ଭୁବନେଶ୍ବର: ଝାଡ଼ାବାନ୍ତିଙ୍କୁ ନେଇ ରାଜଧାନୀରେ ଭୟର ବାତାବରଣ ସୃଷ୍ଟି ହୋଇଛି। ପ୍ରଥମେ ନୀଳାଦ୍ରିବିହାର ଅଞ୍ଚଳର ନୀଳମାଧବଆବାସରେ ୧୮୨ଜଣ ଆକ୍ରାନ୍ତ ହୋଇଥିଲେ। ଏହାର ତିନି ଦିନ ପରେ ଗତକାଲି ଡୁମୁଡୁମା ଅଞ୍ଚଳର ଏକ ଘରୋଇ ଉଚ୍ଚମାଧ୍ୟମିକ ବିଦ୍ୟାଳୟ ହଷ୍ଟେଲ୍ର ୬ଜଣ ଛାତ୍ରୀ ଝାଡ଼ାବାନ୍ତିରେ ଆକ୍ରାନ୍ତ ପରେ ଏବେ ସହରବାସୀଙ୍କ ମଧ୍ୟରେ ଛନକା ପଶିଛି। ୬ଜଣ ଛାତ୍ରୀ ସୁସ୍ଥ ହୋଇ ହଷ୍ଟେଲ୍କୁ ଫେରିଥିଲେ ମଧ୍ୟ ଗୋଟିଏ ପରେ ଗୋଟିଏ ଅଞ୍ଚଳରେ ଝାଡ଼ାବାନ୍ତି ବ୍ୟାପିବାର କାରଣ ଖୋଜିବା ଏବେ ପ୍ରଶାସନ ପାଇଁ ବଡ଼ ଆହ୍ବାନ ପାଲଟିଛି। ଡୁମୁଡୁମା ଘଟଣା ପରେ ଆଜି ମେଡିକାଲ ଟିମ୍ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି। ଡାକ୍ତରୀ ଟିମ୍ ସମ୍ପୃକ୍ତ ଅଞ୍ଚଳ ଗସ୍ତ କରିବା ସହ ଖାଦ୍ୟ ଓ ପାଣି ନମୁନା ସଂଗ୍ରହ କରିଛନ୍ତି। ଛାତ୍ରୀମାନଙ୍କୁ ସଚେତନ କରାଯାଇଛି।
ଅନୁସନ୍ଧାନରୁ ଜଣାପଡ଼ିଛି ଯେ ଛାତ୍ରୀମାନେ ଶିକ୍ଷାଭ୍ରମଣରେ ନନ୍ଦନକାନନ ଯାଇଥିଲେ। ସେଠାରୁ ଫେରିବା ପରେ ଝାଡ଼ାବାନ୍ତିରେ ଆକ୍ରାନ୍ତ ହୋଇଥିଲେ। ହଷ୍ଟେଲ୍ର ଆକ୍ରାନ୍ତ ହୋଇଥିବା ୬ଜଣ ଛାତ୍ରୀ ନନ୍ଦନକାନନ ପାଖ ଏକ ଉଠାଦୋକାନରୁ ଦହିବରା ଆଳୁଦମ୍ ଖାଇଥିଲେ। ସେଠାରୁ ତାଙ୍କ ସ୍ବାସ୍ଥ୍ୟବସ୍ଥା ବିଗିଡ଼ିବା ସହ ଚିକିତ୍ସା ପାଇଁ କ୍ୟାପିଟାଲ୍ ହସ୍ପିଟାଲ୍ରେ ଭର୍ତ୍ତି ହୋଇଥିଲେ। ଝାଡ଼ାବାନ୍ତି ବ୍ୟାପିବା ଖବର ପାଇ ଭୁବନେଶ୍ବର ମହାନଗର ନିଗମ ତତ୍ପରତା ପ୍ରକାଶ କରିବା ସହ କଲେଜ ଓ ହଷ୍ଟେଲ୍ରୁ ପାଣି ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଯାଇଛି। ଉଠାଦୋକାନୀଙ୍କ ଖାଦ୍ୟ ନିୟମିତ ଯାଞ୍ଚ କରିବାକୁ ଖାଦ୍ୟ ସୁରକ୍ଷା ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଥିବା ବିଏମ୍ସି ମେୟର ସୁଲୋଚନା ଦାସ ଗଣମାଧ୍ୟମକୁ କହିଛନ୍ତି।
ଶ୍ରୀମତୀ ଦାସ କହିଛନ୍ତି ଯେ ସମ୍ପୃକ୍ତ ବିଦ୍ୟାଳୟ ହଷ୍ଟେଲ୍ରେ ମେଡିକାଲ୍ ଟିମ୍ ପହଞ୍ଚି ଯାଞ୍ଚ କରିଛନ୍ତି। ଆକ୍ରାନ୍ତଙ୍କୁ ସାଲାଇନ୍ ଓ ଔଷଧ ଦେବା ପାଇଁ ପଦକ୍ଷେପ ନିଆଯାଇଛି। ତେଣୁ ଚିନ୍ତାର କୌଣସି କାରଣ ନାହିଁ। ରାଜଧାନୀବାସୀ ଡରିବାର ବି କୌଣସି କାରଣ ନାହିଁ। ଏବେ ସମସ୍ତେ ଟିକିଏ ସାବଧାନ ହୋଇ ଚଳିବାର ଆବଶ୍ୟକତା ରହିଛି। ଯେଉଁଠି ନଳାପାଣି ରହୁଛି ତାହାକୁ କିଭଳି ପରିସ୍କାର କରାଯିବ ତାହା ଆମ ସମସ୍ତଙ୍କର ଦାୟିତ୍ବ ବୋଲି ସେ କହିଛନ୍ତି।
ରାସ୍ତାପାର୍ଶ୍ବ ଦହିବରା ଖାଇ ଝାଡ଼ାବାନ୍ତିରେ ଆକ୍ରାନ୍ତ ହୋଇଥିଲେ ଛାତ୍ରୀ
ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ସମୀକ୍ଷା ନାହିଁ
ଉଠାଦୋକାନୀଙ୍କ ଖାଦ୍ୟ ନିୟମିତ ଯାଞ୍ଚ କରିବାକୁ ନିର୍ଦ୍ଦେଶ
ମେଡିକାଲ ଅଫିସର ଡା. ଶିବପ୍ରସାଦ ପାଢ଼ୀ କହିଛନ୍ତି ଯେ ୬ଜଣ ଛାତ୍ରୀ ଅସୁସ୍ଥ ହୋଇଥିଲେ। ସେମାନେ ସୁସ୍ଥ ହୋଇ ଫେରିଛନ୍ତି। ଆମେ ଏବେ ମନିଟରିଂ କରୁଛୁ। ଏଡିପିଏଚ୍ଓ ନିଜେ ଘଟଣା ଉପରେ ନଜର ରଖିଛନ୍ତି। ଡାକ୍ତରୀ ଟିମ୍ ମଧ୍ୟ ସେଠାରେ ରହିଛନ୍ତି। ଭୁବନେଶ୍ବର ଅତିରିକ୍ତ ଜିଲ୍ଲା ସହରାଞ୍ଚଳ ଜନସ୍ବାସ୍ଥ୍ୟ ଅଧିକାରୀ ଡା. ନୀଳମଣି ସେନାପତି କହିଛନ୍ତି ହଷ୍ଟେଲ୍ରେ ୧୫୬ ପିଲା ରହୁଥିଲେ ମଧ୍ୟ ମାତ୍ର ୬ଜଣ ଆକ୍ରାନ୍ତ ହୋଇଛନ୍ତି। ବାହାର ଖାଦ୍ୟ ଖାଇବା ଦ୍ବାରା ଝାଡ଼ାବାନ୍ତି ହୋଇଛି। ଏବେ ସମସ୍ତେ ଭଲ ହୋଇଗଲେଣି। ଆମେ ଘଟଣା ଉପରେ ନଜର ରଖିଛୁ। ନୀଳମାଧବଆବାସରେ ୪ ଦିନ ହେଲା ଆଉ କେହି ଆକ୍ରାନ୍ତ ହୋଇନାହାନ୍ତି। ପିଇବା ପାଣି ବାରମ୍ବାର ପରୀକ୍ଷା କରାଯାଇଛି। ତିନି ଥର ପାଣି ପରୀକ୍ଷା ହୋଇସାରିଲାଣି। ପ୍ରଥମଥର ପାଣିର ମାନ ଖରାପ ଥିଲା। ପରବର୍ତ୍ତୀ ଦୁଇଥର ପରୀକ୍ଷାରେ ସବୁ ଠିକ୍ ରହିଛି। ଏକ ସ୍ବତନ୍ତ୍ର ଟିମ୍ ନୀଳମାଧବଆବାସ ଉପରେ ନଜର ରଖିଛନ୍ତି। ଆଉ ୭ ଦିନ ପର୍ଯ୍ୟନ୍ତ ଡାକ୍ତରୀ ଟିମ୍ ସେଠାରେ ରହିବେ ବୋଲି ଡା. ସେନାପତି କହିଛନ୍ତି। ଗୋଟିଏ ପରେ ଗୋଟିଏ ଅଞ୍ଚଳରେ ଝାଡ଼ାବାନ୍ତି ବ୍ୟାପୁଥିଲେ ମଧ୍ୟ ଏବେ ସୁଦ୍ଧା ସ୍ବାସ୍ଥ୍ୟ ବିଭାଗ ନିଦ ଭାଙ୍ଗୁନି। ସ୍ବାସ୍ଥ୍ୟମନ୍ତ୍ରୀ କିମ୍ବା ସଚିବ ଏନେଇ କୌଣସି ସମୀକ୍ଷା କରୁନାହାନ୍ତି କି ବିଏମ୍ସିର ମଧ୍ୟ ସମୀକ୍ଷା ନାହିଁ। ଆକ୍ରାନ୍ତ ବାହାରିବା ପରେ ମେୟର, ମେଡିକାଲ ଟିମ୍ ପହଞ୍ଚି ଅନୁଧ୍ୟାନ କରୁଛନ୍ତି। ଆଶ୍ବାସନା ଦେଉଛନ୍ତି। ହେଲେ ଲୋକଙ୍କୁ କିଭଳି ସଚେତନ କରାଯିବ ସେଦିଗରେ ପଦକ୍ଷେପ ନେଉନାହାନ୍ତି।