କରୋନାରେ ତାରକା ହୋଟେଲ୍ ପରିଚାଳକ ଜ୍ୟୋତି ବିକାଶ ଦାସଙ୍କ ପରଲୋକ
ଭୁବନେଶ୍ବର : କରୋନାର ଆତଙ୍କ ଥମୁନି। ଏହି ମହାମାରୀରେ ପୁଣି ଏକ ପରିବାର ଉପରେ ଦୁଃଖର ପାହାଡ଼ ଭାଙ୍ଗିପଡ଼ିଛି। କରୋନାରେ ସଂକ୍ରମିତ ହୋଇ ଚିକିତ୍ସାଧୀନ ଅବସ୍ଥାରେ ଭୁବନେଶ୍ବରସ୍ଥିତ ଏମ୍ପାୟର୍ସ ହୋଟେଲର ଜେନେରାଲ୍ ମ୍ୟାନେଜର ଜ୍ୟୋତି ବିକାଶ ଦାସଙ୍କ ଅକାଳ ବିୟୋଗ ଘଟିଛି। ସୋମବାର ଦିନ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ପରଲୋକ ହୋଇଥିବା ଜଣାପଡ଼ିଛି। ସେ କରୋନାରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ। ମୃତ୍ୟୁ ବେଳକୁ ତାଙ୍କୁ ମାତ୍ର ୫୫ ବର୍ଷ ବୟସ ହୋଇଥିଲା।
Sambad is now on WhatsApp
Join and get latest news updates delivered to you via WhatsApp
ଜଣେ ଦକ୍ଷ ପରିଚାଳକ ଭାବେ ପରିଚିତ ଜ୍ୟୋତି ବିକାଶ ପାଟନାସ୍ଥିତ ଇନ୍ଷ୍ଟିଚ୍ୟୁଟ୍ ଅଫ୍ ହୋଟେଲ ମ୍ୟାନେଜମେଣ୍ଟରୁ କୃତିତ୍ବର ସହ ଉତ୍ତୀର୍ଣ୍ଣ ହୋଇ ହୋଟେଲ ଶିଳ୍ପରେ ଯୋଗ ଦେଇଥିଲେ। ଜ୍ୟୋତି ବିକାଶଙ୍କର ହୋଟେଲ ପରିଚାଳନା କ୍ଷେତ୍ରରେ ବ୍ୟାପକ ଅଭିଜ୍ଞତା ରହିଥିଲା । ପ୍ରଥମେ ପୁରୀର ପ୍ରାଚୀ ହୋଟେଲରୁ ନିଜର କ୍ୟାରିୟର ଆରମ୍ଭ କରିଥିବା ଜ୍ୟୋତି ବିକାଶ ପରେ ମେ ଫେୟାର ରିସୋର୍ଟରେ ଯୋଗ ଦେଇଥିଲେ। ଏହା ପରେ ରାଜ୍ୟର ବିଭିନ୍ନ ତାରକା ହୋଟେଲରେ ସେ କାର୍ଯ୍ୟ କରିଥିଲେ। ହୋଟେଲ୍ ମେ ଫେୟାର ଗ୍ରୁପ୍ର ରାଉରକେଲା ଓ ଭୁବନେଶ୍ବର ଶାଖା ସହ ହୋଟେଲ ଗାର୍ଡେନ ଇନ୍ରେ ମଧ୍ୟ ସଫଳତାର ସହ ବିଭିନ୍ନ ଦାୟିତ୍ବ ନିର୍ବାହ କରିଥିଲେ ଜ୍ୟୋତି ବିକାଶ ଦାସ ।
୨୦୧୦ରୁ ମୃତ୍ୟୁ ପର୍ଯ୍ୟନ୍ତ ସେ ହୋଟେଲ ଏମ୍ପାୟର୍ସ, ଭୁବନେଶ୍ବରରେ ଜେନେରାଲ୍ ମ୍ୟାନେଜର ଭାବେ କାର୍ଯ୍ୟ କରୁଥିଲେ। ଜ୍ୟୋତି ବିକାଶ ଜଣେ ସ୍ନେହୀ, ବନ୍ଧୁ ବତ୍ସଳ ଓ ପରୋପକାରୀ ବ୍ୟକ୍ତି ଭାବେ ପରିଚିତ ଥିଲେ। ତାଙ୍କର ଅକାଳ ବିୟୋଗରେ ତାଙ୍କ ବନ୍ଧୁ, ସହକର୍ମୀ ଏବଂ ପରିଚିତ ମହଲରେ ଶୋକର ଛାୟା ଖେଳିଯାଇଛି। ସତ୍ୟନଗର ଶ୍ମଶାନରେ ଜ୍ୟୋତି ବିକାଶଙ୍କ ଶେଷକୃତ୍ୟୁ ସମ୍ପନ୍ନ ହୋଇଥିବା ଜଣାପଡ଼ିଛି। ସ୍ବର୍ଗତ ଦାସଙ୍କର ମା’, ପତ୍ନୀ ଓ ଦୁଇ ପୁଅ ଅଛନ୍ତି ।