ନେତାଙ୍କ ଜନ୍ମଦିନ ପାଳନରୁ ବିବାଦ‌, ଗୋଟିଏ ଗୋଷ୍ଠୀର ଦୁଇଛାତ୍ରଙ୍କୁ ମାଡ଼

ଭୁବନେଶ୍ବର: କ୍ୟାମ୍ପସରେ ନେତାଙ୍କ ଜନ୍ମଦିନ ଧୁମ୍‌ଧାମ୍‌ରେ ପାଳନକୁ କେନ୍ଦ୍ର କରି କିଛି ଦିନ ହେଲା କୁହୁଳୁଥିବା ଅସନ୍ତୋଷ ଆଜି ବିଜେବି କଲେଜ ଛାତ୍ର ଅଶାନ୍ତିର କାରଣ ହୋଇଛି। ଜନ୍ମଦିନ ପାଳନକୁ ବିରୋଧ କରୁଥିବା ବିପକ୍ଷ ରାଜନୈତିକ ସମର୍ଥକ ଛାତ୍ରଗୋଷ୍ଠୀ ଅପରପକ୍ଷର ଦୁଇ ଛାତ୍ରଙ୍କୁ ଆକ୍ରମଣ କରିଛନ୍ତି। ଏହାକୁ ନେଇ କଲେଜରେ ତୀବ୍ର ଉତ୍ତେଜନା ପ୍ରକାଶ ପାଇଛି। କଲେଜ ଭିତରେ ଏହାର ସମାଧାନ ହୋଇ ନପାରିବାରୁ କଥା ଥାନାକୁ ଯାଇଛି। ଦୁଇ ଗୋଷ୍ଠୀ ବଡ଼ଗଡ଼ ଥାନାରେ ପରସ୍ପର ବିରୋଧରେ ଅଭିଯୋଗ କରିଛନ୍ତି।

ମିଳିଥିବା ସୂଚନାନୁସାରେ, ଗତ ସପ୍ତାହରେ କିଛି ଛାତ୍ର କଲେଜ କ୍ୟାମ୍ପସରେ ଜଣେ କେନ୍ଦ୍ର ମନ୍ତ୍ରୀଙ୍କ ଜନ୍ମଦିନ ପାଳନ କରିଥିଲେ। ଏହି ଘଟଣାକୁ ବିପକ୍ଷ ରାଜନୈତିକ ଗୋଷ୍ଠୀ ଛାତ୍ର ସହଜରେ ଗ୍ରହଣ କରି ନଥିଲେ। ଉପରକୁ କିଛି ନ କହିଲେ ବି ଭିତରେ ଭିତରେ ସେମାନେ ଏହାର କୈଫିୟତ ତଲବ କରିବାକୁ ଚେଷ୍ଟା କରୁଥିଲେ। ଆଜି ଦିନ ପ୍ରାୟ ସାଢ଼େ ୧ଟାରେ ଇଣ୍ଟିଗ୍ରେଟେଡ୍‌ ଏମ୍‌ବିଏ (ଆଇଏମ୍‌ବିଏ)ର କିଛି ଛାତ୍ର ଆର୍ଟସ୍‌ ବ୍ଲକ ଭିତରକୁ ଯାଇଥିଲେ। ସେମାନେ ପ୍ରବେଶ କରୁଥିବା ବେଳେ ସେଠାରେ ପୂର୍ବରୁ ଅପେକ୍ଷା କରିଥିବା ୧୦ରୁ ଅଧିକ ବରିଷ୍ଠ ଛାତ୍ର ସେମାନଙ୍କୁ ଡାକିଥିଲେ। କଲେଜ କ୍ୟାମ୍ପସରେ କାହିଁକି ରାଜନେତାଙ୍କ ଜନ୍ମଦିନ ପାଳୁଛ ବୋଲି ପଚାରିଥିଲେ। ଏହାକୁ ନେଇ ଦୁଇ ଗୋଷ୍ଠୀ ମଧ୍ୟରେ କଥା କଟାକଟି ହେବାରୁ ବରିଷ୍ଠ ଛାତ୍ରମାନେ ଅପରଗୋଷ୍ଠୀର ଦୁଇ ଛାତ୍ର ରାଧା ଓ ସନ୍ଦୀପଙ୍କୁ ମାଡ଼ ମାରିଥିଲେ। ମାଡ଼ ଖାଇଥିବା ଛାତ୍ରଦ୍ବୟ ଓ ସେମାନଙ୍କ ସମର୍ଥକମାନେ ଏ ସଂପର୍କରେ ବିଭାଗୀୟ ମୁଖ୍ୟଙ୍କ ପାଖରେ ଫେରାଦ ହୋଇଥିଲେ। କିନ୍ତୁ ସେଠାରୁ ନ୍ୟାୟ ନ ମିଳିବାରୁ ସେମାନେ ବଡ଼ଗଡ଼ ଥାନାର ଦ୍ବାରସ୍ଥ ହୋଇଥିଲେ। ଏହାର କିଛି ସମୟ ପରେ ଅପରଗୋଷ୍ଠୀ ମଧ୍ୟରେ ଥାନାରେ ପାଲଟା ଅଭିଯୋଗ କରିଥିଲେ।

ଏ ସଂପର୍କରେ କଲେଜ ଅଧ୍ୟକ୍ଷ କହିଛନ୍ତି କଲେଜ ପରିସରରେ ନେତାଙ୍କ ଜନ୍ମଦିନ ପାଳନରୁ ଦୁଇ ଛାତ୍ରଗୋଷ୍ଠୀଙ୍କ ମଧ୍ୟରେ ବିବାଦ ଆରମ୍ଭ ହୋଇଥିଲା। ସେହି ଘଟଣାକୁ କେନ୍ଦ୍ର କରି ଆଜି କଲେଜ ପରିସରରେ ଅଶାନ୍ତି ସୃଷ୍ଟି ହୋଇଛି। ମାମଲାକୁ ଅତ୍ୟନ୍ତ ଗୁରୁତ୍ବର ସହ ନିଆଯାଇଛି। ଏଥିପାଇଁ ଏକ ଶୃଙ୍ଖଳା କମିଟି ଗଠନ କରାଯାଇଛି। କମିଟି ଘଟଣାର ତଦନ୍ତ କରିବ। ଯଦି କୌଣସି ଛାତ୍ର ଦୋଷୀ ସାବ୍ୟସ୍ତ ହେବେ, ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ତେବେ ଏହି ଘଟଣାରେ ଏଯାଏ କୌଣସି ମାମଲା ହୋଇନାହିଁ ବୋଲି ବଡ଼ଗଡ଼ ଥାନା ପୁଲିସ କହିଛି।