ଝାରପଡ଼ା ଜେଲ୍‌ରେ ବିଚାରାଧୀନ ବନ୍ଦୀଙ୍କ ମୃତ୍ୟୁ: ହତ୍ୟା ଅଭିଯୋଗ ଆଣିଲେ ପରିବାର ଲୋକେ

ଭୁବନେଶ୍ବର: ଝାରପଡ଼ା ଜେଲ୍‌ରେ ପୁଣି ଜଣେ ବିଚାରାଧୀନ ବନ୍ଦୀଙ୍କ ମୃତ୍ୟୁକୁ ନେଇ ବିବାଦୀୟ ସ୍ଥିତି ଉପୁଜିଛି। ଏହା ଏକ ହତ୍ୟାକାଣ୍ଡ ବୋଲି ପରିବାର ପକ୍ଷରୁ ଅଭିଯୋଗ କରାଯାଇଛି। ମୃତ ବନ୍ଦୀ ହେଲେ ଜଟଣୀ ଉପରବସ୍ତ ଗାଁର ମୋହନ ବେହେରା(୪୦)। ୮ ତାରିଖ ଦିନ ଜଟଣୀ ପୁଲିସ ତାଙ୍କୁ ଚୋରାମଦ କାରବାର ଅଭିଯୋଗରେ ଗିରଫ କରିଥିଲା। ମୃତଦେହ‌ର ବିଭିନ୍ନ ସ୍ଥାନରେ ଥିବା ଦାଗଚିହ୍ନ ଥିବାରୁ ତାଙ୍କୁ ପିଟିପିଟି ମାରିଦିଆଯାଇଛି ବୋଲି ପରିବାର ଲୋକେ ଅଭିଯୋଗ କରିଛନ୍ତି। କିନ୍ତୁ ଜେଲ୍‌ କର୍ତ୍ତୃପକ୍ଷ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି ଏବଂ ହଠାତ୍ ଅସୁସ୍ଥ ହୋଇପଡ଼ିବାରୁ ତାଙ୍କର ମୃତ୍ୟୁ ହୋଇଛି ବୋଲି ଜେଲ ପକ୍ଷରୁ କୁହାଯାଇଛି। ସ୍ବାସ୍ଥ୍ୟାବସ୍ଥା ବିଗିଡ଼ିବା ପୂର୍ବରୁ ମୋହନଙ୍କ ଦେହ ହଠାତ୍ ଥରିବାରୁ ତାଙ୍କୁ କୌଣସି ବାତ ମାରିଥିବା ସନ୍ଦେହ କରାଯାଉଛି। ଅପରପକ୍ଷେ ଏନେଇ ତଦନ୍ତ କରାଯିବ ବୋଲି ଜେଲ୍‌ ଡିଜି କହିଛନ୍ତି।

ଡିଜି କହିଲେ ତଦନ୍ତ ହେବ

ମୋହନଙ୍କ ସାନଭାଇ ଓ ଭଉଣୀଙ୍କ କହିବା କଥା ଗତକାଲି ବିଳମ୍ବିତ ରାତିରେ ପୁଲିସ ଫୋନ୍‌ କରି ଜଣାଇଥିଲା କି ମୋହନଙ୍କ ସ୍ବାସ୍ଥ୍ୟାବସ୍ଥା ଖରାପ ଥିବାରୁ ତାଙ୍କୁ କ୍ୟାପିଟାଲ୍‌ ହସ୍ପିଟାଲ୍‌ରେ ଭର୍ତ୍ତି କରାଯାଇଛି। ଆଜି ସକାଳେ ମଧ୍ୟ ଫୋନ୍‌ କରି ତୁରନ୍ତ କ୍ୟାପିଟାଲ୍‌ ହସ୍ପିଟାଲ୍‌ରେ ପହଞ୍ଚିବାକୁ କୁହାଯାଇଥିଲା। ସେମାନେ ହସ୍ପିଟାଲ୍‌ରେ ପହଞ୍ଚିବା ପରେ ମୋହନଙ୍କ ମୃତ୍ୟୁ ହୋଇଥିବା ଜାଣିବାକୁ ପାଇଥିଲେ। ଶବ ପଞ୍ଚନାମା କରାଯିବା ବେଳେ ମୋହନଙ୍କ ଛାତି ଓ ଗୋଡ଼ରେ ଏକାଧିକ ଦାଗ ଦେଖିବାକୁ ମଳିଥିଲା। ତେଣୁ ତାଙ୍କୁ ଜେଲ୍‌ ଭିତରେ ଆକ୍ରମଣ ହୋଇଛି ବୋଲି ସେମାନେ ସନ୍ଦେହ କରିଛନ୍ତି। ପୂର୍ବରୁ ତାଙ୍କର କୌଣସି ପ୍ରକାର ବାତରୋଗ ନଥିଲା। ତେଣୁ ହଠାତ୍‌ କେମିତି ବାତରୋଗ ବାହାରିଲା ବୋଲି ପରିବାର ଲୋକେ ପ୍ରଶ୍ନ ଉଠାଇଛନ୍ତି। ତେଣୁ ଉଚ୍ଚସ୍ତରୀୟ ତଦନ୍ତ ହେଲେ ତାଙ୍କ ଭାଇର ମୃତ୍ୟୁ ପଛର ସତ୍ୟ ପଦାକୁ ଆସିବ ବୋଲି ସାନଭାଇ ଦାବି କରିଛନ୍ତି। ଏହି ଅଭିଯୋଗକୁ ଖଣ୍ଡନ କରି ଜେଲ୍‌ ଅଧୀକ୍ଷକ କହିଛନ୍ତି, କୋର୍ଟଚାଲାଣ ବେଳେ ଜଟଣୀ ଥାନା ପୁଲିସ ତାଙ୍କ ସ୍ବାସ୍ଥ୍ୟ ପରୀକ୍ଷା କରାଇଥିଲେ ଏବଂ ସେ ଜଣେ ଅଭ୍ୟାସଗତ ମଦ୍ୟପ ବୋଲି ରିପୋର୍ଟରେ ଉଲ୍ଲେଖ ରହିଛି। ୯ ତାରିଖ ଦିନ ତାଙ୍କ ଶରୀର ହଠାତ୍‌ ଥରି ଉଠିଥିଲା। ଜେଲ୍‌ ଡାକ୍ତର ଚିକିତ୍ସା କରି ଔଷଧ ଦେବା ପରେ ସେ ସୁସ୍ଥ ହୋଇଯାଇଥିଲେ। ୧୦ ତାରିଖ ରାତିରେ ତାଙ୍କ ସ୍ବାସ୍ଥ୍ୟାବସ୍ଥା ଅଧିକ ଖରାପ ହେବା ସହ ଶରୀରର ଅକ୍ସିଜେନ୍‌ ସ୍ତର ଖସିବାକୁ ଲାଗିଲା। ତେଣୁ ତାଙ୍କୁ ତୁରନ୍ତ କ୍ୟାପିଟାଲ୍‌ ହସ୍ପିଟାଲ୍‌ରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ହାଜତ ମୃତ୍ୟୁ ମାମଲା ହୋଇଥିବାରୁ ଏନ୍‌ଏଚ୍‌ଆର୍‌ସି ଗାଇଡ୍‌ଲାଇନ୍‌ ଅନୁଯାୟୀ ବ୍ୟବଚ୍ଛେଦର ଭିଡିଓଗ୍ରାଫି କରାଯାଇଛି। ଏଭଳି ଅଭିଯୋଗକୁ ନେଇ ଜେଲ୍‌ ଡିଜି ସୁଶାନ୍ତ ନାଥ କହିଛନ୍ତି ଯେ ଏହି ମାମଲାର ତଦନ୍ତ କରାଯିବ। ସୂଚନାଯୋଗ୍ୟ ଯେ ୫ ବର୍ଷ ଭିତରେ ରାଜ୍ୟର ବିଭିନ୍ନ ଜେଲ୍‌ରେ ୪୦୦ ବନ୍ଦୀଙ୍କ ମୃତ୍ୟୁ ହୋଇଛି। ମାନସିକ ଅବସ୍ଥା ବିଗିଡ଼ିବା, ବିଭିନ୍ନ ରୋଗ କିମ୍ବା ଅନ୍ୟାନ୍ୟ କାରଣରୁ ଏସବୁ ହାଜତ ମୃତ୍ୟୁ ହୋଇଛି।