ଗଣ୍ଡମୁଣ୍ଡା ହାଟ: ୧୭୪ରୁ ଦୋକାନରୁ ୧୫୧ ଖୋଲୁନି

ଖଣ୍ଡଗିରି: ୨୦୦୯ ମସିହାରେ ଗଣ୍ଡମୁଣ୍ଡାରେ ୭୦ ଲକ୍ଷ ଟଙ୍କା ଖର୍ଚ୍ଚ କରି ବିଏମ୍‌ସି ତିଆରି କରିଥିବା ହାଟ ଏବେ ଅବହେଳିତ ଅବସ୍ଥାରେ ପଡ଼ିରହିଛି। ଏକଦା ଏହି ଅଞ୍ଚଳର ଲୋକପ୍ରିୟ ହୋଇଥିବା ଦୈନିକ ହାଟ ଏବେ ସାପ୍ତାହିକ ବସୁଛି। ୧୭୪ ବେପାରୀରୁ ଏବେ ପାଖାପାଖି ୨୩ ଜଣ ଆସୁଛନ୍ତି। ଏହାକୁ ଚଳଚଞ୍ଚଳ କରିବାକୁ ବିଏମ୍‌ସି ଯେତେ ଯୋଜନା କରିଛି ସବୁ ଫେଲ୍‌ ମାରିଛି। ବ୍ୟବସାୟୀଙ୍କୁ ଜିନିଷ ରଖିବା ସୁବିଧା ନ ହେବାରୁ ପୁନରୁଦ୍ଧାର ନାମରେ ଦୁଇବର୍ଷ ହେଲାଣି ଦୋକାନଘର ନିର୍ମାଣ ଓ ମରାମତି ଚାଲିଛି। 

ଜଗମୋହନନଗର, ଆଇଟିଇଆର୍, ଗଣ୍ଡମୁଣ୍ଡା, ପୋଖରୀପୁଟ ଓ ଏହାର ଆଖପାଖ ଅଞ୍ଚଳର ଲୋକ ଏହି ହାଟ ଉପରେ ନିର୍ଭର କରୁଛନ୍ତି। ପ୍ରଥମରୁ କିଛି ଦିନ ବେପାର ଚାଲିଲା। କିନ୍ତୁ ପରବର୍ତ୍ତୀ ସମୟରେ ବେପାର ନ ହେବାରୁ ବେପାରୀମାନେ ହାଟ ପିଣ୍ଡି ବନ୍ଦ କରି ରାସ୍ତାକଡ଼କୁ ଚାଲିଗଲେ। ୨୦୧୯ ମସିହାରେ ୬୪ଟି ପିଣ୍ଡି ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ଆବଣ୍ଟନ ହୋଇଥିଲା। କିନ୍ତୁ ସର୍ବନିମ୍ନ ସୁବିଧା ନ ଥିବାରୁ ମହିଳାମାନେ ମଧ୍ୟ ଦୋକାନ ଖୋଲି ନଥିଲେ। ବର୍ତ୍ତମାନ ୧୯ ଜଣ ସକାଳେ ଦୋକାନ ଖୋଲୁଥିବା ବେଳେ ଆଲୋକୀକରଣ ବ୍ୟବସ୍ଥା ନଥିବାରୁ ସନ୍ଧ୍ୟାରେ ଦୋକାନ ବନ୍ଦ କରିବାକୁ ବାଧ୍ୟ ହେଉଛନ୍ତି। ଅନ୍ଧାର ସହ ଦୋକାନ ବନ୍ଦ ରହୁଥିବାରୁ ପିଣ୍ଡିଗୁଡ଼ିକ ମଦ୍ୟପଙ୍କ ଆଡ଼ାସ୍ଥଳ ପାଲଟିଯାଇଛି।୨୦୨୩ରେ ହାଟକୁ କାର୍ଯ୍ୟକ୍ଷମ କରିବାପାଇଁ ବିଏମ୍‌ସି ପଦକ୍ଷେପ ନେଇଥିଲା।

ଦୈନିକ ହାଟ ପାଲଟିଲାଣି ସାପ୍ତାହିକ
ସରୁନି ପୁନରୁଦ୍ଧାର କାମ

ଜାଗମରାରୁ ପୋଖରୀପୁଟ ପର୍ଯ୍ୟନ୍ତ ରାସ୍ତାକୁ ନୋ ଭେଣ୍ଡିଂ ଜୋନ୍‌ ଘୋଷଣା କରାଯିବା ସହ ଲଟେରି ମାଧ୍ୟମରେ ବ୍ୟବସାୟୀଙ୍କୁ ପିଣ୍ଡି ଆବଣ୍ଟନ କରିବାକୁ ଘୋଷଣା ହୋଇଥିଲା। ୩ ମାସ ମଧ୍ୟରେ ଏହାର ପୁନରୁଦ୍ଧାର କରାଯାଇ ଆବଣ୍ଟନ କରାଯିବାକୁ ପ୍ରତିଶ୍ରୁତି ଦିଆଯାଇଥିଲା। କିନ୍ତୁ ପୁନରୁଦ୍ଧାର କାର୍ଯ୍ୟ ବିଳମ୍ବ ହୋଇଥିଲା ବେଳେ ଏବେବି ମରାମତି କାମ ଚାଲିଛି। ଏ ନେଇ ହାଟ ଦାୟିତ୍ୱରେ ଥିବା ଡେପୁଟି କମିସନର ରୁବୀ ବେହେରା କହିଛନ୍ତି, ପିଣ୍ଡି ଭଙ୍ଗା ଯାଇ ଏବେ ସେଗୁଡିକୁ ଦୋକାନଘରରେ ପରିଣତ କରାଯାଉଛି। ଏବେ ୧୫୫ ଦୋକାନଘର ଫାଙ୍କା ଅଛି। ସେଗୁଡିକୁ ବିଜ୍ଞାପନ ଜରିଆରେ ବ୍ୟବସାୟୀଙ୍କୁ ଆବଣ୍ଟନ କରିବାକୁ କର୍ପୋରେସନ ନିଷ୍ପତ୍ତି ନେଇଛି।