ଭୁବନେଶ୍ୱର : ଗହଳ ଚହଳ ଥିଲା ଓଡ଼ିଶା ରାଜ୍ୟ ଭାରତ ସ୍କାଉଟ୍ ଓ ଗାଇଡ୍ସ୍ର ରାଜ୍ୟ କାର୍ଯ୍ୟାଳୟ। ପଡ଼ିଥିଲା କୁନି ପିଲାଙ୍କ ମିନି ମୀନାବଜାର। ମୁଡ଼ି, ମିକ୍ସଚର୍, ଚଣା, ମୁଡ଼ିକିଠାରୁ ଆରମ୍ଭ କର ଆରିିଷା, ପକୁଡ଼ି ଆଦି ସହ ଆଇସ୍କ୍ରିମ୍ ଓ ଗୁପ୍ଚୁପ୍ର କୁନି ପସରା ଖୋଲି ପିଲାମାନେ ନିଜ ଭାବକୁ ପରିପ୍ରକାଶ କରିବା ଓ ଗ୍ରାହକଙ୍କୁ ନିଜ ଆଡ଼କୁ ଆକର୍ଷିତ କରିବାର କୌଶଳ ବି ଶିଖିଥିଲେ। ପ୍ରାୟ ୫୦ଟି ଷ୍ଟଲ୍ ଖୋଲି ପିଲାମାନେ ଆଜି ମେଳାର ପରିବେଶ ସୃଷ୍ଟି କରିଥିଲେ। ଓଡ଼ିଶା ରାଜ୍ୟ ଭାରତ ସ୍କାଉଟ୍ ଓ ଗାଇଡ୍ସ୍ ସଂଗଠନ ପକ୍ଷରୁ ଆୟୋଜିତ ‘କବ୍ ବୁଲ୍ବୁଲ୍ ଉତ୍ସବ’ର ଦ୍ୱିତୀୟ ଦିନରେ ଏଭଳି ଥିଲା ପରିବେଶ। ଏଥିସହ କୁନି କବ୍ ଓ ବୁଲ୍ବୁଲ୍ମାନଙ୍କ ମଧ୍ୟରେ ବିଭିନ୍ନ ପ୍ରକାର ଖାଦ୍ୟକୁ ଚିହ୍ନିବା ପାଇଁ ଆଘ୍ରାଣ ପରୀକ୍ଷା, ସ୍ୱାଦ ପରୀକ୍ଷା, ବିଭିନ୍ନ ଶବ୍ଦକୁ ବାରି ଚିହ୍ନିବା ପାଇଁ ଶବ୍ଦ ପରୀକ୍ଷା ଓ ସ୍ମୃତି ଶକ୍ତି ପରୀକ୍ଷା ଆଦି ମଜାଦାର ଖେଳ କରାଯାଇ ପିଲାଙ୍କୁ ଶିକ୍ଷା ଦିଆଯାଇଥିଲା। ପୁଣି ଗଛ ଚଢ଼ା, କାନ୍ଥ ଚଢ଼ା, ଜାଲ ଓ ଟନେଲ ତଳେ ଗୁରୁଣ୍ଡି ଗୁରୁଣ୍ଡି ଚାଲିବା, ମଙ୍କି କ୍ରଲିଂ ଆଦି ବିଭିନ୍ନ ଦୁଃସାହାସିକ ଖେଳ ମାଧ୍ୟମରେ ପିଲାମାନଙ୍କୁ ଆତ୍ମରକ୍ଷା କୌଶଳ ତାଲିମ ଦିଆଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ଆଜିର କାର୍ଯ୍ୟକ୍ରମରେ କଣାସର ବିଇଓ ସୂର୍ଯ୍ୟନାରାୟଣ ମହାନ୍ତି ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ସ୍କାଉଟ୍ ଓ ଗାଇଡ୍ସ୍ର ରାଜ୍ୟ ମୁଖ୍ୟ କମିସନର୍ କାଳୀପ୍ରସାଦ ମିଶ୍ର ଓ ରାଜ୍ୟ ସଂପାଦକ ରାମମୂର୍ତ୍ତି ଦୋରା ଏଥିରେ ଉପସ୍ଥିତ ଥିଲେ। ରାଜ୍ୟ ଗାଇଡ୍ ସଂଗଠନର ତାଲିମ କମିସନର୍ ଅନାମିକା ଦାଶ କାର୍ଯ୍ୟକ୍ରମ ପରିଚାଳନା କରିଥିଲେ।