଣ୍ଡା

ସୁସ୍ଥ କରୁଛି ଆକ୍ୟୁପ୍ରେସର୍‌ ଟ୍ରାକ୍‌
ସହରର ପ୍ରାୟ ସବୁ ପାର୍କରେ ସାଧାରଣ ପାଦଚଲା ଟ୍ରାକ୍‌ ସହ ଆକ୍ୟୁପ୍ରେସର୍‌ ଟ୍ରାକ୍‌ ସ୍ବାସ୍ଥ୍ୟ ସଚେତନ ସହରିଆଙ୍କୁ ନିତି ସକାଳେ ଓ ସଂଧ୍ୟାରେ ଏଠାକୁ ଟାଣି ଆଣୁଛି। ଏହି ଟ୍ରାକ୍‌ଗୁଡ଼ିକର ଲମ୍ବ ପୂର୍ବରୁ ଧାର୍ଯ୍ୟ କରାଯାଇଥିବାରୁ, ଲୋକେ ନିଜର ଫିଟ୍‌ନେସ୍‌ ଗୋଲ୍‌ ଅନୁଯାୟୀ ଏଥିରେ ନିର୍ଦ୍ଦିଷ୍ଟ ସମୟ ଓ ବାଟ ପର୍ଯ୍ୟନ୍ତ ଚଲାବୁଲା କରୁଛନ୍ତି। ଫରେଷ୍ଟ୍‌ ପାର୍କରେ ପ୍ରାତଃଭ୍ରମଣ କରୁଥିବା ବରିଷ୍ଠ ନାଗରିକ ଶିଶିର ଆଚାର୍ଯ୍ୟ ଏ ସଂପର୍କରେ କହନ୍ତି, ଫିଟ୍‌ ରହିବା ପାଇଁ ପ୍ରତିଦିନ ଚାଲିବା ଏକ ଭଲ ବ୍ୟାୟାମ। ରାସ୍ତାକଡ଼ରେ ଚାଲିବା ଅପେକ୍ଷା ପାର୍କର ସୁନ୍ଦର, ଶାନ୍ତ ପରିବେଶରେ ଚାଲିବା ସ୍ବାସ୍ଥ୍ୟପକ୍ଷେ ବେଶି ହିତକର ଓ ସୁରକ୍ଷିତ। ଶର୍ମିଳା ପଟ୍ଟନାୟକ କହନ୍ତି, ରାଜଧାନୀ ରାସ୍ତାକଡ଼ରେ ଚାଲିବା ଆଦୌ ସୁରକ୍ଷିତ ନୁହେଁ। କିନ୍ତୁ ପାର୍କରେ ସେ ସମସ୍ୟା ନାହିଁ। ଏଠାକାର ଶାନ୍ତ ପରିବେଶ ଦେହ ଓ ମନରେ ଏକ ସ୍ଫୂର୍ତ୍ତି ଆଣିଥାଏ। ଯୁବକ ସ୍ମୃତି ସ୍ବରାଜଙ୍କ କହିବାନୁସାରେ, ଏଠାରେ ଥିବା ମୋରମ୍‌ ଟ୍ରାକ୍‌ରେ ଚାଲିବା ଦ୍ବାରା ଗୋଡ଼ର ମାଂସପେଶୀ ସୁଦୃଢ଼ ହେବା ସହ ଭବିଷ୍ୟତରେ ଆଣ୍ଠୁଗଣ୍ଠି ବାତ ଭଳି ସମସ୍ୟା ଦେଖା ଦିଏନାହିଁ। ଏଣୁ ପ୍ରତିଦିନ ମୁଁ ଏ ଟ୍ରାକ୍‌ରେ ୧୦ କିଲୋମିଟର ପର୍ଯ୍ୟନ୍ତ ଚାଲେ।

ଯୋଗ ପାଇଁ ଉତ୍କୃଷ୍ଟ ସ୍ଥାନ
‌ଯୋଗାଭ୍ୟାସ ପାଇଁ ଶାନ୍ତ, କମନୀୟ ପରିବେଶର ଆବଶ୍ୟକ ହୋଇଥାଏ। ଏଥିପାଇଁ ପାର୍କଠାରୁ ଆଉ ଶ୍ରେଷ୍ଠ ଜାଗା କ’ଣ ବା ହୋଇପାରେ। ରାଜଧାନୀରେ ଥିବା ପ୍ରାୟ ୨ଶହରୁ ଊର୍ଧ୍ବ ପାର୍କରେ ପ୍ରତିଦିନ ଶହଶହ ସଂଖ୍ୟାରେ ଲୋକ ଯୋଗାଭ୍ୟାସ କରୁଛନ୍ତି। ପତଞ୍ଜଳି ସମେତ ବିଭିନ୍ନ ସଂସ୍ଥା ପକ୍ଷରୁ ଏଠାରେ ଲୋକଙ୍କୁ ମାଗଣାରେ ଯୋଗର ବିଭିନ୍ନ ମୁଦ୍ରା, ପ୍ରାଣାୟମ ସଂପର୍କରେ ଶିକ୍ଷା ଦିଆଯିବା ସହ ଅଭ୍ୟାସ କରାଯାଉଛି। ଫରେଷ୍ଟ ପାର୍କ ଯୋଗ ଶିବିରର ଯୋଗଗୁରୁ ରେବତୀ ବଲ୍ଲଭ ସାମନ୍ତରାୟଙ୍କ କହିବାନୁସାରେ, ଏଠାରେ ସପ୍ତାହ ସାରା ଭିନ୍ନଭିନ୍ନ ଯୋଗାଭ୍ୟାସ କରାଯାଉଛି। କଟିଚକ୍ର ଆସନ, ଅର୍ଦ୍ଧଚନ୍ଦ୍ରାସନ, କୋଣାସନ, ସୂର୍ଯ୍ୟ ନମସ୍କାର, ବିଶ୍ରାମ, ଭୂଜଙ୍ଗ‌ାସନ, ମକରାସନ ଓ ଶବାସନ ଆଦି ସଂପର୍କରେ ଶିକ୍ଷା ଦିଆଯାଉଛି। ପ୍ରତିଦିନ ୨୦ରୁ ୩୦ ଜଣ ଯୋଗ ଶିକ୍ଷା କରୁଛନ୍ତି। ପ୍ରାୟ ଦେଢ଼ ଘଣ୍ଟା ଧରି ପ୍ରତ୍ୟେକ ଦିନ ଏହି ଶିବିର ଅନୁଷ୍ଠିତ ହେଉଛି। ସେହିପରି ମଧୁସୂଦନ ପାର୍କରେ ସକାଳ ୫ଟାରୁ ବୟସ୍କ ଲୋକମାନେ ଯୋଗ କରୁଥିବା ଦେଖିବାକୁ ମିଳୁଛି।