ଦୟାନଦୀରୁ ନିଖୋଜ ନାବାଳକଙ୍କ ମୃତଦେହ ଉଦ୍ଧାର
ଭୁବନେଶ୍ୱର: ରାଜଧାନୀ ଉପକଣ୍ଠ ଦୟାନଦୀରେ ନିଖୋଜ ଛାତ୍ରଙ୍କ ମୃତଦେହ ଉଦ୍ଧାର ହୋଇଥିବାର ଖବର ମିଳିଛି। ଆଜି ସକାଳେ ଅଗ୍ନିଶମ ବାହିନୀର ସ୍କୁବା ଡ୍ରାଇଭରମାନେ ସ୍ୱତନ୍ତ୍ର ବୋଟ ଯୋଗେ ଖୋଜାଖୋଜି ଚଳାଇଥିଲେ। କିଛି ସମୟ ପରେ ନଦୀର ଏକ ପାର୍ଶ୍ୱରୁ ଛାତ୍ରଙ୍କ ମୃତଦେହ ଉଦ୍ଧାର କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ ସୁମିତ ଗୁରୁବାର ସଂଧ୍ୟା ୫ଟା ବେଳେ ନିକଟସ୍ଥ କଲୋନିର ଅନ୍ୟ ୩ ସାଙ୍ଗଙ୍କ ସହିତ ଦୟାନଦୀକୁ ଗାଧୋଇବାକୁ ଯାଇଥିଲେ। ସେମାନେ ଲିଙ୍ଗିପୁରସ୍ଥିତ ଦେବୀଘାଟରେ ଗାଧୋଉଥିଲେ। ୩ ସାଙ୍ଗ ଉପରେ ଥିବା ବେଳେ ସୁମିତ ପ୍ରଥମେ ପାଣିକୁ ପଶି ଯାଇଥିଲେ। ପାଣିରେ ପଶି ସେ ଭାସିଯିବାର ଅଭିନୟ କରିଥିଲେ। ପାଣିରେ ହାତଗୋଡ଼ ଛାଟି ବଞ୍ଚାଅ ବଞ୍ଚାଅ ବୋଲି ପାଟି କରିଥିଲେ। ତେଣୁ ବିକଳ ହୋଇ ତିନି ସାଙ୍ଗ ପାଣିକୁ ଡେଇଁ ତାଙ୍କୁ ଟାଣି ଆଣିଥିଲେ। କିନ୍ତୁ ଉପରକୁ ଆସିବା ପରେ ସୁମିତ ମଜାରେ ଏମିତି କରୁଥିଲେ ବୋଲି କହି ସାଙ୍ଗମାନଙ୍କ ସହ ଖେଳିଥିଲେ। ଏହାପରେ ପୁଣି ସମସ୍ତେ ଏକାଠି ପାଣିରେ ପଶିଥିଲେ। ସୁମିତ୍ ଗଭୀର ପାଣିକୁ ଚାଲିଯାଇଥିଲେ ଏବଂ ପହଁରିଥିଲେ। କିନ୍ତୁ ହଠାତ୍ ସେ ପୁଣି ଭାସିଯାଇଥିଲେ। ତିନି ସାଙ୍ଗ ପ୍ରଥମେ କିଛି ବୁଝିନପାରି ଅପେକ୍ଷା କରିଥିଲେ। କିନ୍ତୁ ସତକୁ ସତ ମାତ୍ର କେଇ ମିନିଟ୍ରେ ସୁମିତ୍ ନିଖୋଜ ହୋଇଯାଇଥିଲେ।
ସୁମିତ ବୁଡ଼ିଯିବା ନିଶ୍ଚିତ ହେବା ପରେ ସାଙ୍ଗମାନେ ପାଟି କରି ସ୍ଥାନୀୟ ଲୋକଙ୍କୁ ଡାକ ପକାଇଥିଲେ। ସ୍ଥାନୀୟ ଲୋକେ ଧାଇଁ ଆସି ପାଣିରେ ପଶି ଖୋଜାଖୋଜି କରିଥିଲେ। ପରେ ଖବର ପାଇ ଧଉଳି ଥାନା ପୁଲିସ ଓ ଅଗ୍ନିଶମ ବାହିନୀ ପହଞ୍ଚିଥିଲା। ଖୋଜାଖୋଜି ପରେ ବି ଗତକାଲି ସୁମିତଙ୍କ ପତ୍ତା ମିଳିଲା ନାହିଁ।