୨ ଗୁହାଳରୁ ନେଇଗଲେ ୧୭ ଛେଳି

ବ‌ାଲିଅନ୍ତା : ସ୍ଥାନୀୟ ଅଞ୍ଚଳରେ ପୁଣି ମାତିଲେଣି ଛେଳି ଚୋର। ଚୋରମାନେ ଗତକାଲି ରାତିରେ ବାଳକାଟି ବ୍ରାହ୍ମଣସୁଆଁଲୋ ଗାଁର ୨ଟି ଗୁହାଳ ଖାଲି କରିଦେଇଛନ୍ତି। ଗୁହାଳରେ ଛୁଆ ଛେଳିଗୁଡ଼ାଙ୍କୁ ଛାଡ଼ି ମାଈ ଅଣ୍ଡିରା ମିଶାଇ ୧୭ଟି ବଡ଼ ଛେଳି ଉଠାଇ ନେଇଛନ୍ତି। ଏନେଇ ମଇନ ଭୋଇ ଓ ବିନୋଦ ଭୋଇ ବାଳକାଟି ଫାଣ୍ଡିରେ ଅଭିଯୋଗ କରିବା ପରେ ପୁଲିସ ଛାନ୍‌ଭିନ କରିଛି। କିନ୍ତୁ ଦୁର୍ବୃତ୍ତମାନଙ୍କ ଟେର୍ ପାଇନାହିଁ।

ସୂଚନାନୁସାରେ ମଇନଙ୍କର ମାଈ, ଖାସି ମିଶାଇ ୧୧ଟି ଓ ବିନୋଦଙ୍କର ୬ଟି ଛେଳି ନେଇଯାଇଛନ୍ତି। ଏହି ଦୁଇ ଗରିବ ପରିବାର ଛେଳି ଚାଷରୁ ଗୁଜୁରାଣ ମେଣ୍ଟାଉଥିଲେ। ଛେଳି ଚୋରି ପରେ ସେମାନଙ୍କ ପରିବାର ମୁଣ୍ଡରେ ହାତ ଦେଇ ବସିଥିବା ବେଳେ ଘରେ ଚୁଲି ଜଳିନାହିଁ।