ଧଉଳି: ଆଜି ଧଉଳି ଶାନ୍ତିସ୍ତୂପ ତଳେ ହାତୀପାର୍କରେ ଦେଖିବାକୁ ମିଳିଥିଲା ଏକ ରୋଚକ ଦୃଶ୍ୟ। ପ୍ରେମୀଯୁଗଳଙ୍କ ମଧ୍ୟରେ ଲାଗିଯାଇଥିଲା ଝଗଡ଼ା ଏବଂ କଥା ହାତାହାତି ପର୍ଯ୍ୟନ୍ତ ଯାଇଥିଲା। କାରଣ ଥିଲା ଫେସ୍‌ବୁକ୍‌ର ଡିପିରେ ଥିବା ଫଟୋ। ଡିପି ଫଟୋକୁ ଦେଖି ପ୍ରେମରେ ଫସିଯାଇଥିବା ଯୁବକ ପ୍ରେମିକାର ପ୍ରକୃତ ରୂପ ଦେଖିବା ପରେ ଧୋକାର ଶିକାର ହୋଇଥିବା ଅଭିଯୋଗ କରିଥିଲେ। ଶେଷରେ ମାମଲା ଧଉଳି ଥାନାରେ ପହଞ୍ଚିଥିଲା। ବହୁ କସରତ ପରେ ମାମଲାର ଆ ପୋସ ସମାଧାନ ହେଲା। ଥାନାରେ ମାମଲା ସିନା ହେଲା ନାହିଁ, କିନ୍ତୁ ପ୍ରେମ ପାଇଁ ବିହାରରୁ ଧାଇଁ ଆସିଥିବା ପ୍ରେମିକ କାନମୁଣ୍ଡା ଆଉଁସି ଫେରିଲା। ଘଟଣାଟି ଆଜି ଧଉଳି ଅଞ୍ଚଳରେ ବେଶ୍ ଚର୍ଚ୍ଚାର ବିଷୟ ହୋଇଛି। 
ଘଟଣାଟି ଥିଲା ଏମିତି। ଫେସ୍‌ବୁକ୍‌ ମାଧ୍ୟମରେ ବିହାରୀ ଯୁବକ ଓ ଲକ୍ଷ୍ମୀସାଗର ଥାନା ଅଞ୍ଚଳର ଯୁବତୀଙ୍କ ମଧ୍ୟରେ ପ୍ରେମ ହୋଇଗଲା। ଯୁବତୀଜଣକ ନିଜ ଡିପିରେ ଅନ୍ୟ ଜଣେ ସୁନ୍ଦରୀର ଫଟୋ ରଖିବା ସହ ବିୟୁଟି ପ୍ରିୟା ବୋଲି ଲେଖିଥିଲେ। ବିହାରୀ ଯୁବକଜଣକ ଯୁବତୀଙ୍କ ସୌନ୍ଦର୍ଯ୍ୟରେ ବିମୋହିତ ହୋଇଯାଇଥିଲେ। ମାତ୍ର ପ୍ରେମିକଙ୍କ ବାରମ୍ବାର ଅନୁରୋଧ ସତ୍ତ୍ବେ ପ୍ରେମିକା ଭିଡିଓ କଲ୍‌ ଗ୍ରହଣ କରୁନଥିଲେ। ତାଙ୍କୁ ସର୍‌ପ୍ରାଇଜ୍‌ ଦେବା ପାଇଁ ପ୍ରେମିକା କହୁଥିଲେ। ବିୟୁଟି ପ୍ରିୟାଙ୍କ ପ୍ରେମରେ ଅନ୍ଧ ହୋଇଯାଇଥିବା ବିହାରୀ ଯୁବକଜଣକ ଦିନକୁ ଦିନ ବ୍ୟାକୁଳ ହୋଇପଡ଼ୁଥିଲେ। ଶେଷରେ ସେମାନେ ରଜ ପର୍ବରେ ଧଉଳିରେ ଏକାଠି ହେବେ ବୋଲି କଥା ଛିଡ଼ିଥିଲା। ତେଣୁ ଆଜି ଯୁବକଜଣକ ଧଉଳିରେ ପହଞ୍ଚିଯାଇଥିଲେ ଏବଂ ସେମାନେ ହାତୀପାର୍କରେ ଏକାଠି ହେଲେ। ମାତ୍ର ଯୁବତୀଙ୍କୁ ଦେଖୁଦେଖୁ ପ୍ରେମିକର ମନ ମରିଯାଇଥିଲା। ଡିପିରେ ଥିବା ଫଟୋର ସୌନ୍ଦର୍ଯ୍ୟ ଓ ଯୁବତୀଙ୍କ ରୂପ ମଧ୍ୟରେ ଥିଲା ଆକାଶପାତାଳ ପାର୍ଥକ୍ୟ। ଏମିତି ଧୋକା ଖାଇବା ପରେ ଯୁବକଙ୍କ ମୁଣ୍ଡକୁ ପିତ୍ତ ଚଢ଼ିଯାଇଥିଲା। ଏହାକୁ ନେଇ ସେମାନଙ୍କ ମଧ୍ୟରେ କଥା କଟାକଟି ଚାଲିଲା। ଏମିତିକି ସେମାନେ ହାତାହାତି ହେବାକୁ ପଛାଇଲେ ନାହିଁ। ପ୍ରେମୀଯୁଗଳଙ୍କ ଝଗଡ଼ା ଦେଖି ଲୋକେ ପୁଲିସକୁ ଜଣାଇଥିଲେ। ପୁଲିସ ସେମାନଙ୍କୁ ଥାନାକୁ ନେବା ପରେ ଖବର ପାଇ ଯୁବତୀଙ୍କ ପରିବାର ଲୋକେ ଥାନାରେ ପହଞ୍ଚିଥିଲେ। ଝିଅର ଏଭଳି କଦର୍ଯ୍ୟ କାଣ୍ଡକୁ ନେଇ ପରିବାର ଲୋକେ ଲଜ୍ଜାରେ କୌଣସି ଅଭିଯୋଗ କରିବାକୁ ମନା କରିଦେଇ ଫେରିଯାଇଥିଲେ।