୧୭ରୁ ଭୁବନେଶ୍ବରରେ ଲାଗୁ ହେବ ନାଇଟ୍ କର୍ଫ୍ୟୁ : ଏନଫୋର୍ସମେଣ୍ଟ କଡାକଡି କରିବ କମିସନରେଟ୍ ପୁଲିସ, ସହଯୋଗ ପାଇଁ ବିଏମସିର ଆହ୍ବାନ
ଭୁବନେଶ୍ବର: ଆସନ୍ତାକାଲିଠାରୁ ରାଜ୍ୟରେ ଲାଗୁହେବାକୁ ଯାଉଛି ନାଇଟ୍ କର୍ଫ୍ୟୁ । ଏହି କ୍ରମରେ ରାଜ୍ୟର ୨୦ଟି ଜିଲ୍ଲାର ସହରାଞ୍ଚଳରେ ରାତି ୯ଟା ଠାରୁ ସକାଳ ୫ଟା ପର୍ଯ୍ୟନ୍ତ ନାଇଟ୍ କର୍ଫ୍ୟୁ ରହିବ । ଏହା ସହ ଅନ୍ୟ ୧୦ଟି ଜିଲ୍ଲାରେ ସଂନ୍ଧ୍ୟା ୬ରୁ ସକାଳ ୫ଟା ପର୍ଯ୍ୟନ୍ତ ନାଇଟ୍ କର୍ଫ୍ୟୁ ରହିବ । ଏହାରି ଭିତରେ ରାଜଧାନୀରେ ନାଇଟ୍ କର୍ଫ୍ୟୁକୁ ସଫଳ କରିବାକୁ ଭୁବନେଶ୍ବର ମହାନଗର ନିଗମ (ବିଏମସି) ପକ୍ଷରୁ ଆହ୍ୱାନ ଦିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ବିଏମସି କହିଛି ଯେ, ନାଇଟ୍ କର୍ଫ୍ୟୁକୁ ନେଇ କେହି ଭୟଭୀତ ହେବାର କିଛି କାରଣ ନାହିଁ । ନାଇଟ୍ କର୍ଫ୍ୟୁ ସମୟରେ ସମସ୍ତ ଅତ୍ୟାବଶକୀୟ ସେବା ଜାରି ରହିବ । କେହି ଯେମିତି ଅସୁବିଧାରେ ସମ୍ମୁଖୀନ ନହୁଅନ୍ତି ସେନେଇ ବିଏମସି ସତର୍କ ଥିବା କଥା କହିଛି । ଅନ୍ୟପଟେ କର୍ଫ୍ୟୁକୁ ନଜରରେ ରଖି ବଜାରରେ ଭିଡ ପରିଲକ୍ଷିତ ହୋଇଛି । ଏହାକୁ ନେଇ ବିଏମସି କହିଛି କି ଅଧିକ ମାତ୍ରାରେ ଲୋକ ଭିଡ ହେଲେ କର୍ଫ୍ୟୁରୁ କିଛି ଲାଭ ମିଳିବ ନାହିଁ । ତେଣୁ ବଜାରରେ ଭିଡ କରିବା ପରିବର୍ତ୍ତେ ସମସ୍ତେ ଅନଲାଇନ୍ ଓ ହୋମ ଡେଲିଭରି ବ୍ୟବସ୍ଥାର ସୁଯୋଗ ନିଅନ୍ତୁ । ମେଡିକାଲ ସର୍ଭିସ ଓ ଏୟାରପୋର୍ଟ ପାଇଁ ଟାକ୍ସି ବ୍ୟବସ୍ଥା ରହିଛି । ତେଣୁ ଲୋକମାନେ କରୋନାର ଭୟାବହତାକୁ ଦୃଷ୍ଟିରେ ରଖି ନିଜକୁ ସୁରକ୍ଷିତ ରଖିବା ସହ ସରକାରଙ୍କୁ ସହାୟତା କରନ୍ତୁ ବୋଲି ବିଏମସି ପକ୍ଷରୁ ଅନୁରୋଧ କରାଯାଇଛି।
ଅନ୍ୟ ପକ୍ଷରେ ଭୁବନେଶ୍ବର ଓ କଟକରେ କୋଭିଡ ଏନଫୋର୍ସମେଣ୍ଟ କଡାକଡି ହେବ ବୋଲି ଭୁବନେଶ୍ୱର ଡିସିପି ଉମାଶଙ୍କର ଦାସଙ୍କ ସୂଚନା ଦେଇଛନ୍ତି। ନାଇଟ କର୍ଫ୍ୟୁକୁ କଡାକଡି କରିବା ପାଇଁ ପେଟ୍ରୋଲିଂ ବ୍ୟାପକ ହେବ ଏବଂ ଅମାନିଆଙ୍କୁ ସାବାଡ଼ କରାଯିବ ବୋଲି ସେ କହିଛନ୍ତି। ଏଥିଲାଗି ଆସନ୍ତାକାଲି କମିସନରେଟ ପୁଲିସ ପକ୍ଷରୁ ଗାଇଡ଼ଲାଇନ ଜାରି କରାଯିବ। ସନ୍ଧ୍ୟା ୮ରୁ ବ୍ୟବସାୟ ପ୍ରତିଷ୍ଠାନ ବନ୍ଦ କରିବାକୁ ଅନୁରୋଧ କରାଯାଇଛି। ୧୭ ତାରିଖ ଦିନ ମାଇକ ଯୋଗେ ପ୍ରଚାର କରାଯାଇ ଲୋକଙ୍କୁ ସଚେତନ କରାଯିବ ଏବଂ ଭୁବନେଶ୍ୱରର ୨୫ଟି ଚେକିଂ ପଏଣ୍ଟରେ ବ୍ୟାପକ ପୁଲିସ ମୁତୟନ ହେବେ।