ଶୁଶ୍ରୂତ ହସ୍ପିଟାଲ ପକ୍ଷରୁ ଡାକ୍ତର ଦିବସ

ଭୁବନେଶ୍ୱର: ଶୁଶ୍ରୂତ ହସ୍ପିଟାଲ ଆଣ୍ଡ୍‌ ଟ୍ରମା କେୟାର୍‌ ପକ୍ଷରୁ ଭୁବନେଶ୍ୱର କ୍ଲବ୍‌ରେ ଡାକ୍ତର ଦିବସ ପାଳିତ ହୋଇଯାଇଛି। ହସ୍ପିଟାଲର ପରିଚାଳନା ନିର୍ଦ୍ଦେଶକ ଡାକ୍ତର ଅକ୍ଷୟ ରାଉତଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମେୟର୍‌ ସୁଲୋଚନା ଦାସ ମୁଖ୍ୟଅତିଥି, ସାଂସଦ ସୁଜିତ କୁମାର ଓ ସୁଲତା ଦେଓ ଏବଂ ବରିଷ୍ଠ ଚିକିତ୍ସକ ଡାକ୍ତର ସି.ଆର୍‌ ଦାସ ପ୍ରମୁଖ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଏହି ଅବସରରେ ଦୁର୍ଘଟଣାରେ ଗୁରୁତର ଆହତ ଜଣେ ଯୁବକଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିବାରୁ ଅଭିନେତା ସିଦ୍ଧାନ୍ତ ମହାପାତ୍ରଙ୍କୁ ଅନୁଷ୍ଠାନ ତରଫରୁ ‘ଗୋଲଡେନ୍ ହିରୋ ସମ୍ମାନ’ରେ ସମ୍ମାନିତ କରାଯାଇଥିଲା।

ଏଥିସହ ଅତିଥିମାନେ ‘ମେଡିକାଲ ଟୁରିଜିମ୍‌’ ଉପରେ ଏକ ୱେବ୍‌ସାଇଟ୍ ଉନ୍ମୋଚନ କରିଥିଲେ। କାର୍ଯ୍ୟକ୍ରମରେ ‘ପଲି ଟ୍ରମାର ପରିଚାଳନା’ ଶୀର୍ଷକ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। ଏଥିରେ ପରିଚାଳନା ନିର୍ଦ୍ଦେଶକ ଶ୍ରୀ ରାଉତ, ହାଇଦ୍ରାବାଦ ଏଆଇଜି ହସ୍ପିଟାଲର ପରିଚାଳନା ନିର୍ଦ୍ଦେଶକ ଡାକ୍ତର ନୀହାର ରଞ୍ଜନ ପ୍ରଧାନ ଓ କ୍ୟାପିଟାଲ ହସ୍ପିଟାଲର ଅର୍ଥୋପେଡିକ୍ ତଥା ବରିଷ୍ଠ ଚିକିତ୍ସକ ଡାକ୍ତର କେ.ଆର୍‌ ମହାପାତ୍ର ପ୍ରମୁଖ ଭାଗ ନେଇଥିଲେ। ଏହି ଅବସରରେ ଉଲ୍ଲେଖନୀୟ ସେବା ପାଇଁ ଡାକ୍ତରମାନଙ୍କୁ ସମ୍ମାନିତ କରାଯାଇଥିଲା। ଶେଷରେ କଣ୍ଠଶିଳ୍ପୀ ଅନିନ୍ଦିତା ଦାସ ସଂଗୀତ ପରିବେଷଣ କରିଥିଲେ। କାର୍ଯ୍ୟକ୍ରମରେ ହସ୍ପିଟାଲ୍‌ର ମୁଖ୍ୟନିର୍ବାହୀ ଅଧିକାରୀ ଡାକ୍ତର ଚିଦାତ୍ମିକା ଖଟୁଆ ଧନ୍ୟବାଦ ଦେଇଥିବା ବେଳେ ମୁନ୍‌ମୁନ୍ ସିଂ କାର୍ଯ୍ୟକ୍ରମ ସଂଯୋଜନା କରିଥିଲେ।