କମୁନି ଟ୍ରାଫିକ୍‌ ଯନ୍ତ୍ରଣା: ପୁଲିସ କମିସନର ଓ ଏସ୍‌ପ୍ଲାନେଡ୍‌ କର୍ତୃପକ୍ଷଙ୍କ ମଧ୍ୟରେ ଆଲୋଚନା

ଭୁବନେଶ୍ୱର: ରସୁଲଗଡ଼ ଶିଳ୍ପାଞ୍ଚଳକୁ ଲାଗି କରିଥିବା ସପିଂ ମଲ୍‌ ଏସ୍‌ପ୍ଲାନେଡ୍‌ ଯୋଗୁ ସୃଷ୍ଟି ହୋଇଥିବା ଟ୍ରାଫିକ ଯନ୍ତ୍ରଣାରେ ଛଟପଟ ହେଲେଣି ସ୍ଥାନୀୟ ବାସିନ୍ଦା। କେବଳ ଏତିକି ନୁହେଁ ଏବେ ରାତାରାତି ମାଳମାଳ ଉଠା ଦୋକାନ ମଧ୍ୟ ଖୋଲି ଗଲାଣି। ମଲ୍‌କୁ ଆସୁଥିବା ଲୋକ ରାସ୍ତା ଉପରେ କାର୍‌ ପାର୍କିଂ କରି ଚାଲି ଯାଉଛନ୍ତି। ଯାହା ଫଳରେ ସମସ୍ୟା ଅସମ୍ଭାଳ ହୋଇ ପଡ଼ିଲାଣି। ଏହି ସମସ୍ୟାର ସମାଧାନ ମଧ୍ୟ କମିସନରେଟ୍‌ ପୁଲିସ ପାଇଁ ମୁଣ୍ଡବ୍ୟଥାର କାରଣ ସାଜିଛି। ଏ ନେଇ ପୁଲିସ କମିସନର୍‌ ସତ୍ୟଜିତ ମହାନ୍ତି ଓ ଏସ୍‌ପ୍ଲାନେଡ୍‌ କର୍ତୃପକ୍ଷଙ୍କ ମଧ୍ୟରେ ଆଲୋଚନା ହୋଇଥିଲା। କମିସନର ଶ୍ରୀ ମହାନ୍ତି କହିଛନ୍ତି, ଆଜି ସେ ଏସ୍‌ପ୍ଲାନେଡ୍‌ ମଲ୍‌କୁ ଯାଇ ତାର ପ୍ରସ୍ଥାନ ଓ ପ୍ରବେଶ ପଥକୁ ଅନୁଧ୍ୟାନ କରିଥିଲେ। ଏସ୍‌ପ୍ଲାନେଡ୍‌ ପାଖରେ ଗଢ଼ି ଉଠିଥିବା ବେଆଇନ ଦୋକାନଗୁଡ଼ିକୁ ତୁରନ୍ତ ଉଠାଇ ଦିଆଯିବ। ଏଥିପାଇଁ ଇଡ୍‌କୋ କର୍ତୃପକ୍ଷଙ୍କ ସହିତ ଆଲୋଚନା ଚାଲିଛି। ଇଡ୍‌କୋ ଅନୁମତି ଦେଲେ ତୁରନ୍ତ ସେହି ଅଞ୍ଚଳରେ ଉଚ୍ଛେଦ କରାଯିବ ବୋଲି ଶ୍ରୀ ମହାନ୍ତି କହିଛନ୍ତି।

ଉଚ୍ଛେଦ ପାଇଁ ଇଡ୍‌କୋ ଅନୁମତିକୁ ଅପେକ୍ଷା
୨୦ ମାର୍ଶାଲ ଦେବ ଏସ୍‌ପ୍ଲାନେଡ୍‌ କର୍ତୃପକ୍ଷ
ଫଟୋ ଉଠାଇ ପଠାଇଲେ ନୋଟିସ୍‌ ହେବ

ସେହିପରି ମଲ୍‌କୁ ଆସୁଥିବା କିଛି ଲୋକ ରାସ୍ତା ପାର୍ଶ୍ୱରେ କାର୍‌ ପାର୍କିଂ କରୁଥିବା ଦେଖାଯାଇଛି। ଯାହା ଫଳରେ ସମସ୍ୟା ମଧ୍ୟ ସୃଷ୍ଟି ହେଉଛି। ଏଭଳି ପାର୍କିଂ ବନ୍ଦ କରିବାକୁ ୨୦ ଜଣ ମାର୍ଶାଲ ଯୋଗାଇବ ଏସ୍‌ପ୍ଲାନେଡ୍‌। ସେହିମାନେ ମଲ୍‌ ଚାରିପଟେ ଟ୍ରାଫିକ୍‌ ନିୟନ୍ତ୍ରଣ କରିବେ। କେହି ବାହାରେ ପାର୍କିଂ କଲେ ସେମାନଙ୍କୁ ବାରଣ କରିବେ। ଅନ୍ୟପକ୍ଷରେ ଟ୍ରାଫିକ୍‌ ପୁଲିସ ପକ୍ଷରୁ କୁହାଯାଉଛି, ସେଠାରେ ବେଆଇନ ପାର୍କିଂ କରୁଥିବା କାରଗୁଡ଼ିକୁ ଟୋଚନ୍‌ କରି ଟ୍ରାପିକ୍‌ ଥାନାକୁ ଅଣାଯିବ। ଏହା ସହିତ ଯେଉଁମାନେ କାର ପାର୍କିଂ କରିଥିବେ ସେମାନଙ୍କ କାର୍‌ ନମ୍ବରର ଫଟୋ ଆଣି ନୋଟିସ୍‌ ପଠାଯିବ ବୋଲି ଜଣେ ଅଧିକାରୀ କହିଛନ୍ତି।