ରାଜଧାନୀରେ କ୍ରାଇମ: ମହିଳାଙ୍କୁ ଆକ୍ରମଣ କରି ଲୁଟ୍‌

ଭୁବନେଶ୍ବର: ମହିଳାଙ୍କୁ ଆକ୍ରମଣ କରି ଲୁଟ୍‌ ଅଭିଯୋଗରେ କ୍ୟାପିଟାଲ୍‌ ଥାନା ପୁଲିସ ଜଣେ ଲୁଟେରାକୁ ଗିରଫ କରିଛି। ସେ ହେଲା କେଦାରପଲ୍ଲୀ ବସ୍ତିର ରାହୁଲ୍‌ ନାୟକ(୨୦)। ପୁଲିସ ତା’ଠାରୁ ଗୋଟିଏ ସ୍କୁଟି ଓ ମୋବାଇଲ୍‌ ଜବତ କରିଛି। ସୂଚନା ମୁତାବକ, ଗତ ଅଗଷ୍ଟ ୩ ତାରିଖ ରାତି ପାଖାପାଖି ୧୧ଟାରେ ଜଣେ ମହିଳା ରାଜମହଲ ଛକରେ ଯାଉଥିବା ବେଳେ ରହୁଲ୍‌ ଓ ତା’ର ସହଯୋଗୀ ବାବୁନା ଆକ୍ରମଣ କରି ‌ତାଙ୍କ ମୋବାଇଲ୍‌ ଛଡ଼ାଇ ନେଇଥିଲେ। ଏନେଇ ସେ କ୍ୟାପିଟାଲ୍‌ ଥାନାରେ ଅଭିଯୋଗ କରିଥିଲେ। ପୁଲିସ ଏକ ମାମଲା ରୁଜୁ କରି ଗତ ଅକ୍ଟୋବର ୨ରେ ବାବୁନାକୁ ଗିରଫ କରିଥିବା ବେଳେ ରାହୁଲ୍‌ ଫେରାର୍‌ ଥିଲା।

ଯୁବକଙ୍କ କାନ କାମୁଡ଼ି ଛିଡ଼ାଇ ଦେଲା ନିଶାଡ଼ି

ବାଲିଅନ୍ତା: ବାଳକାଟି ଫାଣ୍ଡି ଅଧୀନ ବୁଦ୍ଧିପଡ଼ା ଗ୍ରାମରେ ଆଜି ସଂଧ୍ୟାରେ ଜଣେ ନିଶାଡ଼ି ଉନ୍ମତ୍ତକାଣ୍ଡ ଘଟାଇଛି। ଗାଁ ଭିତରେ ଗାଳିଗୁଲଜ କରୁଥିବା ନିଶାଡ଼ିକୁ ବିରୋଧ କରିବାରୁ ସେ ଜଣେ ବ୍ୟକ୍ତିଙ୍କର କାନ ଛିଡ଼ାଇ ଦେଇଛି। ଆହତ ବ୍ୟକ୍ତି ହେଲେ ମଦନମୋହନ ଜେନା(୪୫)। ତାଙ୍କ ଡାହାଣ କାନ ତଳପାର୍ଶ୍ବରୁ କିଛି ଅଂଶ ଛିଡ଼ି ଯାଇଥିଲା।

ରକ୍ତାକ୍ତ ଅବସ୍ଥାରେ ତଳେ ପଡ଼ି ମଦନ ଚିତ୍କାର କରିଥିଲେ। ସ୍ଥାନୀୟ ଲୋକ ଛିଡ଼ି ଯାଇଥିବା କାନର ଅଂଶକୁ ଖୋଜାଖୋଜି କରିଥିଲେ ହେଁ ତାହା ମିଳି ନଥିଲା। ପରିବାରଲୋକ ମଦନ ମୋହନଙ୍କୁ ରକ୍ତାକ୍ତ ଅବସ୍ଥାରେ ଉଦ୍ଧାର କରି ଏକ ‌ଘରୋଇ ହସ୍ପିଟାଲ ନେଇଥିଲେ। ଏନେଇ ଘଟଣାସ୍ଥଳରେ ତୀବ୍ର ଉତ୍ତେଜନା ଦେଖାଦେଇଥିଲା। ସୂଚନା ଅନୁସାରେ ଆଜି ଅପରାହ୍ଣରେ ଅଭିଯୁକ୍ତ ଯୁବକ ନିଶାଗ୍ରସ୍ତ ଅବସ୍ଥାରେ ଗାଳିଗୁଲଜ କରୁଥିଲା। ମଦନ ତାକୁ ବାରଣ କରିଥିଲେ। ଏତିକି କହୁ କହୁ ନିଶାଡ଼ି ଉତ୍‌କ୍ଷିପ୍ତ ହୋଇ ମଦନଙ୍କ କାନକୁ ଜୋର୍‌ରେ କାମୁଡ଼ି ଛିଡ଼ାଇ ଦେଇଥିଲା।