କଟକ : ‘ଏକାମ୍ରକ୍ଷେତ୍ର ଆମେନିଟିଜ୍ ଓ ମନୁମେଣ୍ଟ ରିଭାଇଭାଲ ଆକ୍ସନ ପ୍ଲାନ୍’ ଅଧୀନରେ ନିର୍ମାଣ ଉଚ୍ଛେଦ ଉପରେ ହାଇକୋର୍ଟ ଅଙ୍କୁଶ ଜାରି କରିଛନ୍ତି। ଏହି ଯୋଜନା ଅଧୀନରେ ହାଇକୋର୍ଟଙ୍କ ବିନା ଅନୁମତିରେ ସରକାରଙ୍କ ପକ୍ଷରୁ ଆଉ କୌଣସି ନର୍ମାଣ ଭଙ୍ଗା ଯାଇପାରିବ ନାହିଁ। ଜଷ୍ଟିସ ସଞ୍ଜୁ ପଣ୍ଡା ଓ ଜଷ୍ଟିସ ସଂଜୀବ କୁମାର ପାଣିଗ୍ରାହୀଙ୍କୁ ନେଇ ଗଠିତ ଖଣ୍ଡପୀଠ ଏ ସଂପର୍କିତ ଏକ ମାମଲାର ଶୁଣାଣି କରି ଏପରି ନିର୍ଦ୍ଦେଶ ଦେଇଛନ୍ତି। ଆଇନଗତ ପ୍ରକ୍ରିୟା ଅନୁସରଣ ନ କରି କୌଣସି ନାଗରିକଙ୍କୁ ତାଙ୍କ ସଂପତ୍ତିରୁ ବଞ୍ଚିତ କରାଯାଇପାରିବ ନାହିଁ ବୋଲି ଖଣ୍ଡପୀଠ କହିଛନ୍ତି। ଏଥିସହ ସରକାରଙ୍କ ପକ୍ଷରୁ ଆବେଦନକାରୀଙ୍କ ଘର ଭାଙ୍ଗି ଦିଆଯିବା ପ୍ରସଂଗକୁ ନେଇ ଖଣ୍ଡପୀଠ ଅସନ୍ତୋଷ ବ୍ୟକ୍ତ କରିଛନ୍ତି। ସରକାରଙ୍କ ଏପରି କାର୍ଯ୍ୟକୁ ବିଚାରକୁ ନେଇ ଏହି ଯୋଜନାରେ ସରକାର ଆଉ କୌଣସି ନିର୍ମାଣ ଭଙ୍ଗି ପାରିବେ ନାହିଁ ବୋଲି ଖଣ୍ଡପୀଠ ସ୍ପଷ୍ଟ କରିଛନ୍ତି। ମାମଲାର ପରବର୍ତ୍ତୀ ଶୁଣାଣି ନଭେମ୍ବର ୨୦କୁ ଧାର୍ଯ୍ୟ କରାଯାଇଛି।

Advertisment

ମାମଲାର ବିବରଣୀରୁ ପ୍ରକାଶ ଯେ ଏକାମ୍ରକ୍ଷେତ୍ର ଉନ୍ନତୀକରଣ ଯୋଜନା ନାଁରେ ତାଙ୍କ ଘରକୁ ଭାଙ୍ଗି ଦେବାକୁ ପ୍ରଶାସନ ଧମକ ଦେଉଛି ବୋଲି ଦର୍ଶାଇ ଆବେଦନକାରୀ ଜେ.କର ନଭେମ୍ବର ପ୍ରଥମ ସପ୍ତାହରେ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ନିଜ ଜମି ଓ ଘର ହରାଉଥିବା ବ୍ୟକ୍ତିଙ୍କୁ ଆଇନ ଅନୁସାରେ ଥଇଥାନ କରିବା ସହିତ ଓ ଉପଯୁକ୍ତ କ୍ଷତିପୂରଣ ପ୍ରଦାନ କରାଯିବା କଥା। କିନ୍ତୁ ଥଇଥାନ ଓ କ୍ଷତିପୂରଣ ପ୍ରଦାନ ପ୍ରସଂଗରେ ପଦକ୍ଷେପ ଗ୍ରହଣ ନ କରି ପ୍ରଶାସନ ତାଙ୍କ ଘର ଉଚ୍ଛେଦ କରିବାକୁ ଧମକ ଦେଉଛି ବୋଲି ଆବେଦନରେ ଉଲ୍ଲେଖ କରାଯାଇଥିଲା। ମାମଲାର ଶୁଣାଣି ସମୟରେ ଆବେଦନକାରୀଙ୍କ ପକ୍ଷରୁ ଦର୍ଶାଯାଇଥିଲା ଯେ ନଭେମ୍ବର ୮ ତାରିଖ ଦିନ ବେଆଇନ ଭାବେ ପ୍ରଶାସନ ତାଙ୍କ ଘର ଭାଙ୍ଗି ଦେଇଛି। ଥଇଥାନ ଓ କ୍ଷତିପୂରଣ ପ୍ରଦାନ ନ କରି ପ୍ରଶାସନ ଏପରି ବେଆଇନ କାର୍ଯ୍ୟ କରିଛି ବୋଲି ଆବେଦନକାରୀଙ୍କ ପକ୍ଷରୁ ଦର୍ଶାଯାଇଥିଲା।