ଆଉ ୫ମାସରେ ଫ୍ଲାଏଓଭର୍ ନିର୍ମାଣ ହେବ କେମିତି?
୯ ମାସ ବିଳମ୍ବରେ ଫ୍ଲାଏଓଭର କାମ ସରିବ
Sambad is now on WhatsApp
Join and get latest news updates delivered to you via WhatsApp
କଟକ-ଭୁବନେଶ୍ବର ରାସ୍ତାରେ ଡେଥ୍ ଜୋନ୍ ବା ବ୍ଲାକ୍ସ୍ପଟ୍ ଭାବେ ପରିଚିତ ହଂସପାଳ ଛକରେ ଫ୍ଲାଏଓଭର୍ କାମ ଆଗେଇ ପାରୁନି। କାମ ଆରମ୍ଭକୁ ଇତିମଧ୍ୟରେ ୧୩ମାସ ପୂରିବାକୁ ବସିଥିବା ବେଳେ ନିର୍ମାଣକାରୀ ସଂସ୍ଥା ଖମ୍ବଟିଏ ବି ଛିଡ଼ା କରିପାରିନି। ଫଳରେ କାମ ସରିବାକୁ ଆଉ ୫ମାସ ସମୟ ଥିବାବେଳେ କେମିତି ଫ୍ଲାଏଓଭର ଛିଡ଼ା ହେବ ସେ ନେଇ ପ୍ରଶ୍ନ ଉଠିଛି। ଖଣ୍ଡଗିରି ଫ୍ଲାଏଓଭର୍ ଭଳି ନିର୍ଦ୍ଧାରିତ ସମୟରେ କାମ ନ ସରିବାରୁ ତୀବ୍ର ଅସନ୍ତୋଷ ସୃଷ୍ଟି ହେଲା। ତେଣୁ ଯେମିତିସେମିତି କାମ କରି ଫ୍ଲାଏଓଭର୍ କାମ ସାରିଦେଲେ। ଆଉ ଏବେ କାମ ସରିବାର ୩ମାସ ନ ପୂରୁଣ ସ୍ଲାବ୍ ଯୋଡ଼େଇ ଭାଙ୍ଗି ଲୁହା ଛଡ଼ ପଦାକୁ ବାହାରିଆସିଥିଲା। ତେଣୁ ଭୁଲ୍ ସୁଧାରିବାକୁ ଯାଇ ପୁଣିଥରେ କାମ ଚାଲିଛି ଏବଂ ଫ୍ଲାଏଓଭରରେ ଗାଡ଼ି ଚଳାଚଳ ବନ୍ଦ ରହିଛି। ତେଣୁ ଖଣ୍ଡଗିରି ଭଳି ହଂସପାଳ ଫ୍ଲାଏଓଭରରେ ଏଭଳି ଦୁରବସ୍ଥା ଯେ ନ ହେବ ସେ କଥା କିଏ କହିବ?
ଭୁବନେଶ୍ବର : ଜାତୀୟ ରାଜପଥର ହଂସପାଳ ଛକରେ ବାରମ୍ବାର ଦୁର୍ଘଟଣା ଘଟି ଲୋକଙ୍କ ଜୀବନ ଯାଉଥିଲା। ଏକାଧିକ ମୁଣ୍ଡ ଗଡ଼ିବା ପରେ ଏଠାରେ ଅଣ୍ଡରପାସ୍ ବଦଳରେ ଫ୍ଲାଇଓଭର୍ ନିର୍ମାଣ ପାଇଁ ଦାବି ଜୋର୍ ଧରିଥିଲା। ଉତ୍ତର ଭୁବନେଶ୍ବର ପରିଷଦର ଦୀର୍ଘ ଦିନର ସଂଘର୍ଷ ସାଙ୍ଗକୁ ଭୁବନେଶ୍ବର ସାଂସଦ ଅପରାଜିତା ଷଡ଼ଙ୍ଗୀଙ୍କ ଉଦ୍ୟମ ଯୋଗୁଁ ହଂସପାଳରେ ଜାତୀୟ ରାଜପଥ ପ୍ରାଧିକରଣ(ଏନ୍ଏଚ୍ଏଆଇ) କର୍ତ୍ତୃପକ୍ଷ ଫ୍ଲାଏଓଭର୍ କରିବାକୁ ନିଷ୍ପତ୍ତି ନେଇଥିଲେ। ପ୍ରାୟ ୨୪କୋଟି ଟଙ୍କା ଖର୍ଚ୍ଚରେ ତିଆରି ହେବାକୁ ଥିବା ଏହି ଫ୍ଲାଏଓଭର୍ ୧୮ମାସରେ ଶେଷ ହେବାକୁ ଧାର୍ଯ୍ୟ କରାଯାଇଥିଲା। ୨୦୨୦ ଜୁନ୍ ୫ରୁ କାମ ଆରମ୍ଭ ହୋଇଥିବା ବେଳେ ଇତିମଧ୍ୟରେ ୧୩ମାସରୁ ଅଧିକ ସମୟ ବିତିଗଲାଣି। ହେଲେ କାମ ଆଗେଇ ପାରୁନି। ୧୩ମାସରେ ମାତ୍ର ୫.୧୧ପ୍ରତିଶତ କାମ ସରିଛି ବୋଲି ଖୋଦ୍ ଏନ୍ଏଚ୍ଏଆଇ କର୍ତ୍ତୃପକ୍ଷ କହିଛନ୍ତି। ଯାହା ଫଳରେ ଆଉ ୫ମାସରେ ଅବଶିଷ୍ଟ ୯୫ପ୍ରତିଶତ କାମ କେମିତି ସରିବ ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି।
ତେବେ ଏନେଇ କର୍ତ୍ତୃପକ୍ଷଙ୍କ କହିବା କଥା ହେଉଛି, କରୋନା କଟକଣା ପାଇଁ କାମ ସଠିକ୍ ଭାବରେ ହୋଇପାରିଲାନି। ଏହା ସହିତ ହରିଜନ ସାହି ଓ ପାଇପ୍ ଲାଇନ୍ ଉଠିବାକୁ ୬ମାସ ଲାଗିଗଲା। ଫଳରେ କାମର ଅଗ୍ରଗତି ହୋଇପାରିଲାନି। ତେଣୁ ଡିସେମ୍ବର ମାସରେ ସରିବାକୁ ଥିବା ଏହି କାମ ଆହୁରି ୯ମାସ ବିଳମ୍ବ ହେବ। ଅର୍ଥାତ୍ ହଂସପାଳ ଫ୍ଲାଏଓଭର୍ ୧୮ମାସ ନୁହେଁ; ୨୭ମାସରେ ସରିବ ବୋଲି ଏନ୍ଏଚ୍ଏଆଇ କର୍ତ୍ତୃପକ୍ଷ ସ୍ପଷ୍ଟ କରିଛନ୍ତି।
ହଂସପାଳ ଫ୍ଲାଏଓଭର୍ରେ ଉତ୍ତର ଭୁବନେଶ୍ବରର ନହରକଣ୍ଟା, ହରିଦାସପୁର, ରୁଦ୍ରପୁର, ସୁନ୍ଦରପାଟଣା, ବଙ୍ଗୁଆରୀ, ହଂସପାଳ, ବାଲିଅନ୍ତା, ଭିଙ୍ଗାରପୁର ପ୍ରମୁଖ ଅଞ୍ଚଳର ଲୋକମାନେ ନିର୍ଭରଶୀଳ। ତେଣୁ ଏନ୍ଏଚ୍ଏଆଇ ଫ୍ଲାଏଓଭର୍ରେ ୩ଟି ସ୍ପାନ୍ ନିର୍ମାଣ କରିବାକୁ ସ୍ଥିର କରିଛି। ପ୍ରତିଟି ସ୍ପାନ ୨୫ମିଟର ହିସାବରେ ମୋଟ ୭୫ ମିଟର ସ୍ପାନ ରହିବ। ପ୍ରାୟ ୬୨୫ମିଟରର ଜାତୀୟ ରାଜପଥ କାମ ହେବାକୁ ଥିବା ବେଳେ ସେଥିମଧ୍ୟରୁ ବ୍ରିଜ୍ ୪୮୦ମିଟର ଲମ୍ବା ରହିବ। ବ୍ରିଜ୍ର ଚଉଡ଼ା ୩୩ମିଟର ରହିଥିବା ବେଳେ ଗାଡ଼ି ଯାତାୟାତ ପାଇଁ ଉଭୟ ପାର୍ଶ୍ବରେ ୧୦.୫ମିଟର ଚଉଡ଼ାର ରାସ୍ତା ନିର୍ମାଣ କରାଯିବ। ଏହା ସହିତ ଭୁବନେଶ୍ବରରୁ ଚଣ୍ଡିଖୋଲ ଯିବା ରାସ୍ତାରେ ବାମ ପାର୍ଶ୍ବରେ କୁଆଖାଇ ସେତୁର ୭.୫ମିଟର ଲମ୍ବର ଏକ ରାମ୍ପ୍ ନିର୍ମାଣ କରାଯିବ। ଏହି ରାମ୍ପ୍କୁ ବାମ ପାର୍ଶ୍ବରେ ଥିବା ଫ୍ଲାଏଓଭର୍ ସହିତ ସଂଯୁକ୍ତ କରାଯିବ। ସେହିଭଳି ଫ୍ଲାଏଓଭର୍ର ଉଭୟ ପାର୍ଶ୍ବରେ ୭.୫ମିଟର ଚଉଡ଼ାର ସର୍ଭିସ୍ ରୋଡ୍ ରହିବ। ବର୍ଷାଜଳ ନିଷ୍କାସନ ପାଇଁ ଉଭୟ ପାର୍ଶ୍ବରେ ଡ୍ରେନ୍ ମଧ୍ୟ ନିର୍ମାଣ କରାଯିବ। ସେହିଭଳି ବ୍ରିଜ୍ରେ ସର୍ବମୋଟ ୪ଟି ପିୟର୍ ଓ ୪ ଆବେଟମେଣ୍ଟ୍ ନିର୍ମାଣ କରାଯିବ।