ଓମ୍‌ଫେଡ୍‌ ପ୍ଲାଣ୍ଟରେ ନିଆଁ, ପୁରୁଣା ଫର୍ନେସର୍‌ରୁ ତେଲ ବାହାରି ଅଗ୍ନିକାଣ୍ଡ

ଚନ୍ଦ୍ରଶେଖରପୁର: ପୂର୍ବାହ୍ନ ୧୧ଟା ହେବ। ଓମ୍‌ଫେଡ୍‌ ଛକ ଆକାଶରେ ଘୋଟି ଯାଇଥିଲା କଳାଧୂଆଁ। କେହି କିଛି ବୁଝିବା ପୂର୍ବରୁ ଚନ୍ଦ୍ରଶେଖରପୁର, ବିଡିଏ କଲୋନି, ରେଳ ସଦନ, ଗଜପତି ନଗର ପ୍ରଭୃତି ଅଞ୍ଚଳରେ ଧୂଆ ମାଡ଼ି ଯାଇଥିଲା। କଳାଧୂଆଁର ଆସ୍ତରଣ ଦେଖି ଲୋକେ ଭୟଭୀତ ହେବା ସହ କେଉଁଠି ନିଆଁ ଲାଗିଲା ତାହା ଜାଣିବାକୁ ଧାଇଁଥିଲେ। ବୁଝିବାରୁ ଜଣାପଡ଼ିଲା ଯେ ଓମ୍‌ଫେଡ୍‌ ଛକ ନିକଟରେ ଥିବା ପୁରୁଣା ଓମ୍‌ଫେଡ୍‌ ପ୍ଲାଣ୍ଟରେ ଅଗ୍ନିକାଣ୍ଡ ହୋଇଛି। ମାସ ମାସ ଧରି ପଡ଼ିରହିଥିବା ଫର୍ନେସର୍‌ରୁ ତେଲ ବାହାରି ନିଆଁ ଲାଗିବାରୁ ଚାରିଆଡ଼େ ଧୂଆଁର ଆସ୍ତରଣ ଖେଳି ଯାଇଥିଲା।

ଖବର ପାଇ ଚନ୍ଦ୍ରଶେଖରପୁର ଅଗ୍ନିଶମ ବାହିନୀ ପହଞ୍ଚି ପାଣି ଓ ଫୋମ୍‌ ବ୍ୟବହାର କରି ନିଆଁକୁ ଆୟତ୍ତ କରିଥିଲେ। କର୍ମଚାରୀଙ୍କ କହିବାନୁଯାୟୀ, ବନ୍ଦ ପଡ଼ିଥିବା ଓମ୍‌ଫେଡ୍‌ ପ୍ଲାଣ୍ଟକୁ ଟେଣ୍ଡର ଦିଆଯାଇ ସ୍କାର୍ପିଂ କରାଯାଉଛି। ମାତ୍ର ପ୍ଲାଣ୍ଟ ଭିତରେ ଥିବା ଫର୍ନେସରକୁ ନଷ୍ଟ କରିବା ସମୟରେ ସେଥିରୁ ତେଲ ବାହାରି ଅଗ୍ନିକାଣ୍ଡ ଘଟିଥିଲା। ତେଲରେ ନିଆଁଲାଗି କୁହୁଳିବା ସହ ଧୂଆଁର ଏକ ବଡ଼ ଆସ୍ତରଣ ସ୍ଥାନୀୟ ଅଞ୍ଚଳରେ ବ୍ୟାପି ଯାଇଥିଲା।