ଟ୍ରକ୍ ଧକ୍କାରେ ୨ କାର୍‌ ଚୂରମାର୍‌, ୪ ଆହତ

ଚନ୍ଦ୍ରଶେଖରପୁର : ଡମଣା ଟ୍ରାଫିକ୍‌ ଛକ ନିକଟରେ ଶନିବାର ଦିନ ଏକ ଭୟଙ୍କର ଦୁର୍ଘଟଣା ଘଟିଛି। ଟ୍ରାଫିକ୍‌ ଛକ ନିକଟରେ ଠିଆ ହୋଇଥିବା ଏକ ବଲେରୋ ଓ ମାରୁତି କାର୍‌କୁ ପଛରୁ ଏକ ଟ୍ରକ୍‌ ଧକ୍କା ଦେବାରୁ ଗାଡ଼ି ଦୁଇଟି ଚୂରମାର୍‌ ହୋଇଯାଇଛି। ଦୁର୍ଘଟଣାରେ ଟ୍ରକ୍‌ ଓ କାର୍‌ ଚାଳକଙ୍କ ସମେତ ବଲେରୋରେ ଥିବା ଶଶିଭୂଷଣ ଦାସ ଓ ତାଙ୍କ ଝିଅ ଗୁରୁତର ଆହତ ହୋଇଛନ୍ତି। ଚନ୍ଦ୍ରଶେଖରପୁର ଥାନା ପିସିଆର୍‌ ଘଟଣାସ୍ଥଳରେ ପହଞ୍ଚି ସେମାନଙ୍କୁ ନିକଟସ୍ଥ ଏକ ହସ୍ପିଟାଲରେ ଭର୍ତ୍ତି କରାଇଥିଲା। ତେବେ ଶଶିଭୂଷଣଙ୍କ ଝିଅଙ୍କ ସ୍ବାସ୍ଥ୍ୟାବସ୍ଥା ସଂକଟାପନ୍ନ ଥିବା ଜଣାଯାଇଛି। ତାଙ୍କ ଅଣ୍ଟାରେ ଗଭୀର ଆଘାତ ଲାଗିଛି।

ସୂଚନାନୁଯାୟୀ, ଶନିବାର ପୂର୍ବାହ୍ନ ପ୍ରାୟ ସାଢ଼େ ୧୦ଟା ବେଳେ ଡମଣା ଟ୍ରାଫିକ୍‌ ଛକ ନିକଟରେ କାର୍‌ ଓ ବଲେରୋ ଠିଆ ହୋଇଥିଲା। ସେହି ସମୟରେ ପଛରୁ ଦ୍ରୁତ ଗତିରେ ଆସୁଥିବା ଟ୍ରକ୍‌ଟି ନିୟନ୍ତ୍ରଣ ହରାଇ ଦୁଇ ଗାଡ଼ିକୁ ଧକ୍କା ଦେଇଥିଲା। ଏହାକୁ ନେଇ ଘଟଣାସ୍ଥଳରେ ସମାୟିକ ଉତ୍ତେଜନା ପ୍ରକାଶ ପାଇଥିଲା। ପୁଲିସ ଗାଡ଼ି ଦୁଇଟିକୁ ରାସ୍ତା ଉପରୁ ହଟାଇବା ସହ ଟ୍ରାଫିକ୍‌ସ୍ଥିତି ସ୍ବାଭାବିକ ହୋଇଥିଲା।