ବନ୍ଧାହେଲେ ଗଞ୍ଜେଇ ବେପାରୀ ବାବା ଓ ଚେଲା

ଚନ୍ଦ୍ରଶେଖରପୁର: ବଡ଼ ସୁନ୍ଦର ଭାବେ ସେମାନେ ବାବା ଓ ଚେଲାର ଅଭିନୟ କରୁଥିଲେ। ମଠ ମନ୍ଦିର ବୁଲିବୁଲି ନୀତିବାଣୀ ଶୁଣାଉଥିଲେ। କିନ୍ତୁ ଭିତିରି କାରବାର ଥିଲା ଭିନ୍ନ। ନକଲି ବାବା-ଚେଲା ବେଶରେ ସେମାନେ ଗଞ୍ଜେଇ ଚାଲାଣ ଚଳାଇଥିଲେ। କନ୍ଧମାଳରୁ ଗଞ୍ଜେଇ ଆଣି ରାଜଧାନୀରେ ବିକୁଥିଲେ। ଏମିତି ଛଦ୍ମବେଶୀ ବାବା ଓ ଚେଲା ଶେଷରେ ଧରାପଡ଼ିଛନ୍ତି। ଚନ୍ଦ୍ରଶେଖରପୁର ଥାନା ପୁଲିସ୍ ହାତରେ ଧରାପଡ଼ିଥିବା ଅଭିଯୁକ୍ତଦ୍ବୟ ହେଲେ ବିଚିତ୍ର ପଣ୍ଡା (୫୫) ଓ ଉତ୍ତମ ମହାନ୍ତି (୨୮)। ପୁଲିସ ସେମାନଙ୍କଠାରୁ ୧୦ କେଜିରୁ ଅଧିକ ଗଞ୍ଜେଇ ଜବତ କରିଛି।

ବାବା ବିଚିତ୍ର ଓ ଚେଲା ଉତ୍ତମ କାନନବିହାର ଫେଜ୍‌-୨ରେ ଏକ ଭଡ଼ା ଘର ନେଇ ରହୁଥିଲେ। ସେମାନେ କନ୍ଧମାଳରୁ ଗଞ୍ଜେଇ ଆଣି ଉକ୍ତ ଭଡ଼ା ଘରେ ରଖୁଥିଲେ। ବାବା ବିଚିତ୍ର ଓ ଚେଲା ଉତ୍ତମ ରାଜଧାନୀର ବିଭିନ୍ନ ମଠ ମନ୍ଦିର ବୁଲିବୁଲି ଧର୍ମବାଣୀ ପ୍ରଚାର କରିବା ବାହାନାରେ ଗଞ୍ଜେଇ ବିକୁଥିବା ଛୋଟ ବେପାରୀଙ୍କୁ ଟାର୍ଗେଟ୍‌ କରୁଥିଲେ। ପରେ ସେମାନଙ୍କୁ ଗଞ୍ଜେଇ ଯୋଗାଉଥିଲେ। ବାବା ବିଚିତ୍ରର ଏହି କାରନାମା ଜଣାପଡ଼ୁନଥିଲା। କିନ୍ତୁ କୌଣସି ସୂତ୍ରରୁ ଏହି ଖବର ଚନ୍ଦ୍ରଶେଖରପୁର ଥାନା ପୁଲିସ୍ ନିକଟରେ ପହଞ୍ଚିଥିଲା। ଆଜି ସକାଳୁ ସକାଳୁ ପୁଲିସ ଟିମ୍‌ ଅତର୍କିତ ଭାବେ ବାବା ବିଚିତ୍ର ରହୁଥିବା ଘରେ ଚଢ଼ଉ କରିଥିଲା। ଆଜି ବାବା ଓ ଚେଲା ଉଭୟଙ୍କୁ କୋର୍ଟ ଚାଲାଣ କରାଯାଇଛି।