ହୋଟେଲକୁ ଚୂନ ଲଗାଇ ଧରାପଡ଼ିଲା ସାଇବର ଠକ, ପୁଲିସ ଅଧିକାରୀ ପରିଚୟ ଦେଇ ମଉଜମସ୍ତି
ଚନ୍ଦ୍ରଶେଖରପୁର: ବେଶ ପୋଷାକରେ ସମ୍ଭାନ୍ତ ଭଳି ଦେଖାଯାଉଥିଲା। ଚାଲିଚଳଣ ଓ କଥାବାର୍ତ୍ତାରେ ପୁଲିସ ଠାଣି। ନିଜକୁ ଜଣେ ପୁଲିସ ଅଧିକାରୀ ପରିଚୟ ଦେଇ ବିଭିନ୍ନ ତାରକା ହୋଟେଲରେ ମଉଜମସ୍ତି କରୁଥିଲା। ମାତ୍ର ବିଲ୍ ଦେବା ବେଳକୁ ଅନ୍ଲାଇନ୍ ପେମେଣ୍ଟ ଆଳରେ ହୋଟେଲକୁ ଚୂନ ଲଗାଉଥିଲା। ଏଭଳି ଜଣେ ସାଇବର ଠକକୁ ଚନ୍ଦ୍ରଶେଖରପୁର ଥାନା ପୁଲିସ ସ୍ଥାନୀୟ ଏକ ତାରକା ହୋଟେଲରୁ ଗିରଫ କରିଛି। ଠକ ଜଣକ ଆନ୍ଧ୍ରପ୍ରଦେଶ ୱାଲଟିୟରର ବୋରୋଦା ସୁଧୀର (୨୨)।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ବୋରୋଦା ଭୁବନେଶ୍ବର ଆସି ପୁଲିସ ଅଧିକାରୀ ପରିଚୟ ଦେଇ ବିଭିନ୍ନ ତାରକା ହୋଟେଲରେ ରହୁଥିଲା। ଅର୍ଥ ଦେବାବେଳେ ଅନ୍ଲାଇନ୍ ପେମେଣ୍ଟ୍ ଆଳରେ ସେ ସମ୍ପୃକ୍ତ ହୋଟେଲକୁ ଠକୁଥିଲା। ସେ ଯେଉଁ ଅର୍ଥ ଅନ୍ଲାଇନ୍ ଜରିଆରେ ଦେଉଥିଲା ତାହା ହୋଟେଲ ଆକାଉଣ୍ଟକୁ ଚାଲିଯାଉଥିବା ଦେଖାଉଥିଲା। ମାତ୍ର ଉକ୍ତ ଟଙ୍କା ହୋଟେଲ ଆକାଉଣ୍ଟକୁ ଆସୁନଥିଲା। ସେ ଗତ ୧୦ ଦିନ ମଧ୍ୟରେ ପୃଥକ ପୃଥକ ହୋଟେଲରେ ରହି ଠକେଇ କରିଥିବା ପୁଲିସ ତଦନ୍ତ ବେଳେ ଜାଣିବାକୁ ପାଇଛି। ଗତକାଲି ଜନତା ମଇଦାନ ନିକଟସ୍ଥ ଏକ ତାରକା ହୋଟେଲରେ ଅନ୍ଲାଇନ୍ ପେମେଣ୍ଟ ବେଳେ ଠକୁଥିବା ସମୟରେ ଧରାପଡ଼ିଥିଲା। ଏନେଇ ହୋଟେଲ ପକ୍ଷରୁ ପୁଲିସକୁ ସୂଚନା ଦିଆଯାଇଥିଲା। ପୁଲିସ ଠକକୁ କାବୁ କରି ପଚରାଉଚୁରା ପରେ ଘଟଣା ସମ୍ପର୍କରେ ଜଣାପଡ଼ିଥିଲା।