ଭୁବନେଶ୍ୱରରେ ୭ ରେଳବାଇ କର୍ମଚାରୀଙ୍କ ସମେତ ୧୭ କରୋନା ପଜିଟିଭ, ସୁସ୍ଥ ହେଲେ ୭ ଜଣ

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ଆଜି ୧୭ ଜଣ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ସୁସ୍ଥ ହୋଇଛନ୍ତି ୭ ଜଣ ରୋଗୀ। ଭୁବନେଶ୍ୱର ମହାନଗର ନିଗମ ପକ୍ଷରୁ ଟୁଇଟ୍‌ ଜରିଆରେ ଏହି ସୂଚନା ଦିଆଯାଇଛି।

ବିଏମ୍‌ସି ଅନୁସାରେ ୧୭ ଜଣ ନୂଆ ଆକ୍ରାନ୍ତଙ୍କ ମଧ୍ୟରୁ ୧୪ ଜଣ ହୋମ୍‌ କ୍ୱାରେଣ୍ଟାଇନ୍‌ରୁ ଚିହ୍ନଟ ହୋଇଥିବା ବେଳେ ୩ ଜଣ ସ୍ଥାନୀୟ ଅଂଚଳର ବ୍ୟକ୍ତି। ସେହିଭଳି ଆଜି ଚିହ୍ନଟ ହୋଇଥିବା ୧୭ ଜଣ ଆକ୍ରାନ୍ତଙ୍କ ମଧ୍ୟରୁ ୧୩ ଜଣ ପୁରୁଷ ହୋଇଥିବା ବେଳେ ୪ ଜଣ ହେଉଛନ୍ତି ମହିଳା।

ରେଳବାଇରେ କାର୍ଯ୍ୟରତ ୭ ଜଣ ପୁରୁଷ କରୋନା ପଜିଟିଭ ଚିହ୍ନଟ ହୋଇଛନ୍ତି। ଏମାନଙ୍କ ମଧ୍ୟରେ  ତିନି ଆକ୍ରାନ୍ତଙ୍କ ବୟସ ୩୬ ବର୍ଷ  ହୋଇଥିବା ବେଳେ  ଅନ୍ୟମାନଙ୍କ ବୟସ ଯଥାକ୍ରମେ ୪୦, ୩୧, ୪୦ ଓ ୩୫ ବର୍ଷ। ଏମାନେ ନିକଟରେ ଦିଲ୍ଲୀରୁ ଫେରିଥିଲେ। ଭୁବନେଶ୍ବର ଏୟାରପୋର୍ଟ ନିକଟ ଭୀମପୁର ଅଂଚଳରୁ ଚିହ୍ନଟ ୩୪ ବର୍ଷିଅ ପୁରୁଷ ଓ ୬୨ ବର୍ଷୀୟ ମହିଳା କରୋନା ସଂକ୍ରମିତ ବ୍ୟକ୍ତିଙ୍କ ସଂସ୍ପର୍ଶରେ ଆସି ପଜିଟିଭ ଚିହ୍ନଟ ହୋଇଛନ୍ତି।

Update on newly detected & cured #COVID19 cases in the last 24 hrs under the BMC area on 17th Jun 2020(till 9am).

Further contact tracing is still continuing.
Primary contacts & nearby houses are being quarantined, sanitised & will be under active surveillance. pic.twitter.com/xF7VdSPn39

— BMC (@bmcbbsr) June 17, 2020

ସେହିପରି ଡୁମଡୁମା ହାଉସିଂ ବୋର୍ଡ କଲୋନିରୁ ଚିହ୍ନଟ ୨୫ ବର୍ଷିଅ ଯୁବକ ଦିଲ୍ଲୀରୁ ଫେରିଥିବା ବେଳେ ୨୪ ବର୍ଷୀୟ ମହିଳା ଦିଲ୍ଲୀରୁ ଫେରି ଦେୟ ସଂଗରୋଧରେ ରହୁଥିଲେ। ନୟାପଲ୍ଲୀ ସବର ସାହିର ୨୦ ବର୍ଷୀୟ ମହିଳା ଓ ୧୫ ବର୍ଷିଅ ବାଳକ ନିକଟରେ ଦିଲ୍ଲୀରୁ ଫେରିଥିଲେ।

୧୭ ଜଣ ନୂଆ କରୋନା ପଜିଟିଭଙ୍କ ମଧ୍ୟରୁ ତିନି ଜଣ ସ୍ଥାନୀୟ ଅଂଚଳରୁ ଚିହ୍ନଟ ହୋଇଛନ୍ତି। ସେମଧ୍ୟରେ ପୁରୀ କେନାଲ ରୋଡସ୍ଥିତ ନହରକଣ୍ଟାର ୨୭ ବର୍ଷିଅ ପୁରୁଷ , ସ୍ଥାନୀୟ ସରକାରୀ ହସ୍‌ପିଟାଲର କର୍ମଚାରୀ ୩୨ ବର୍ଷିଅ ପୁରୁଷ ଏବଂ  ଜୟଦେବ ବିହାର ନିକଟ ସରଣାପଲ୍ଲୀ ଅଂଚଳରେ ରହୁଥିବା ଜଣେ ୩୭ ବର୍ଷୀୟ ମହିଳା ରହିଛନ୍ତି।