ଭୁବନେଶ୍ବର: ପୁଲିସ ବେଶରେ ଜାଲ୍‌ ନୋଟ୍‌ କାରବାର, ନିଯୁକ୍ତି ନାଁରେ ଠକେଇ, ବ୍ଲକିଂ ଚେକିଂ କରି ଟଙ୍କା ଆଦାୟ କରିବା ଭଳି ଯାବତୀୟ ଜାଲିଆତି କରିଆସୁଥିଲା ଧୂର୍ତ୍ତ ମାନସ ସେନାପତି। ମାତ୍ର ଦଶମ ପଢ଼ିଥିବା ବିଚକ୍ଷଣ ମାନସ ନକଲି ଡିଏସ୍‌ପି ସାଜି ଅସଲି ପୁଲିସ ଆଖିରେ ଆଙ୍ଗୁଠି ଗେଞ୍ଜି ବଡ଼ ସାହସର ସହ ଭଦ୍ରକରୁ ଭୁବନେଶ୍ବର ପର୍ଯ୍ୟନ୍ତ ତା’ର କଳା ସାମ୍ରାଜ୍ୟ ବିସ୍ତାର କରିଥିଲା। ଶେଷରେ ଧରାପଡ଼ିଗଲା ମାନସର କାରସାଜି। ସହିଦନଗର ଥାନା ପୁଲିସ ହାବୁଡ଼ରୁ ଖସି ନପାରି ଏବେ ଜେଲ୍‌ରେ ଅଛି ନକଲି ଡିଏସ୍‌ପି ମାନସ। ଏବେ ପୁଲିସ ତା’ର କଳା ସାମ୍ରାଜ୍ୟର ଖୋଳତାଡ଼ ଚଳାଇଛି। ଆଜି ଖାରବେଳନଗର ଥାନା ମଧୁସୂଦନନଗରସ୍ଥିତ ତା’ର କାର୍ଯ୍ୟାଳୟରୁ ପୁଲିସ କମ୍ପ୍ୟୁଟର୍‌ ହାର୍ଡଡିସ୍କ ଓ ଅନ୍ୟାନ୍ୟ କାଗଜପତ୍ର ଜବତ କରିଛି। ଜବତ ହାର୍ଡଡିସ୍କକୁ ଫୋରେନ୍‌ସିକ୍‌ ଲାବ୍‌କୁ ପଠାଯିବ। ସେହିଭଳି ତା’ ମୋବାଇଲ୍‌ରୁ ବି ପୁଲିସକୁ ମିଳିଛି ବହୁ ସଂଗିନ୍‌ କଥା। ଜାଲିଆ ମାନସର ଇନ୍‌ଷ୍ଟା ଓ ଫେସ୍‌ବୁକ୍‌ ଆକାଉଣ୍ଟ ଦେଖିବା ପରେ ପୁଲିସ ତାଜୁବ ହୋଇଛି। ତେଣୁ ତାକୁ ରିମାଣ୍ଡ୍‌ରେ ଆଣି ଅଧିକ ଛାନ୍‌ଭିନ୍‌ କରିବାକୁ ପୁଲିସ ଯୋଜନା କରିଛି।  

Advertisment

ପୁଲିସ କଣ୍ଟ୍ରୋଲ୍‌ ରୁମ୍‌ରେ ଥିଲା ଅବାଧ ପ୍ରବେଶ!

ଧୂର୍ତ୍ତ ମାନସର ଇନ୍‌ଷ୍ଟା ଓ ଫେସ୍‌ବୁକ୍‌ ଆକାଉଣ୍ଟରେ ଯେଉଁ ସବୁ ଫଟୋ ଓ ଭିଡିଓ ରହିଛି, ତାକୁ ନେଇ ପୁଲିସ ଅଡ଼ୁଆରେ ପଡ଼ିଛି। ସେଥିରୁ ଜଣାପଡ଼ିଛି କି ହାଇସିକ୍ୟୁରିଟି କଣ୍ଟ୍ରୋଲ୍‌ ରୁମ୍‌ରେ ତା’ର ଅବାଧ ପ୍ରବେଶ ଥିଲା। ପୁଲିସ କଣ୍ଟ୍ରୋଲ୍‌ ରୁମ୍‌‌ରେ ବସି ସେ କମିସନରେଟ୍‌ ପୁଲିସକୁ କଣ୍ଟ୍ରୋଲ୍‌ କରୁଥିଲା। କେବଳ ସେତିକି ନୁହେଁ, ନାଇଟ୍‌ ବ୍ଲକିଂଚେକିଂରେ ବି ସେ ସାମିଲ ହେଉଥିଲା। ଆଶ୍ଚର୍ଯ୍ୟର କଥା ସେ ପୁଲିସ କଣ୍ଟ୍ରୋଲ୍‌ ରୁମ୍‌କୁ ପ୍ରବେଶ କରୁଥିଲା କେମିତି! ପୁଲିସ ବର୍ଦ୍ଦି‌ରେ ହାଇସିକ୍ୟୁରିଟି କଣ୍ଟ୍ରୋଲ୍‌ ରୁମ୍‌ରେ ପଶି ସେ ପୁଲିସ ଅଧିକାରୀ ଓ କର୍ମଚାରୀଙ୍କ ସହ ଆଲୋଚନା କରୁଥିଲା, ଅଥଚ କେହି ତାକୁ ଚିହ୍ନି ପାରୁନଥିଲେ କେମିତି? ଭଦ୍ରକରେ ଡିଏସ୍‌ପି ବେଶରେ ନାଇଟ୍‌ ବ୍ଲକିଂ ଚେକିଂ କରି ଟଙ୍କା ଆଦାୟ କରୁଥିଲା, କିନ୍ତୁ ପୁଲିସ ଜାଣିପାରୁ ନଥିଲା। ବଡ଼ କଥା ହେଉଛି ଡିଏସ୍‌ପି ପୋଷାକରେ ଭଦ୍ରକ ଏସ୍‌ପିଙ୍କ ସହ ବସି ଆଲୋଚନା କରୁଥିବାର ଫଟୋ ନିଜ ‌ଫେସ୍‌ବୁକ୍‌ ଓ ଇନ୍‌ଷ୍ଟାରେ ରହିଛି। ତେଣୁ ଉଦ୍‌ବେଗର ବିଷୟ, ପୁଲିସ କିଭଳି ଠକକୁ ଜାଣିପାରି ନଥିଲା। ଏଥିରୁ ସନ୍ଦେହ ହେଉଛି ଯେ କିଛି ବରିଷ୍ଠ ପୁଲିସ ଅଧିକାରୀଙ୍କ ସହଯୋଗରେ ମାନସ ସବୁଠି ନିର୍ଭୟରେ ପ୍ରବେଶ କରୁଥିଲା। କେଉଁ ଅଧିକାରୀଙ୍କ ସାହସରେ ସେ ଏସବୁ କରୁଥିଲା, ତାହା ଏବେ ତଦନ୍ତସାପେକ୍ଷ। ଏହାକୁ ନେଇ ଖୋଳତାଡ଼ ଆରମ୍ଭ କରିଛି କମିସନରେଟ୍‌ ପୁଲିସ। ଅନ୍ୟ ଏକ ସାଂଘାତିକ କଥା ହେଉଛି ତା’ଠାରୁ ଗୃହ ବିଭାଗ ନୋଟିଫିକେସନ୍‌ର ଏକ ଚିଠି ଜବତ ହୋଇଛି। ସେଥିରେ ୫୨ ନମ୍ବର ସିରିଏଲ୍‌ରେ ତା’ର ନାଁ ରହିଛି। କିଛି ଦିନ ତଳେ ସେ ପଦୋନ୍ନତି ପାଇଛି ବୋଲି ଏକ ଚିଠି ମଧ୍ୟ ଜବତ କରାଯାଇଛି। ଏସବୁ ନକଲି କି ନାଁ ସେନେଇ ମଧ୍ୟ ଯାଞ୍ଚ କରାଯାଉଛି। ସେହିଭଳି ତା’ ପାଖରୁ ଅନେକ ନିଯୁକ୍ତି ପତ୍ର ମଧ୍ୟ ମିଳିଛି। ସନ୍ଦେହ କରାଯାଉଛି ଯେ ସେ ବହୁ ଯୁବକ ଯୁବତୀଙ୍କୁ ଚାକିରି କରାଇବାକୁ କହି ଲକ୍ଷଲକ୍ଷ ଟଙ୍କା ଠକିଛି। ଏପର୍ଯ୍ୟନ୍ତ କେହି ଅଭିଯୋଗ କରି ନଥିଲେ ହେଁ ସେ ଦିଗରେ ମଧ୍ୟ ପୁଲିସ ଯାଞ୍ଚ କରୁଛି। ସେହିଭଳି ସେ କେଉଁଠାରୁ ଜାଲ୍‌ ନୋଟ୍‌ ପାଉଥିଲା ଏବଂ କେଉଁଠି କିଭଳି ସେସବୁକୁ ବ୍ୟବହାର କରୁଥିଲା, ସେଦିଗରେ ପୁଲିସ ତଦନ୍ତ ଆରମ୍ଭ ହୋଇଛି। 

ରବିବାର ବିଳମ୍ବିତ ରାତିରେ ସହିଦନଗର ଥାନା ପୁଲିସ ଆଇଡିବିଆଇ ଛକରେ ବ୍ଲକିଂଚେକିଂ କରୁଥିବା ବେଳେ ନକଲି ଡିଏସ୍‌ପି ମାନସ ଓ ନକଲି କନ୍‌ଷ୍ଟେବଳ ଆଶିଷ ସ୍ୱାଇଁକୁ ଗିରଫ କରିଥିଲା। ସେମାନଙ୍କ ନିକଟରୁ ମିଳିଥିବା ନକଲି ପୁଲିସ୍ ପରିଚୟ ପତ୍ରରେ ସବ୍-ଇନ୍ସପେକ୍ଟର ଓ ଭଦ୍ରକରେ ପୋଷ୍ଟିଂ ହୋଇଥିବା ଦେଖିବାକୁ ମିଳିଥିଲା। ସେଥିରେ ଭଦ୍ରକର ତତ୍କାଳୀନ ଏସ୍‌ପି ଚରଣସିଂ ମିନାଙ୍କ ଦସ୍ତଖତ ମଧ୍ୟ ଥିଲା। କିନ୍ତୁ ତାହା ନକଲି ଥିଲା ବୋଲି ଜଣାପଡ଼ିଛି।