ଭୁବନେଶ୍ବର: ଶତାବ୍ଦୀର କଳାକାରର ସୁବର୍ଣ୍ଣ ଜୟନ୍ତୀ ଅବସରରେ ରବୀନ୍ଦ୍ରମଣ୍ଡପରେ ମଞ୍ଚସ୍ଥ ବହୁଚର୍ଚ୍ଚିତ ହୃଦୟସ୍ପର୍ଶୀ  ନାଟକ ‘ବାଞ୍ଛାର ବଗିଚା’ ଆଜି ଉପସ୍ଥିତ ଦର୍ଶକଙ୍କୁ ବେଶ୍‌ ଭାବବିହ୍ବଳ କରିଥିଲା। ଏହି ନାଟକ ୪୫ ବର୍ଷ ପୂର୍ବେ ଶତାବ୍ଦୀର କଳାକାର ମଞ୍ଚସ୍ଥ କରିଥିବା ବେଳେ ଆଜି ନାଟକଟି ୧୭୭ ଥର ପାଇଁ ମଞ୍ଚସ୍ଥ ହୋଇଥିଲା। ବାଞ୍ଛା ଭୂମିକାରେ ଅଭିନୟ କରୁଥିବା ବୃନ୍ଦାବନ ବାରିକ ଏ ନାଟକରେ ପ୍ରଥମରୁ ଅଭିନୟ କରୁଛନ୍ତି। ୯୫ ବର୍ଷ ବୟସରେ ମଧ୍ୟ ଅଭିନୟରେ ସେ ଦର୍ଶକଙ୍କୁ ଚକିତ କରିଥିଲେ। 

Advertisment

ବାଞ୍ଛାର ସୁନ୍ଦର ବଗିଚା ନେବାକୁ ଜମିଦାର ଛକଡ଼ି ମହାନ୍ତି ବହୁ ଚେଷ୍ଟା କରି ଶେଷରେ ମୃତ୍ୟୁବରଣ କରନ୍ତି। ପୁଅ ନକଡ଼ି ମହାନ୍ତି ବାପାର ଅପୂର୍ଣ୍ଣ ଇଚ୍ଛାକୁ ପୂରଣ କରିବାକୁ ଲାଗିପଡ଼େ। ୯୫ ବର୍ଷର ରୋଗାଗ୍ରସ୍ତ ବାଞ୍ଛାକୁ ପ୍ରଲୋଭିତ କରି ଏକ ଚୁକ୍ତିପତ୍ର କରିନିଏ। ଚୁକ୍ତି ଅନୁସାରେ ବାଞ୍ଛା ବଞ୍ଚିଥିବା ପର୍ଯ୍ୟନ୍ତ ମାସକୁ ୨୦୦ ଟଙ୍କା ପାଇବ ଓ ମୃତ୍ୟୁ ପରେ ବଗିଚାର ମାଲିକାନା ଜମିଦାର ହାତକୁ ଚାଲିଯିବ। ଯଦି ଜମିଦାର ପୂର୍ବରୁ ମରିଯାଏ ତେବେ ବଗିଚା ବାଞ୍ଛାର ହୋଇରହିବ। ମରଣଦୁଆରେ ବସିଥ‌ିବା ବାଞ୍ଛା ଯେ ଖୁବ ଶୀଘ୍ର ଆରପାରିକୁ ଚାଲିଯିବ, ଏକଥା ଭାବି ଆନନ୍ଦରେ ଆତ୍ମହରା ହୋଇ ବାଞ୍ଛାର ମୃତ୍ୟୁକୁ ଅପେକ୍ଷା କରିଥା’ନ୍ତି ଜମିଦାର।  ହଠାତ ଆର୍ବିଭାବ ହୁଅନ୍ତି ବାଞ୍ଛାଙ୍କ ନାତୁଣୀ ବୋହୂ ପଦ୍ମା। ତାଙ୍କ ସେବାରେ ସୁସ୍ଥ ହୋଇଉଠନ୍ତି ବାଞ୍ଛା। ଏହା ଜାଣିବା ପରେ ଛକଡି ମହାନ୍ତିଙ୍କର ହୃଦ୍‌ଘାତରେ ମୃତ୍ୟୁ ହୁଏ। ଧନବଳରେ ଜୀବନକୁ ନେଇ ଧନୀକ ଗୋଷ୍ଠୀର ଖେଳକୁ ଅଗ୍ରାହ୍ୟ କରି ବଞ୍ଚି ରହେ ବାଞ୍ଛା। କେବଳ ବଞ୍ଚି ରହେ ନାହିଁ ବରଂ ତାହାର ଉତ୍ତର ପୁରୁଷର ଅଧିକାରକୁ ପ୍ରତିଷ୍ଠା କରେ। ନାଟକ ରଚନା ମନୋଜ ମିତ୍ର କରିଥିବା ବେଳେ ଓଡ଼ିଆ ଅନୁବାଦ କରିଛନ୍ତି ଧୀର ମଲ୍ଲିକ ଓ ନିର୍ଦ୍ଦେଶନା ଦେଇଛନ୍ତି ବୃନ୍ଦାବନ ବାରିକ। ନାଟକରେ ଧୀର ମଲ୍ଲିକ, ବୃନ୍ଦାବନ ବାରିକ, କାଳୀପ୍ରସନ୍ନ ମଲ୍ଲିକ, ଭାରତ ପଣ୍ଡା, ସକଳେଶ୍ବର, ସନ୍ତୋଷ, ସୌମ୍ୟ, ହେମନ୍ତ, ନରେନ୍ଦ୍ର, ମନିଦୀପା, ଧାରା ଶ୍ରାବଣୀ, ସଂଗ୍ରାମ, ସରୋଜ, ଜ୍ୟୋତି ପ୍ରମୁଖ ଅଭିନୟ କରିଥିଲେ।